„Cadea că len sama, anda codoia că ci jianen nici o ghies, nici i ora”. (MATEI 25:13)

„Aven atenți, așen ușteade, că ci jianen cana si o timpo stabilime”. (MARCU 13:33)

Cadea că, nici iech manuș ci jianel exacto cana va avela o sfârșito cadale sistemosco. Tha o Del șiutea iech ‘timpo stabilime’, iech anumime ‘ghies hai ora’. (Matei 24:36) Cu sea cadala, daisaras te jianas cana si o sfârșito pașă? Sar te na! O Isus phendea pesche discipolenghe te aven atenți ca le buchia cai avenas te întâmplon-pe hai cai avelas te sicaven că o sfârșito si pașă.

Le buchia cai întâmplon-pe avelas te sicaven o semno cai va sicavela „o phandaimos cadale sistemosche”. O Isus phendea: „Va vazdela-pe națiunea contra națiunea hai thagarimos contra thagarimos, hai va avela hanțî hamasco hai anda iech than ande aver izdraimata phuveache”. (Matei 24:3, 7) Vo phendea că va mai avena „bare nasfalimata”. (Luca 21:11) Diches vi tu sar pheren-pe le buchia cai phendea-le de mai anglal o Isus?

Aghies le manușa sile duchade anda codoia că si războaia, bochalimos, izdraimata phuveache hai but nasfalimata. Sar exemplo, ande 2004, ando Oceano Indiano sas iech baro izdraimos phuveaco cai cărdea pala peste iech tsunami cai mudardea cam 225000 manușa. Ande trin bărșa i pandemia de COVID-19 cărdea te meren cam 6,9 milioanea manușa anda sea i lumea. O Isus phendea că cadal buchia va sicavena că o sfârșito cadale sistemosco si pașă.

I Biblia phenel că i perioada de angla o sfârșito si „le ghiesa de palal”. (2 Petru 3:3, 4) Cadea sar sicavel-pe ando 2 Timotei 3:1-5, andel ghiesa de palal le manușa avelas te rimosaren-pe moralo zurales but. (Dich o chenarii „ Chiar angla o sfârșito la lumeaco”.) Dichlean vi tu manușa cai gândin-pe numai pende, cai sile hașvale, cai maren-pe hai nai-le iubirea? Vi cadai buchi sicavel că sam pașă catar o sfârșito cadala lumeaco.

Chichi va încărena le ghiesa de palal? I Biblia sicavel că „țâra timpo”. Pala codoia, o Del va mudarela „codolen cai rimosaren i phuv”. (Revelația 11:15-18; 12:12)

O Del stabilisardea deja o ghies hai i ora cana va chosela cado sistemo nasul. (Matei 24:36) Tha si iech vestea lași: O Del ‘ci camel ca vroiech manuș te avel distrugime’. (2 Petru 3:9) Anda codoia, vo del fiesave manușes i posibilitatea te prinjianel leschi voința hai te așunel lestar. O Del camel te așias andi viața cana va avela o sfârșito cadala lumeaco hai te traisaras andi lumea nevi andini lestar, pe iech phuv cărdi iech paradiso.

O Del cărdea posibilo iech programo anda sicaimos pe sea i phuv caște ajutil le manușen te jianen sar daștin te arăsăn andi lumea nevi tela lesco Regato. O Isus phendea că i vestea lași anda o Regato le Devlesco va avela predichime „pe sea i phuv”. (Matei 24:14) Le Martori le Iehovasche pa sea i pheren miliardea ore andi predicarea hai sicaven le manușen o mesajo pherdo speranța la Bibliaco. O Isus phendea că cadai lucrarea de predicare va avela cărdi pe sea i phuv angla so te avel o sfârșito.

I guvernarea le manușenghi va sfârșila-pe na pa but timpo. Tha i vestea lași si că daștis te așes andi viața pala o sfârșito cadala lumeaco hai că daștis te trais ando paradiso pi phuv cai phendea o Del că va dela-les amenghe. Ando articolo cai avel, va avela te diches so daștis te cheres caște trais andi lumea nevi.