LE MANUȘA

So phenel i Biblia: O Del „ci cărdea [i phuv] de ivea, tha cărdea-la ca le manușa te beșen pe late”. (ISAIA 45:18)

AMARI PHUV

So phenel i Biblia: „Iech generația nachel, iech generația avel, tha i phuv așel anda sea o timpo”. (ECLESIASTO 1:4)

SO HACHIARAS CATAR: Cadea sar sicavel i Biblia, i phuv ci va avela distrugime niciechdata hai le manușa va beșena sea o timpo pe late. Atunci, so si o sfârșito la lumeaco?

GÂNDISAR-TU: I Biblia phenel că o sfârșito cadala lumeaco va avela sar sas andel ghiesa cana traisardea o Noe, cana i phuv sas pherdi marimos. (Geneza 6:13) Cu sea cadala, o Noe sas iech manuș orta. Anda codoia, cana andea o potopo, o Del mechlea andi viața le Noes hai lesca familia, tha mudardea le manușen nasul. Anda le buchia cai sas atunci, i Biblia phenel: „I lumea anda codol ghiesa sas-li distrugime cana avilea o baro pai”. (2 Petru 3:6) Daisaras te phenas că codo sas o sfârșito iecha lumeaco. Tha so sas distrugime? Na i phuv, tha le manușa nasul pa i phuv. Cadea că, cana i Biblia del duma anda o sfârșito la lumeaco, ci camel te phenel că amari phuv va avela distrugime, tha că va avela o sfârșito le manușengo nasul pa i phuv hai le buchiango cai von cărde-le.

LE PHARIMATA HAI O NASULIMOS

So phenel i Biblia: „Încă iech țâra timpo hai codola nasul ci va mai avena, va dicheia caring o than cai sas-le hai ci va mai avena. Tha le umili va traina pi phuv hai va arachena plăcerea ando butimos la paceaco”. (PSALMO 37:10, 11)

SO HACHIARAS CATAR: O potopo andal ghiesa le Noesche ci choslea o nasulimos anda sea o timpo. Pala o potopo, le manușa nasul cărde pale ca i viața te avel phari anda savore. Tha, na pa but timpo, o Del va cherela te na mai avel nasulimos. Atunci va pherena-pe le cuvintea cai phendea-le o psalmisto: „Codola nasul ci va mai avena”. O Del va chosela o nasulimos prin pesco Regato, iech guverno cerisco cai rail opral le manușa cai așunen le Devlestar pa sea i phuv.

GÂNDISAR-TU: Va camena codola cai conducin aghies i phuv te supunin-pe le Regatosche le Devlesche? I Biblia sicavel că nici. Si iech dilimos că von va așena contra o Regato le Devlesco. (Psalmo 2:2) So va avela pala codoia? O Regato le Devlesco va paruvela sea le guvernea le manușenghe hai „va așela anda sea o timpo”. (Daniel 2:44) Tha sostar trebul te sfârșil-pe i guvernarea le manușenghi?

So phenel i Biblia: „Ci daștil o manuș cai phirel ci barem te ortol pesche pași”. (IEREMIA 10:23)

SO HACHIARAS CATAR: Le manușa ci sas-le cărde te guvernin-pe corcore. Von ci daștin te conducin mișto averen hai ci daștin te cheren te na mai aven pharimata le manușen.

GÂNDISAR-TU: I lucrarea de referință Britannica Academic phenel că dichiol-pe că le guvernea ci daștin „te rezolvin le bare pharimata andai lumea, sar avelas o ciorâmos, i boch, le nasfalimata, le dezastrea naturalo, le războaia hai aver marimata. Chichiva manușa . . . pachian că numai iech guverno cai rail pe sea i phuv daștil te cherel te na mai aven cadal pharimata anda sea o timpo”. Cu sea cadala, chiar cana seal guvernea le manușenghe chidenas-pe ande iech than caște rain, i lumea avelas conducime sea manușendar imperfecți, cai ci daștin te chosen le pharimata anda save deam duma mai opre. O Regato le Devlesco si o corcoro guverno cai daștil te rezolvil iech data anda sea o timpo sea le pharimata le manușenghe.

Cadea că, i Biblia sicavel, că o sfârșito la lumeaco, cadale sistemosco nasul, ci trebul te daravel le lașe manușen. Mai but, von trebulas te ajucăren pherde bucuria anda codoia că cadai lumea purani hai rimome va avela parudi cana o Del va anela i șucar lumea nevi.

Cana va avela cadaia? O articolo cai avel del ame o răspunso andai Biblia.