1. Sostar ciaion-ame le manușa cai sicaven răbdarea?

 SAVOREN ciaiol-ame cana le coaver sicaven răbdarea. Sar exemplo, dichas lașe iachența codolen cai jianen te ajucăren bi te rovaren-pe. Sam recunoscători codolenghe cai sicaven amenghe răbdarea cana greșisaras. Sa cadea, naisaras le jenesche cai sicadea-ame o ciacimos andai Biblia anda codoia că sas-les răbdarea amența ji cana sichileam, hachiardeam hai astardeam te las-ame pala iech sicaimos biblico. Mai opral sar oriso, naisaras anda sea o ilo le Iehovasche anda codoia că siles răbdarea amența. (Rom. 2:4)

2. Cana daștil te avel amenghe pharo te sicavas răbdarea?

² Chiar cana dichas cuci i răbdarea cai sicaven-la le coaver, daștil-pe că ci si amenghe sea o timpo ușoro te avas răbdători. Sar exemplo, daștil te avel amenghe pharo te așias liniștime cana po drom si but mașini hai ci daisaras te jias angle, vi mai but cana sighiaras. Sau cana le coaver holiaren-ame daisaras sigo te astaras-ame holiatar. Hai, poiechdata, daștil te avel amenghe pharo te ajucăras i lumea nevi cai promitisardea-la o Iehova. Cames te avel tut mai but răbdarea? Ande cado articolo, va avela te hachiaras so si i răbdarea hai sostar si voi cadea de importanto. Sa cadea, va avela te dichas sar daisaras te sicavas mai but răbdarea.

3. So cherel iech manuș răbdătorii cana le coaver holiaren-les?

³ Mai dur, va avela te dichas ștar buchia prin save daisaras te sicavas răbdarea. Ando iechto than, iech manuș răbdătorii ci holiarel-pe sigo. Vo del peschi zor te așel liniștime hai te încărel-pe parpale caște na risarel o nasulimos codolenghe cai holiaren-les. Sa cadea, vo ci șiorel peschi holi pe averende cana silo îngrijorime. I Biblia folosil i dintuni data i duma „ci holiarel- pe sigo” anda o Iehova, cana si scriime anda leste că silo „iech Del îndurătorii hai pherdo mila, cai ci holiarel-pe sigo hai silo barvalo andi iubirea loialo hai ciacimos”. (Ex. 34:6)

4. So cherel iech manuș răbdătorii cana trebul te ajucărel?

⁴ Ando duito than, iech manuș răbdătorii ajucărel liniștime. Dacă trebul te ajucărel mai but sar gândisardea-pe, vo del peschi zor te na holiarel-pe. (Mat. 18:26, 27) Si mai but situații ande save trebul te ajucăras liniștime. Sar exemplo, cana iech manuș del duma, amen trebul te așunas-les pherde răbdarea, bi te așiavas-les. (Iov 36:2) Trebul amenghe răbdarea vi cana ajutisaras codoles casa studiisaras te hachiarel iech ciacimos biblico sau cana trebul te mechel iech obiceio nasul.

5. Sar mai daisaras te sicavas răbdarea?

⁵ Ando trinto than, iech manuș răbdătorii ci sighiarel. Si ciaces, si situații cana trebul te cheras sigo vareso. Tha, cana trebul te cherel iech buchi importanto, iech manuș răbdătorii ci sighiarel te astarel-la caște terminil-la chichi mai sigo. Vo cherel pesche iech plano hai pala codoia lel pesche timpo caște cherel codoi buchi mișto.

6. So cherel iech manuș răbdătorii cana nachel prin pharimata?

⁶ Ando ștar-to than, iech manuș răbdătorii del peschi zor te așel zuralo andel pharimata bi te rovarel-pe. Ande cadal situații, i răbdarea sili phangli catar o fapto te na mechas-ame. Si ciaces, na-i nasul te pâtras amaro ilo angla iech lașio amal, cana nachas prin iech pharimos. Cu sea cadala, iech manuș răbdătorii va cherela sea so daștil caște așel zuralo bi te mechel-pe hai te slujil mai dur le Iehovasche pherdo bucuria. (Col. 1:11) Sar manușa le Devlesche, camas te folosisaras-ame catar sea cadal ștar buchia caște sicavas răbdarea. Sostar? Te dichas mai dur chichiva motivea.

7. Cadea sar sicavel-pe ando Iacov 5:7, 8, sostar si i răbdarea cadea de importanto? (Dich vi i imaginea.)

⁷ Caște avas salvime trebul te sicavas răbdarea. Cadea sar le slujitori loialo andal puraimata, vi amen trebul te ajucăras pherde răbdarea ca o Del te pherel pesche promisiuni. (Evr. 6:11, 12) I Biblia phenel că amen sam sar iech manuș cai cherel buchi i phuv. (Citisar Iacov 5:7, 8.) Vo cherel buchi phares caște șiol semințea andi phuv hai paiarel-len, tha vo ci jianel cana va bariona. Cadea că o manuș ajucărel pherdo răbdarea hai jianel că va arăsăla o ghies cana va chidela peschi recolta. Sa cadea, vi amen cheras but buchia anda o Iehova, chiar cana ‘ci jianas ande savo ghies avel amaro Rai’. (Mat. 24:42) Amen ajucăras pherde răbdarea hai pachiamos anda codoia că jianas, că co timpo alosardo lestar, o Iehova va pherela pesche promisiuni. Dacă hasaras amari răbdarea, daisaras te arăsas te na mai camas te ajucăras hai chiar te duriaras-ame le Iehovastar. Sa cadea, daisaras te astaras te rodas te cheras buchia cai anen amenghe bucuria pe thaneste. Tha, dacă sicavas răbdarea, va avela te așias zurale ji co sfârșito hai va avaia salvime. (Mica 7:7; Mat. 24:13)

8. Sar ajutil-ame i răbdarea te hachiaras-ame mișto le coaverența? (Coloseni 3:12, 13)

⁸ Trebul amenghe răbdarea caște hachiaras-ame mișto le coaverența. Sar exemplo, i răbdarea ajutil-ame te așunas atento cana le coaver den duma amența. (Iac. 1:19) Sa cadea, cana sam răbdători rodas te avas andi pacea savorența. Cana si amen but buchia po șăro, voi ajutil-ame te na sighiaras te cheras sau te phenas vareso cai daștilas te duchavel averen. Cana sam răbdători ci va avela te astaras-ame holiatar chiar cana varecon duchavel-ame. Ando than te risaras parpale o nasulimos, ‘va avela te suportisaras-ame mai dur iech averes hai te iertisaras amen anda sea o ilo iech averes’. (Citisar Coloseni 3:12, 13.)

9. Sar ajutil-ame i răbdarea cana trebul te alosaras so te cheras? (Proverbe 21:5)

⁹ I răbdarea daștil te ajutil-ame te alosaras mișto so te cheras. Ando than te sighiaras te cheras vareso, va avela te las amenghe timpo caște rodas te dichas so si mai mișto anda amende te alosaras. (Citisar Proverbe 21:5.) Sar exemplo, dacă rodas amenghe iech buchi, daisaras te simțosaras-ame spidime te jias ca i iechto buchi cai si amenghe dini, chiar cana cadaia ci mai mechel-ame te jias ca sea le întruniri sau te cheras cadea de but andi predicarea. Tha, dacă si amen răbdarea, va avela te cheras amenghe timpo te gândisaras-ame chichi de dur si i buchi, sode trebul te beșas ca i buchi hai sar va paruvela i buchi amari familia hai amaro amalimos le Iehovaia. Cadea că, cana si amen răbdarea, ci va avela te alosaras nasul.

10. So daștil te cherel iech creștino caște sicavel mai but răbdarea?

¹⁰ Te manghas-ame anda mai but răbdarea. I răbdarea cherel partea anda o rodo le spiritosco sfânto. (Gal. 5:22, 23) Cadea că, daisaras te manghas le Iehovas te del-ame zuralimos caște avas mai răbdători. Dacă nachas prin iech situația ande savi si amenghe pharo te sicavas răbdarea, ‘te mangas mai dur’ o spirito sfânto. (Luca 11:9, 13) Sa cadea, daisaras te mangas le Iehovas te ajutil-ame te dichas le buchia cadea sar dichel-le vo. Pala codoia, trebul te cheras sea so încărel amendar caște sicavas răbdarea ande fiesavo ghies. Cana  mangas-ame mai dur anda răbdarea hai das amari zor te sicavas-la, cadaia va bariola sea mai but ande amaro ilo, ji cana va arăsăla te cherel partea anda amende.

11, 12. Sar sicadea o Iehova răbdarea?

¹¹ Te gândisaras-ame ca o exemplo le manușengo cai arachas-le andi Biblia. Andai Biblia, daisaras te prinjianas bute manușen cai sicade răbdarea. Anda lengo exemplo daisaras te sichioas sar te sicavas răbdarea. Tha angla te dichas chichiva anda cadal exemplea, te sichioas catar o mai baro exemplo cai sicavel răbdarea, amaro Del Iehova.

¹² Andi bar Eden, o Satan meliardea o anav le Iehovasco hai phendea că Vo ci si iech Conducătorii iubitorii hai orta. Tha, ando than te mudarel pe thaneste cadale hohavnes, o Iehova sicadea răbdarea hai ci sighiardea te cherel vareso, anda codoia că jianglea că trebul te nachel mai but timpo caște sicavel că Lesco raimos si o mai lașio. Ande cado timpo, o Iehova așundea but buchia neciace cai sas phende anda leste. Mai but, Vo sicavel răbdarea vi ca sea mai but manușa te daștin te avel-len viața veșnico. (2 Pet. 3:9, 15) Cadea că, milioanea manușa arăsle te prinjianen-les. Dacă gândisaras-ame ca le miștimata cai andea-le i răbdarea le Iehovaschi, daștil-pe că va avela amenghe mai ușoro te ajucăras o timpo cana va avela o sfârșito.

13. Sar sicadea o Isus răbdarea ande iech modo perfecto cadea sar pesco Dad? (Dich vi i imaginea.)

¹³ Cadea sar pesco Dad, o Isus sicavel ande iech modo perfecto răbdarea. Vo cărdea cadaia cana sas-lo pi phuv, chiar cana ci sas lesche sea o timpo ușoro, vi mai but le manușența cai phiravenas-pe cioricanes sar sas le scribi hai le farisei. (Ioan 8:25-27) Tha, cadea sar o Iehova, o Isus ci holiardea-pe  sigo. Cana sas-lo prasado hai aver camenas te holiarel-les, vo ci risarelas lenghe parpale o nasulimos. (1 Pet. 2:23) Sa cadea, pherdo răbdarea, o Isus așilea zuralo andel pharimata bi te rovarel-pe. Hachiaras sostar i Biblia zuriarel-ame ‘te dichas atento caring codo cai suportisardea dumes cadichi de nasul, phende catar le păcătoși’. (Evr. 12:2, 3) Pachias ciaces că o Iehova va ajutila vi amen te avel amen răbdarea hai te așias zurale ande orisavo pharimos.

14. So daisaras te sichioas catar o Avraam? (Evrei 6:15) (Dich vi i imaginea.)

¹⁴ Daștil-pe că ajucăres o sfârșito de but timpo hai acana că phurilean daras că ci va avela te mai arăses te diches-les. So daștil te ajutil-tu te ajucăres mai dur pherdo răbdarea? Gândisar-tu ca o exemplo le Avraamosco. Cana sas-les 75 bărșa, le Avraamos ci sas-les șiave, tha o Iehova phendea lesche: „Va avela te cherav anda tute iech bari națiunea”. (Gen. 12:1-4) Dichlea o Avraam sar pherdilea-pe cadai promisiunea? Numai pe dipaș. Pala so nachlea i len Eufrat hai ajucărdea 25 bărșa, vo dichlea sar prin iech miracolo năștisailea lesco șiavo o Isaac, hai pala aver 60 bărșa, năștisai-le lesche nepoți o Esau hai o Iacob. (Citisar Evrei 6:15.) Tha, o Avraam ci arăslea te dichel sar lesco neamo cărdilea iech bari națiunea, casche sas dini sar moștenirea o Them Promiso. Cu sea cadala, les sas-les i bari bucuria te avel amal le Iehovaia, lesco Del. (Iac. 2:23) Cana va avela uștiado andal mule, o Avraam va avela ciaces voime te așunel că lesco pachiamos hai răbdarea andine but miștimata anda sea le națiuni. (Gen. 22:18) So sichioas catar? Daștil-pe că amen ci va avela te arăsas  te dichas acana sar pheren-pe sea le promisiuni cai cărdea-le o Iehova. Tha, cadea sar o Avraam, daisaras te pachias ciaces că dacă sicavas răbdarea o Iehova va pochinel-ame acana, hai vi mai but andi lumea nevi cai va avela. (Mar. 10:29, 30)

15. So trebulas te rodes te prinjianes mai mișto?

¹⁵ Andi Biblia, arachas o exemplo bute manușengo cai sicade răbdarea. (Iac. 5:10) Daștias te cheres tuche timpo te rodes te prinjianes mai mișto cadal exemplea? b Daștis te astares te sichios anda o exemplo le Davidosco, cai, chiar cana sas-lo machlo sar rege cana sas-lo zurales tărno, vo trebuisardea te ajucărel but bărșa ji cana astardea te rail. Sau gândisar-tu co Simeon hai i Ana, cai slujisarde pherde pachiamos le Iehovasche ando timpo so ajucărde te avel o Mesia. (Luca 2:25, 36-38) Cana dichas cadal relatări, te șioas amenghe le pușimata cai aven: „So ajutisardea cadale manușes te sicavel răbdarea? So miștimata andea lesche i răbdarea? Sar daisarav te lav-ma pala leste?”. Sa cadea, daisaras te sichioas vi anda le exemplea cai ci sicade răbdarea. (1 Sam. 13:8-14) Daisaras te pușias-ame: „Sostar ci sicadea răbdarea cado manuș? So buchia nasul țârdea anda codoia că ci sas-lo răbdătorii?”.

16. Save si chichiva miștimata cai anel-le amenghe i răbdarea?

¹⁶ So miștimata anel amenghe i răbdarea? Cana sicavas răbdarea sam mai voime hai mai liniștime. Cadea că, i răbdarea daștil te ajutil-ame te avel amen iech goghi sastevesti hai iech lașio sastimos. Mai but, cana sicavas răbdarea hachiaras-ame mai mișto le coaverența, hai cadea i congregația așel chidini. Cana varecon phenel vareso nasul, ci va avela te sighiaras te holiaras-ame hai te cheras i situația vi mai phari. (Ps. 37:8, n.s.; Prov. 14:29) Tha, mai opral sar oriso, cana sicavas răbdarea, las-ame pala amaro Dad cerisco hai pașioas lestar.

17. So trebulas te avas hotărâme te cheras?

¹⁷ Si zurales șucar te sicavas răbdarea hai cadaia anel amenghe vi but miștimata. Chiar cana ci si amenghe sea o timpo ușoro te sicavas răbdarea, o Iehova va ajutila-ame te daisaras te cheras cadaia. Hai, ando timpo so ajucăras pherde răbdarea i lumea nevi, daisaras te pachias ciaces că „i iach le Iehovaschi dichel caring codola cai daran lestar, caring codola cai ajucăren leschi iubirea loialo”. (Ps. 33:18) Cadea că, te avas hotărâme vi mai dur ‘te las pe amende’ i răbdarea.