SI MIȘTO prinjiando o fapto că po papiruso scriilas-pe o mai but ando purano Egipto. Vi le greci hai vi le romani scriisarde po papiruso. * Tha si mai țâra prinjiando o fapto că o papiruso sas-lo folosime vi caște cheren-pe bărci.

Mai but sar 2 500 bărșența mai anglal, o profeto Isaia scriisardea că codola cai beșenas „andel thana lenența anda Etiopia” avenas te bișalen „manușen pi marea hai po paia ande bărci anda papiruso”. Mai târzio, o profeto Ieremia phendea de mai anglal că, atunci cana o foro Babilono avelas te avel atachime catar le mezi hai le perși, von va dena iag „le bărci anda papiruso” le babilonienghe caște așaven-le te na scăpin. (Is. 18:1, 2; Ier. 51:32)

Anda codoia că i Biblia sili inspirime le Devlestar, codola cai studiin cado lil ci mirin-pe că le arheologi arachen buchia cai sicaven că andel timpuri biblico o papiruso sas-lo folosime caște cheren-pe bărci. (2 Tim. 3:16) Le arheologi arachle dovezii claro că ando Egipto cherenas-pe bărci anda papiruso.

Le picturi hai le desenea pa le ziduri anda chichiva mormintea egipteano sicaven sar chidelas-pe o papiruso hai sar cherenas-pe le bărci. Le murșa șinenas le tulpini anda papiruso, phandenas-le andel mănunchiuri, hai pala codoia astarenas-le chidino ande iech than. Le tulpini anda papiruso sile triunghiularo. Cadea că, cana sile chindines phangle, cheren iech masa compacto hai zurali. O lil A Companion to Ancient Egypt phenel că le bărci anda papiruso daștinas te aven mai lungo sar 17 m, hai sas-le 10 sau 12 vâsle de iech partea hai de aver.

Andi Valea le Niloschi, bariolas but papiruso. Mai but, le bărci anda papiruso cherenas-pe destul de ușoro. Chiar vi atunci cana le manușa începosarde te folosisaren o cașt caște cheren bărci mai bare, codola cai astarenas mașe hai le vânători, folosisarde mai dur le plute hai le țâne bărci anda papiruso.

Le bărci anda papiruso sas-le folosime but timpo. O scriitoro greco Plutarh (sec. I a.e. – sec. II a.e.) phendea că le plute anda papiruso sas-le folosime vi ande lesco timpo.