1, 2. a) Sostar trebul te pachian-pe ando Iehova le tărne căsătorime de țâra timpo? (Psalmo 37:3, 4) b) So va avela te dichas ande cado articolo?

CAMEN te căsătorin tumen sau căsătorisardean tumen de țâra timpo? Dacă da, de abia ajucăren te bucurisaren tumen viațatar pașa o manuș but iubime. Tha, ande orisavi căsătoria, aven vi pharimata. Sa cadea, trebun te len decizii importanto. Tha, ca tumari fericirea te încărel but, cadaia încărel catar so alosaren te cheren aghies hai catar o modo ande savo jianen te nachen părdal le pharimata. Dacă bazon tumen po Iehova, va lena decizii goghiaver, tumari căsătoria va avela mai zurali, hai tumen va avena mai fericime. Dacă ci încăren conto catar o modo ande savo gândil o Del, siguro va avena tumen pharimata cai va avena te rimon tumari fericirea hai tumari căsătoria. (Citisar Psalmo 37:3, 4.)

² Chiar cana cado articolo si anda codola cai căsătorisarde-pe de țâra timpo, le buchia sicade cade, ajutin sea codolen cai sile căsătorime. Mai dur, va avela te dichas so daisaras te sichioas anda o exemplo chichiva slujitorengo loiali anda puraimos. Le buchia cai sichioas-le anda cadal relatări aplichin-pe ande mai but domenii anda amari viața hai vi andi căsătoria. Sa cadea, va avela te ajutil amen vi o exemplo chichiva manușengo căsătorime de aghies.

3, 4. So pharimata daștilas te avel le tărnen căsătorime de țâra timpo?

³ Chichiva manușa daștinas te zuriaren le tărnen căsătorime de țâra timpo te îngăren iech viața cadea phendi normalo.  Sar exemplo, le dada hai aver neamuri daștinas te phenen lenghe butivar te cheren șiave chichi mai sigo. Sau, daștil-pe că chichiva anda lenghe amala sau codola andai familia cai camen lengo miștimos, te phenen lenghe te chinen penghe iech chăr hai te avel len sea so trebul len.

⁴ Dacă ci len sama pe le decizii cai len-le, daștinas te arăsăn te chiden but camimata cai duchaven len. Cadea că, cadichi o rrom, hai vi i rromni va trebuna te cheren buchi but ore caște pochinen penghe camimata. I buchi daștilas te ciorel anda o timpo cai le dui trebulas te folosisaren-les co studio personalo la Bibliaco, te încăren i închinarea andi familia hai te len partea ca i predicarea. Daștil-pe, că von ci va avena ca chichiva întruniri caște cheren buchi vi pala o programo hai te cheren mai but love caște aven siguri că ci va hasarena penghi buchi. Cadea că, hasaren ocazii zurales șucar te slujin le Iehovasche vi mai but.

5. So daștin te sichion anda o exemplo le phralesco Klaus hai la pheiaco Marisa?

⁵ I experiența sicavel că dacă phiras te chidas but barvalimata, cadaia ci anel amenghe fericirea. O Klaus hai i Marisa simțosarde o ciacimos anda cadal cuvintea. * Țâra timpo pala so căsătorisarde-pe, le dui cărde but buchi caște avel len iech viața mai lași. Tha, ande lengo ilo, ci sas-le ciaces fericime. O Klaus phenel: „Sas amen sea so trebulas amenghe, tha ci sas amen obiectivea spiritualo. Sincero, amari viața sas phari hai pherdi streso”. Daștil-pe că vi tumen dichlean că le buchia materialo ci anen iech fericirea ciaci. Tha, i situația ande savi san ci si cadea de phari caște na daștin te înclen anda late. Averenghe lașe exemplea daștin te ajutin tumen te cheren le paruimata cai trebun. Mai anglal, te dichas so daștin te sichion le rroma anda o exemplo le regesco Iosafat.

6. Cadea sar phenel o sfato andal Proverbe 3:5, 6, so cărdea o Iosafat cana nachlea prin iech buchi zurales phari?

⁶ Dacă san rrom, simțosares tut po iech data perado anda le responsabilități cai si tut? Ande cado cazo, daștis te sichios but buchia anda o exemplo le regesco Iosafat. Vo lelas sama pe iech bari națiunea. Sar cărdea vo cadai buchi cadea de bari? Vo cărdea sea so daisardea caște lel sama pe codola cai sas-le tela lesco vast. Zuriardea le foruria anda Iuda hai chidea iech armata zurali, de cam 1160 000 soldați. (2 Cron. 17:12-19) Pala codoia, nachlea prin iech buchi zurales phari. Iech bari armata, cherdi anda amoniți, moabiți hai murșa anda le plaina anda o Seiro, phende că va cherena nasul lescha familiache hai lesche poporosche. (2 Cron. 20:1, 2) So cărdea o Iosafat? Vo rughisardea le Iehovas te ajutil-les hai te del-les zuralimos. O modo ande savo cărdea le buchia sas cadea sar phenelas o sfato goghiaver andal  Proverbe 3:5, 6. (Citisar.) I rugăciunea pherdi umilința cai cărdea-la o Iosafat sicadi ande 2 Cronici 20:5-12, sicavel o baro pachiamos cai sas-les ande lesco Dad cerisco. Sar dea o Iehova răspunso ca leschi rugăciunea?

7. So phendea o Iehova caring o Iosafat te cherel?

⁷ O Iehova dea răspunso ca le rugăciuni cai cărdea-le o Iosafat prin iech levito po anav Iahaziel. O Iehova phendea: „Așen pe tumare thana, așen liniștime hai va dichena sar o Iehova salvil tumen!”. (2 Cron. 20:13-17) Si ciaces, cado ci sas iech modo normalo caște maren-pe. Tha le instrucțiuni ci avenas catar iech manuș, tha catar o Iehova. O Iosafat sicadea că șiutea sea pesco pachiamos ando Del, hai cărdea exacto cadea sar sas lesche phendo. Andi iechto linia anda marimos, vo ci șiutea soldați zurale, tha manușa cai jianenas te ghilaban hai ci sas-len arme. Hai o Iehova cherdea so phendea lesche; Vo mudardea i armata dușmano. (2 Cron. 20:18-23)

8. Sostar si o Iosafat iech lașio exemplo anda le rroma creștini?

⁸ So daștin te sichion le rroma anda o exemplo cai mechlea les o Iosafat? Tumen si tume i responsabilitatea te len sama pe le jene anda tumari familia. Cadea că, cheren sea so daștin te ferin-le hai te ajutin-len. Cana nachen prin pharimata, daștinas te pachian că daștin te nachen corcore părdal cadala. Tha așen contra o fapto te bazon tumen pe tumaro zuralimos. Manghen o ajutorii le Iehovasco. Sa cadea, rughin tumen anda o ilo ande iech than tumare rromnianța. Roden i îndrumarea le Iehovaschi andi Biblia hai andel publicații bazome pi Biblia hai pala codoia cheren so sichilean. Daștil-pe că na savoren va placiana-le le decizii cai lean-le. Daștinas chiar te pachian că ci sile lașe, hai te phenen că le love hai le buchia materialo anen iech siguranța ciaci. Ande cadal situații, anen tumenghe amintea o exemplo cai mechlea-les o Iosafat, les sas-les pachiamos ando Iehova hai sicadea-les prin le buchia cai cherdea-le. O Del ci mechlea cadale slujitores loialo hai ci va mechela nici tut. (Ps. 37:28; Evr. 13:5) Tha, so daștin te cheren codola căsătorime caște avel len iech viața ciaces fericime?

9. So prinjianas andai Biblia anda o Isaia hai anda leschi rromni?

⁹ Sea i viața le Isaieschi hai lesca rromniachi sas te cheren i buchia anda o Iehova. O Isaia sas profeto, hai pala so fal-pe, vi lesca rromniache sas dine te cherel buchia profetico, anda codoia că phenel-pe lache ‘profetesa’. (Is. 8:1-4) Tha, cadea sar jianas, lenghi viața sas te cheren penghi buchi anda o Iehova. Von sile iech exemplo anda le manușa căsătorime de aghies.

10. Sar daștil te ajutil codolen căsătorime o fapto te studiin le profeții biblico?

¹⁰ Codola căsătorime de aghies daștin te len-pe pala o exemplo cai mechlea-les o Isaia hai leschi rromni hai te cheren sea so daștin andi buchi anda o Iehova. Cadala daștin te zuriaren pengo pachiamos ando Iehova cana dichen ande iech than le profeții biblico hai o modo zurales șucar ande savo cadala pheren-pe sea o timpo. * (Tit 1:2) Sa cadea, si importanto te meditosaren ca o modo ande savo daștin te len partea caște pheren-pe chichiva profeții, sar avelas i profeția le Isusoschi anda i predicarea la vesteachi lași pe sea i phuv angla te  avel o sfârșito. (Mat. 24:14) Chichi le dui va pachiana mai zurales că le pofeții biblico pheren-pe, cadichi va camena mai but te cheren sea so daștin ande penghi buchi anda o Iehova.

11. So cărde i Priscila hai o Aquila hai sostar?

¹¹ Le tărne căsătorime de țâra timpo daștin te sichion but buchia catar i Priscila hai o Aquila, dui manușa căsătorime evrei, cai beșenas andi Roma. Von așunde i vestea lași anda o Isus hai arăsle creștini. Siguro, len sas-len iech viața șucar. Tha de iech data lenghi viața parudea-pe cana o împărato Claudio dea iech decreto ca sea le evrei te tiliaren andai Roma. So însemnosardea cado paruimos anda o Aquila hai i Priscila? Von trebunas te mechen o foro ande savo beșle, te arachen penghe iech chăr hai te cheren ande aver than penghi buchi. Avelas te cherel-le cado paruimos saveste ci ajucărde-pe te șion po duito than le buchia spiritualo? Jianas cu sea o răspunso. Ando Corinto, o foro ande savo găle, o Aquila hai i Priscila cărde sea so daisarde andel buchia la congregațiache hai cărde buchi ande iech than le apostoloia Pavel caște zuriaren le phralen. Pala codoia, găle ande aver foruria ande save sas nevoia catar creștini caște îngăren mai dur i vestea lași. (Fap. 18:18-21; Rom. 16:3-5) Daisaras te phenas siguro, len sas-len iech familia barvali hai pherdi binecuvântări.

12. Sostar trebun codola căsătorime te șion penghe obiectivea spiritualo?

¹² Codola căsătorime de aghies daștin te len-pe pala o exemplo cai mechlea les i Priscila hai laco rrom Aquila, cana șion po iechto than le buchia spiritualo. O mai lașio momento ande savo le dui trebun te den duma anda le obiectivea savende camen te arăsăn ande lenghi viața sar familia, si i perioada cana le dui prinjianen-pe mai mișto. Cana iech rrom hai iech rromni len decizii ande iech than hai cheren sea so daștin te arăsăn te cheren sa codol obiectivea cai si len, len silen mai but ocazii caște dichen o vast le Iehovasco ande lenghi viața. (Ecl. 4:9, 12) Te dichas i experiența le phraleschi Russel hai la pheiachi Elizabeth. O Russel phenel:  „Andi perioada cana prinjiandeam amen mai mișto, deam duma claro anda amare obiectivea spiritualo”. I Elizabeth phenel: „Sas zurales importanto te das duma anda cadai buchi anda codoia că, mai târzio, le decizii cai leam-le ci cărde amen te arăsas te na mai cheras amare obiectivea”. Lenghi situația mechlea-len te muchin-pe andi Micronezia, cai sas nevoia mai bute vestitorendar.

13. Cadea sar phenel-pe ando Psalmo 28:7, sar va avela te avas pochinde parpale dacă pachias amen ando Iehova?

¹³ Cadea sar o Russel hai i Elizabeth, but creștini căsătorime ci camle te șion-pe te cheren aver buchia, anda codoia că camle te den mai but timpo andai lucrarea hai te sicaven averen. Dacă șion penghe obiectivea ande le Iehovaschi buchi hai cheren ande iech than sea so daștin caște arăsăn te cheren-le, lenghi zor va avela pochindi parpale. Von va dichena pe lenghi morci sar lel sama o Iehova pe lende, lengo pachiamos ande leste va bariola hai va avena ciaces fericime. (Citisar o Psalmo 28:7.)

14. Sar sicade pachiamos o Petru hai leschi rromni andi promisiunea anda Matei 6:25, 31-34?

¹⁴ Codola căsătorime daștin te sichion but buchia anda o exemplo cai mechlea-les o Petru hai leschi rromni. Pala cam șiov șiona sau chiar iech bărș de cana dichlea i iechto data le Isusos, o Petru trebuisardea te lel iech decizia imoportanto. Leschi buchi sas te astarel mașe. Cadea că, cana o Isus phendea lesche te avel pala leste, o Petru trebulas te lel iech decizia, hai te încărel conto vi catar i situația pesca familiachi. (Luca 5:1-11) O Petru alosardea te jial pala o Isus ande peschi buchi de predicare. Iech alosarimos goghiaver! Si amen sea le motivea te pachias că, i rromni le Petroschi sas pașa leste ande cadai decizia cai lea-la. I Bibila sicavel că, pala o jiuvindimos le Isusosco, voi gălea ande iech than le Petroia ande chichiva ocazii. (1 Cor. 9:5) Sam siguri că, anda codoia că la sas-la iech lașio exemplo, o Petru daisardea te del bi te încărel-pe parpale sfaturi le rromnianghe hai le rromenghe creștini. (1 Pet. 3:1-7) Si claro că cadichi le Petros, hai vi lesca rromnia sas-len pachiamos andi promisiunea le Iehovaschi că va avela te lel sama pe lende dacă șion o Regato po iechto than. (Citisar Matei 6:25, 31-34.)

15. So sichioas andai experiența le phraleschi Tiago hai la pheiachi Esther?

¹⁵ Dacă san căsătorime de mai but bărșa, sar daisaren te slujin vi mai dur le Iehovasche anda sea o ilo hai cu sea so si tumen? Iech buchi cai daștil te ajutil tumen si te citisaren le experiențea avere manușenghe căsătorime, sar exemplo, codola sicade andi rubrica, „Von camle te slujin”, anda o Turno de veghe. Cadal articolea cărde le phrales Tiago hai la pheia Esther, dui manușa căsătorime andai Brazilia, te slujin cai si nevoia mai bute vestitorendar. O Tiago phenel: „Cana dichleam sar ajutisardea o Iehova cadale phralen, camleam vi amen te simțosaras leschi îndrumarea hai leschi grija”. Cadea că, von muchisarde-pe ando Paraguay hai slujin ande cado teritorio de șib portughezo anda 2014. I Esther phenel: „Iech anda le versetea cai placial amen o mai but, si Efeseni 3:20. Simțosardeam butivar sar pheren-pe cadal cuvintea ande amari viața”. Ando lil caring le efeseni, o Pavel promitisardea că o Iehova va avela te del amen „mai but sar mangas”. Dichleam butivar sar pherdea-pe cadai promisiunea!

16. Casa daștinas te den duma le tărne căsătorime cana camen te dichen sar si lenghe obiectivea?

 ¹⁶ I experiența codolenghi cai sichile te pachian-pe ando Iehova, daștil te ajutil vi codolen tărne cai sile căsătorime. Chichiva manușa căsătorime slujin le Iehovasche de but bărșa andi buchi sar pionieri. Dacă camen te dichen sar si tumare obiectivea, den duma lența. Cadaia si iech buchi prin savi sicaven că si tumen pachiamos ando Iehova. (Prov. 22:17, 19) Vi le phure de congregație daștin te ajutin codolen căsătorime te șion penghe obiectivea spiritualo hai te arăsăn te cheren-le.

17. So daisaras te sichioas andai experiența le phraleschi Klaus hai la pheiachi Marisa?

¹⁷ Po iechdata, le planuri cai cheras-le amenghe caște cheras mai but ande le Iehovaschi buchi ci înclen cadea sar ajucărdeam amen. Te dichas o exemplo le phralesco Klaus hai la pheiachi Marisa, anda save deam duma mai anglal. Ca trin bărș pala so căsătorisarde-pe, von muchisarde-pe caște ajutin ca iech proiecto de construcție ca i filiala anda Finlanda. Tha așunde că va daștina te așen code numai șiov șiona. Cadai vestea duchadea-le. Tha, ca țâra timpo, sas-le acharde te len partea ca iech curso caște sichion i șib arabo, hai acana slujin pherde bucuria ando teritorio de șib arabo anda aver them. Cana dichel caring o timpo cai nachlea, i Marisa phenel: „Daștil te avel pharo te încles anda chi zona cai si mișto hai te pachias tut anda sea o ilo ando Iehova. Tha dichlem sar, de fiesavi data, o Iehova ajutisardea-ame ande moduri cai ci ajucărdeam amen. Cadea că, mânro pachiamos ando Iehova cărdea-pe vi mai zuralo”. Vi tumen daștin te pachian zurales că o Iehova va avela te binecuvântil tumen sea o timpo dacă șion tumaro pachiamos anda sea o ilo ande leste.

18. So daștin te cheren le tărne căsătorime caște sicaven că pachian-pe ando Iehova?

¹⁸ I căsătoria si iech daro catar o Iehova. (Mat. 19:5, 6) Vo camel ca codola căsătorime te bucurin-pe catar cado daro. (Prov. 5:18) Tărne căsătorime, daștinas te dichen dacă o modo ande savo traisaren tumari viața si o mai lașio? Cheren sea so daștin caște sicaven le Iehovasche că san recunoscători anda lesche daruri? Rughisaren tumen leste. Roden ande lesco Cuvânto principii cai aplichin-pe tumende. Pala codoia, cheren cadea sar sichilean andal îndrumări cai del-le tumenghe o Iehova. Daștin te pachian zurales că va avela tumen iech viața fericime hai binecuvântime dacă va șiona po iechto than i buchi anda o Iehova!