1. Sar daștin te dichen le manușa loialo le Iehovas?

ANDAI familia închinătorenghi le Iehovaschi cherel partea o Isus, cai si „o iechto năștime anda sea i creația”, hai but îngeri. (Col. 1:15; Ps. 103:20) Cana sas-lo pi phuv, o Isus sicadea că le manușa loialo daștin te dichen le Iehovas sar lengo Dad. Cana dea duma pesche discipolența, o Isus phendea anda o Iehova că si „mânro Dad hai tumaro Dad”. (Ioan 20:17) Vi amen, cana dedichisaras-ame le Iehovasche hai bolas-ame, începosaras te cheras partea anda iech familia iubitorii phralența hai pheianța. (Mar. 10:29, 30)

2. So va dichaia ande cado articolo?

² Anda chichiva si pharo te dichen le Iehovas sar iech Dad iubitorii. Aver, ci jianen te sicaven penghi iubirea caring lenghe phrala hai pheia. Ande cado articolo, va avela te dichas sar ajutil-ame o Isus te dichas le Iehovas sar iech Dad iubitorii savestar daisaras te pașioas. Mai but, va avela te dichas sar daisaras te imitisaras le Iehovas ando modo sar te phiravas-ame amare phralența hai pheianța.

3. Sar ajutil-ame i rugăciunea model te pașioas le Iehovastar?

³ O Iehova si iech Dad iubitorii. O Isus camel te dichas le Iehovas cadea sar dichel-les vo, iech Dad lașio hai iubitorii, savestar ci si amenghe pharo te pașioas, na sar iech stăpâno cai așel dur amendar. Cadaia dichiol-pe claro anda o modo sar o Isus sicadea pesche discipolen te rughin-pe. Vo începosardea i rugăciunea model prin le cuvintea: „Amaro dad”. (Mat. 6:9) O Isus daisardeas te sicavel-ame te phenas le Iehovasche „o Mai Zuralo”, „o Creatorii” sau „o Rege anda sea o timpo”, titluri biblico cai sicaven mișto sar si o Iehova. (Gen. 49:25;  Is. 40:28; 1 Tim. 1:17) Cu sea cadala, o Isus sicadea-ame te phenas lesche „Dade” anda sea o ilo.

4. Catar jianas că o Iehova camel te pașioas lestar?

⁴ Si amenghe pharo te dichas le Iehovas sar iech Dad iubitorii? Anda chichiva anda amende daștil te avel. Anda codoia că barileam ande iech familia cai ci simțosardeam i iubirea ieche dadeschi si amenghe pharo te jianas sar si te avel tut iech dad iubitorii. Tha, ce but zuriarel-ame te jianas că o Iehova hachiarel mișto so si ande amaro ilo. Vo camel te avel pașă amendar. Anda codoia, lesco Cuvânto zuriarel-ame: „Pașion le Devlestar hai vo va pașiola tumendar!”. (Iac. 4:8) O Iehova iubil-ame hai camel te avel o mai lașio Dad cai daștilas te avel-ame.

5. Cadea sar phenel-pe ando Luca 10:22, sar ajutil-ame o Isus te pașioas le Iehovastar?

⁵ O Isus daștil te ajutil-ame te pașioas le Iehovastar. Vo prinjianel zurales mișto le Iehovas hai sicavel perfecto lesche calități. Anda codoia daisardea te phenel: „Con dichlea man dichlea vi le Dades”. (Ioan 14:9) Cadea sar iech phral mai baro, o Isus sicavel-ame te respectisaras amare Dades hai te ascultisaras lestar, te cheras le buchia cai placian-les hai te avas cuci ande lesche iacha. Tha, chichi timpo sas-lo pi phuv, o Isus sicadea amenghe vi mai but chichi de lașio hai iubitorii silo o Iehova. (Citisar Luca 10:22.) Te dichas chichiva exemplea.

6. Catar jianas că o Iehova ascultisardea le rugăciuni cai phendea-le o Isus? Den iech exemplo.

⁶ O Iehova ascultil pesche șiaven. Te dichas sar ascultisardea o Iehova le rugăciuni cai phendea-le lesco Șiavo iechto năștime. Cana sas-lo pi phuv, o Isus rughisardea-pe butivar le Iehovasche hai o Iehova siguro ascultisardea-les. (Luca 5:16) Sar exemplo, așundea-les cana rughisardea-pe angla so te lel bare decizii, sar avelas cana trebuisardea te alosarel le 12 apostolen. (Luca 6:12, 13) Sa cadea, o Iehova așundea le rugăciuni cai phendea-le cana sas-lo zurales duchado. Chiar angla ca o Iuda te bichinel-les, o Isus rughisardea-pe anda sea o ilo anda le phare buchia prin save avelas te nachel. O Iehova na numai că așundea leschi rugăciunea,  tha vi bișaldea iech îngero caște zuriarel-les. (Luca 22:41-44)

7. Sar simțosares-tu cana jianes că o Iehova ascultil che rugăciuni?

⁷ Vi aghies, o Iehova ascultil le rugăciuni cai phenen-le lesche slujitori hai del răspunso lende cana si o mai mișto hai ande o mai lașio modo. (Ps. 116:1, 2) Te dichas sar dea răspunso o Iehova ca le rugăciuni iecha pheiache anda India. La sas-la bare pharimata emoționalo hai rughisardea-pe anda ilo le Iehovasche anda le buchia prin save nachelas. Voi phenel: „I emisiunea anda mai 2019 pa JW Broadcasting^®, cai sicavel sar te nachas părdal le pharaimata hai le daraimata, avilea exacto cana trebuisardea. Sas o răspunso ca mânre rugăciuni”.

8. Sar sicadea o Iehova iubirea caring pesco Șiavo?

⁸ O Iehova iubil-ame hai lel sama pe amende, cadea sar iubisardea le Isusos hai lea sama pe leste cana sas-lo pi phuv. (Ioan 5:20) Vo lea sama pe pesco Șiavo po plano spiritualo, emoționalo hai fizico. Mai but, o Iehova sicadea bi te încărel-pe parpale că iubil-les hai că silo cuci ande lesche iacha. (Mat. 3:16, 17) Anda codoia că jianelas că lesco Dad cerisco iubitorii sas-lo sea o timpo pașa leste, o Isus ci simțosardea-pe niciechdata corcoro. (Ioan 8:16)

9. Sar sicavel o Iehova peschi iubirea caring amende?

⁹ Cadea sar o Isus, vi amen dichleam ande but feluri i iubirea le Iehovaschi caring amende. O Iehova țârdea amen peste hai dea-ame iech șucar familia spiritualo iubitorii, phralența hai pheianța cai ajutin-ame te avas fericime hai cai zuriaren-ame cana sam perade. (Ioan 6:44) Vo del-ame sea o timpo haben spiritualo savestar si amen nevoia caște avel-ame iech pachiamos zuralo. Mai but, ajutil-ame te aven-ame le buchia materialo cai trebun-ame ande fiesavo ghies. (Mat. 6:31, 32) Ando timpo so gândisaras-ame ca i iubirea le Iehovaschi caring amende, pașioas vi mai but lestar.

10. So sichioas anda o modo sar o Iehova phiravel-pe amare phralența hai pheianța?

¹⁰ O Iehova iubil amare phralen hai pheian. Tha, po iechdata daștil te avel amenghe pharo te simțosaras iubirea caring codola anda amari familia spiritualo hai te sicavas-la, anda codoia că barileam ande thana diferime hai avas anda mai but culturi. Mai but, cheras greșeli cai daștin te holiaren sau te peraven averen. Cu sea cadala, daisaras te bariaras amari iubirea caring amare phrala hai pheia dacă las-ame pala o exemplo amare Dadesco cerisco. (Ef. 5:1, 2; 1 Ioan 4:19) Mai dur, va avela te dichas so daisaras te sichioas anda o exemplo le Iehovasco.

11. Sar sicadea o Isus ‘i compasiunea tandro’ le Iehovaschi?

¹¹ O Iehova sicavel ‘compasiunea tandro’. (Luca 1:78) Iech manuș cai siles compasiunea, silo duchado cana dichel averen că sile perade hai rodel te dichel sar daștil te ajutil-le hai te zuriarel-le. Cana sas-lo pi phuv, o Isus sicadea i grija le Iehovaschi caring le manușa. (Ioan 5:19) O Isus simțosardea mila caring le but manușa cai chidenas-pe te așunen-les „anda codoia că sas-le jupuime hai sas-le șudine anda iech than ande aver sar niște bacrea cai nai-le păstoro”. (Mat. 9:36) I compasiunea le Isusoschi cărdea-les na numai te simțosarel iubirea anda lende tha, vi te ajutil-le. Vo sastiardea le nasfalen hai zuriardea codolen cai cherenas ‘phari buchi hai pharimata phiravenas’. (Mat. 11:28-30; 14:14)

12. Sar daisaras te sicavas compasiunea caring amare phrala hai pheia?

 ¹² Caște sicavas compasiunea caring amare phrala hai pheia, trebul te jianas prin so pharimata nachen. Sar exemplo, daștil-pe că iecha pheia sila iech baro nasfalimos. Voi ci rovarel-pe niciechdata, tha daștil-pe că avelas bucurime te dichel că ajutisaras-la. Daisaras te pușias-ame: „Daștil te lel sama pe peschi familia? Daisaras te ajutisaras-la te cheras haben sau te cheras ujimos ando chăr?”. Sau daștil-pe că iech phral hasardea peschi buchi. Daisaras te ajutisaras-les țâra lovența bi te jianel, ji cana arachel pesche iech aver buchi?

13, 14. Sar daisaras te sicavas generozitatea cadea sar o Iehova?

¹³ O Iehova silo generoso. (Mat. 5:45) Ci trebul te ajucăras ca amare phrala hai pheia te manghen amendar ajutorii, caște sicavas lenghe compasiunea. Cadea sar o Iehova, camas amen te cheras o iechto paso. Vo cherel te avel o cham po ceri ande fiesavo ghies bi ca amen te mangas cadai buchi. O tachimos le chamesco anel miștimata savore manușenghe, chiar vi codolenghe cai ci sile recunoscători. Cana lel sama pe sea so trebul-ame, o Iehova sicavel peschi iubirea caring amende. Lesco lașimos hai generozitatea cherel-ame te iubisaras-les vi mai but.

¹⁴ Cadea sar lengo Dad cerisco, but phrala hai pheia cheren o iechto paso caște sicaven generozitatea. Sar exemplo, ando bărș 2013, o super-taifuno Haiyan cărdea bare phagherimata ande Filipine. But phrala hai pheia hasarde penghe chăra hai penghe buchia. Tha, amari familia spiritualo pa sea i phuv ajutisardea-le sigo. But phrala cărde donații sau ajutisarde te aven lașiarde sau vazdine pale cam 750 chăra ande mai țâra sar iech bărș! Vi andi pandemia de COVID-19, amare phrala anda sea i lumea ajutisarde-pe iech averes. Cana ajutisaras sigo codolen anda amari familia spiritualo, sicavas amari iubirea caring lende.

15, 16. Cadea sar phenel-pe ando Luca 6:36, savi si iech buchi importanto cai trebul te cheras-la caște las-ame pala o exemplo amare Dadesco cerisco?

¹⁵ O Iehova silo îndurătorii hai iertătorii. (Citisar Luca 6:36.) Simțosaras sar amaro Dad cerisco sicavel amenghe îndurarea  ande fiesavo ghies. (Ps. 103:10-14) Vi o Isus sicadea îndurarea cana iertisardea pesche discipolen imperfecți cai cherenas greșeli. Vo chiar dea peschi viața ca amare păcatea te aven iertime. (1 Ioan 2:1, 2) Ci simțosaras-ame mai pașă le Iehovastar hai le Isusostar cana jianas că sile îndurători hai iertători?

¹⁶ Cana ‘iertisaras anda sea o ilo’ codolen anda amari familia spiritualo, i iubirea mașcar amende cărdiol vi mai zurali. (Ef. 4:32) Po iechdata si amenghe zurales pharo te iertisaras, anda codoia, trebul te cheras eforturi caște avas iertători. Iecha pheia ajutisardea-la o articolo „Te iertisaras-ame iech averes anda sea o ilo”. * Voi phenel: „Cado articolo ajutisardea-ma te dichav avere iachența i iertarea. Cade sicavelas-pe că cana camas te iertisaras averen ci însemnol că pachias că so cărde von si mișto sau că ci duchade-ame. Te iertisaras însemnol te na încăras holi ande amaro ilo hai cadea, încăras amari pacea”. Cana iertisaras anda sea o ilo amare phralen hai pheian, sicavas că iubisaras-le hai las-ame pala o exemplo amare Dadesco, Iehova.

17. Cadea sar phenel-pe ando Matei 5:16, sar daisaras te anas pachiv amare Dadesche cerisco?

¹⁷ Si iech baro privilegio te cheras partea anda iech familia phralența hai pheianța pa sea i phuv cai iubin-pe iech averes. Camas ca sea mai but manușa te anen închinarea le Devlesche ande iech than amența. Anda codoia, ci camas te cheras niciechdata vroiech buchi cai daștilas te anel lajiav po anav amare Dadesco cerisco hai pe lesco poporo. Mai but, das amari zor ca prin amaro phiraimos, te ajutisaras le manușen te camen te așunen i vestea lași. (Citisar Matei 5:16.)

18. So daștil te ajutil-ame te predichisaras pherde tromai?

¹⁸ Po iechdata, le manușa daștinas te prasan-ame sau chiar te persecutin-ame anda codoia că ascultisaras amare Dadestar cerisco. So daisaras te cheras dacă daras că trebul te das duma averența anda le buchia ande save pachias-ame? Daisaras te avas siguri  că o Iehova hai lesco Șiavo va ajutina-ame. O Isus phendea pesche discipolenghe te na daran că ci va jianena so te phenen sau sar te phenen. Vo phendea lenghe vi sostar: „So va trebula te phenen va avela tumenghe dino ande codo momento, anda codoia că na tumen va dena duma, tha o spirito tumare Dadesco va dela duma prin tumende”. (Mat. 10:19, 20)

19. Phenen i experiența ieche manușeschi cai predichisardea pherdo tromai.

¹⁹ Te dichas i experiența le Robertoschi. Vo gălea angla iech tribunalo militaro anda Africa de Sud ando timpo cana studiilas i Biblia hai încă ci sas-les but prinjanimos biblico. Andi instanța, phendea pherdo tromai că camelas te așel neutro anda codoia că iubilas pesche phralen. O Robert dichelas cuci pesco than andi familia le Iehovaschi. „Con si che phrala?”, pușlea-les o judecătoro. Chiar cana ci ajucărdea-pe cadale pușimaste, o Robert andea pesche amintea sigo o texto codole ghiesesco, Matei 12:50: „Con cherel i voia mânre Dadeschi, cai silo ando cerii, codo si manghe phral, phei hai dei”. Chiar cana o Robert studiilas i Biblia de țâra timpo, o spirito sfânto ajutisardea-les te del răspunso codole pușimaste hai vi ca aver pușimata savende ci ajucărdea-pe. O ilo le Iehovasco barilo cana dichlea le Robertos! Hai ce but bariol o ilo le Iehovasco cana dichel că vi amen pachias-ame ande leste hai șioas mărturia pherde tromai ande situații phare.

20. So sam hotărâme te cheras? (Ioan 17:11, 15)

²⁰ Si iech binecuvântarea te cheras partea anda iech familia spiritualo iubitorii! Si amen o mai lașio Dad hai but phrala hai pheia loialo. Te na bâstras niciechdata ce cuci trebul te avel anda amende cado baro barvalimos! O Satan hai codola pherde ura cai sile pașa leste camen te covliaren amaro pachiamos ande amaro Dad cerisco hai te rimon o phanglimos mașcar amende. Tha, o Isus rughisardea-pe anda amende hai manglea le Iehovas ca lesche iacha te aven pe amari familia spiritualo caște așel chidines phangli. (Citisar Ioan 17:11, 15.) Cadea sar o Isus, te avas siguri ande amaro ilo că amaro Dad cerisco iubil-ame hai că ajutil-ame. Te avas hotărâme te bariaras amari iubirea vi mai but caring o Iehova hai amare phrala!