Papela dzra ku sungula dzra Petro 1:1-25
1 Mine Petro, mupostola wa Yesu Kriste, ni tsralela vatsrhami va nkamayana va misava leyi, lava hangalakiki a Ponto, Galatiya, Kapadokiya, Aziya ni le Betiniya, lava hlawuliwiki
2 hi ku ya hi wuswikoti bya Xikwembu Nkulukumba tlhelo Papayi bya ku tiva mintxhumu na yi nge si na yentxeka, lava xwengisiwiki hi moya. A yentxe leswo hi nkongometo wa kuva va va lava yingisetaka ni kuva va xwanyiwa hi ngati ya Yesu Kriste:
Ingiki Xikwembu Nkulukumba a nga tama a mi nyika timpswalu take letikulu ni ku zrula.
3 A ku dzrumisiwi Xikwembu Nkulukumba tlhelo Papayi wa Hosi yezru Yesu Kriste, hikusa a hi kombe timpswalu take letikulu loko a hi nyike ku pswaliwa lokumpshwa ni dumbo ledzri nga helikiki hi ku va a pfuxe Yesu Kriste a ku feni,
4 ku yentxela leswaku hi kuma pfindla ledzri kalaka dzri nga boli, ledzri xwengiki nakone dzri taka tsrhama hi lani ku nga helikiki. A pfindla ledzro mi bekeliwe dzrone a matilweni,
5 n’wine Xikwembu Nkulukumba a mi sizrelelaka hi ntamu wake hi mhaka ya leswi mi nga ni lipfumelo. Xikwembu Nkulukumba a mi sizrelela akuva mi kuma huluku ledzri taka paluxiwa a nkameni wa wugamu.
6 Hi mhaka ya leswo, ma nyonxa ngopfu swinene nambileswi ku dzringana nkamanyana mi nga ha kumanaka ni swikazratu swa ku siyanasiyana,
7 akuva a lipfumelo dzrenu ledzri dzringiwiki, nakone dzri nga dzra lisima ngopfu swinene ku tlula woru ledzri nambiloko dzri khalutisiwe ndzrilweni dzri helaka, dzri nga mi yentxa mi dzrumisiwa, mi phatimisiwa, ni ku hloniphiwa a ku humeleleni ka Yesu Kriste.
8 Nambileswi mi kalaka mi ngi ngi mu vona, ma mu zrandzra. Nambileswi swoswi mi kalaka mi nga mu voni, mi kombisa lipfumelo kwake nakone mi nyonxa hi ndlela leyi kalaka yi nga tlhamuxeleki ni hi ku nyonxa loku heleliki,
9 hikusa ma tiyiseka leswaku a lipfumelo dzrenu dzri ta yentxa leswaku mi huluxiwa.*
10 A vaprofeta lava profetiki hi ta timpswalu letikulu ta Xikwembu Nkulukumba leti mi nyikiwiki tone, va vutisisile va tlhela va kambisisa ha hombe hi ta huluku ledzro.
11 Xikwembu Nkulukumba a tizrise ntamu wake* akuva a va byela na swi nga si na yentxeka leswaku Kriste a a ta xaniseka a gama a tlakuxiwa, hi leswo swi va yentxiki va tikazratela ku tiva leswi a swi ta yentxekela Kriste ni nkama lowu a swi ta yentxeka ha wone.
12 Va paluxeliwe leswaku a va ngo titizrela kambe a va tizrela n’wine, mayelanu ni leswi swoswi mi byeliwiki swone hi lava va mi zrezreliki madzrungula lamanene hi ku pfuniwa hi moya wa ku xwenga lowu zrumeliwiki hi le tilweni. A mintxhumu leyo a tintsrumi ti swi navela ngopfu ku yi twisisa.
13 Xileswo lulamiselani miyanakanyu yenu akuva mi tizra hi nkhinkhi, hlayisani wuswikoti byenu bya ku yanakanya; bekisani dumbo dzrenu ka timpswalu letikulu leti mi taka buyiseliwa tone a ku humeleleni* ka Yesu Kriste.
14 Swanga vana lava yingisetaka, mi nga pfumeli ku kongomisiwa hi ku navela ka ku biha loku a mi li na kone khale na mi nga si na tiva Xikwembu Nkulukumba,
15 kambe xwengani a mahanyeleni yenu hinkwawu, ku fana ni leswi lweyi a mi vitaniki a xwengiki,
16 hikusa ku tsraliwe leswi: “Mi fanela ku va lava xwengiki, hikusa mine ni xwengile.”
17 Nakone loko mi vitana Papayi lweyi a kalaka a nga na xihlawuhlawu loko a yavanyisa hi ku ya hi mintizro ya mun’wana ni mun’wana, hanyani hi ndlela leyi kombisaka leswaku mi txhava Xikwembu Nkulukumba ka nkamanyana lowu ma ha tsrhamaka ka misava leyi.
18 Hikusa ma swi tiva leswaku ka mahanyela yenu lawa ma kalaka ma nga pfuni ntxhumu, lawa mi ma kumiki ka vakokwana venu,* a mi ntsrhunxiwanga* hi mintxhumu leyi bolaka, prata kumbe woru.
19 Kambe mi ntsrhunxiwe hi ngati ya ku hlawuleka ya Kriste, leyi kalaka yi nga na xa ku solisa nakone yi kalaka yi nga na bati.
20 I ntiyiso leswaku a a tiviwa na misava yi nga si va kone, kambe a humeleli nkameni wa wugamu hi kola kwenu.
21 Mi ni lipfumelo ka Xikwembu Nkulukumba hi mhaka yake, yene lweyi a mu pfuxiki ka lava fiki a va a mu nyika ku phatima, xileswo vanani ni lipfumelo mi tlhela mi dumba Xikwembu Nkulukumba.
22 Kutani leswi mi yingisetaka ntiyiso mi tibasisile,* hi kola ka leswo, mi zrandzra vamakwezru hi lizrandzru ledzri kalaka dzri nga na wukanganyisi, xileswo zrandzrananani ngopfu swinene na swi sukela mbilwini.
23 Hikusa mi tlhele mi pswaliwa, ku nga li hi mbewu leyi faka,* kambe hi leyi kalaka yi nga fi, mi pswaliwe hi zritu dzra Xikwembu Nkulukumba lweyi a hanyaka nakone a tsrhamaka hi masiku ni masiku.
24 Hikusa “vhanu hinkwavu va* fana ni byanyi, a ku xonga kwavu ku fana ni swiluva swa nhova; a byanyi bya buna, ni swiluva swa wa,
25 kambe a zritu dzra Yehovha dzri tsrhama hi lani ku nga helikiki.” Nakone a “zritu” ledzri i madzrungula lamanene lawa mi zrezreliwiki wone.
Tintlhamuxelo ta le hansi
^ Kumbe: “a mahika yenu ma huluxiwa”.
^ Kumbe: “moya wa ku xwenga”.
^ Hi ku kongoma: “a ku pfuleteliweni”.
^ Kumbe: “hi ku ya hi swihena swa vakokwana venu”.
^ Hi ku kongoma: “a mi tizruliwanga”.
^ Kumbe: “mi basise mahika yenu”.
^ Ku nga mbewu leyi kotaka ku mila kumbe ku beka mihandzru.
^ Hi ku kongoma: “a nyama hinkwayu yi”.
