Papela dzra ku sungula ledzri yaka ka Vakorinte 1:1-31
1 Mine Pawulo, ni vitaneliwiki ku va mupostola wa Kriste Yesu hi ku zrandzra ka Xikwembu Nkulukumba, ni na makwezru Soxtene.
2 Ni tsralela n’wine mi nga va bandla dzra Xikwembu Nkulukumba dzra le Korinte, n’wine mi hlawuliwiki* swanga valandzreli va Kriste Yesu, mi vitaneliwiki ku va vaxwengi, kun’we ni hinkwavu lava vitanaka vito dzra Hosi yezru Yesu Kriste a mimbangwini hinkwayu, lweyi a nga Hosi yavu ni yezru:
3 Ingiki mi nga va ni timpswalu letikulu ni ku zrula leswi pfaka ka Xikwembu Nkulukumba Papayi wezru ni le ka Hosi Yesu Kriste.
4 Minkama hinkwayu ni tlangela Xikwembu Nkulukumba wanga hi mhaka ya timpswalu letikulu leti a mi kombiki tone swanga valandzreli va Kriste Yesu;
5 leswi mi nga ni wumun’we na Kriste mi yamukele mintxhumu hinkwayu, ku patsra ni wuswikoti bya ku twalisa zritu dzra Xikwembu Nkulukumba ha hombe ni ku dzri tiva ha hombe,
6 swanga hi leswi a wumboni mayelanu na Kriste byi dzimiki timitsru byi tiya a makazri kwenu,
7 ku yentxela leswaku ku nga vi na nyiko ni yin’we leyi mi yi pfumalaka, na ma ha wu lavisele swinene nkama lowu Hosi yezru Yesu Kriste a taka kombisa ntamu wake ha wone.
8 Nakone Xikwembu Nkulukumba a ta mi tiyisa ku ya tlhasa wugamu akuva ku nga vi na lweyi a mi lumbetaka a sikwini dzra Hosi yezru Yesu Kriste.
9 Xikwembu Nkulukumba lweyi a mi vitaniki akuva mi ta tizrisana* ni N’wanake Yesu Kriste Hosi yezru, awa dumbeka.
10 Kutani na mi tsratsriya vamakwezru hi vito dzra Hosi yezru Yesu Kriste, leswaku mi twanana ka leswi mi swi vulavulaka ni leswaku ku nga vi na ku yavana a xikazri kwenu, kambe mi twanana hi ku helela ka ndlela leyi mi yanakanyaka ha yone ni le ka mavonela yenu.
11 Hikusa van’we vandangu wa ka Kloye va ni byele leswaku ku ni ku phikisana a xikazri kwenu vamakwezru.
12 Ni hlaya leswo hikusa van’we venu va li: “Mine ni wa Pawulo”, van’wana va ku: “Mine ni wa Apolosi”, van’wanyana va ku: “Mine ni wa Khefasi”,* kasi van’wana va ku: “Mine ni wa Kriste”.
13 Xana Kriste e yavana? Xana i Pawulo lweyi a gongondzreliwiki mhandzrini hi mhaka yenu? Kumbe me babatisiwa hi vito dzra Pawulo?
14 Ni tlangela Xikwembu Nkulukumba hi leswi ni kalaka ni nga babatisanga mhunu makazri kwenu handle ka Krixpo na Gayu,
15 akuva ku nga vi na lweyi a hlayaka leswaku mi babatisiwe hi vito dzranga.
16 Ina, ni babatise ni vandangu wa ka Stefanasi. Kambe handle kwavu, a ni dzrimuki leswaku ni nga va ni babatise mhunu mun’wana.
17 Hikusa Kriste a nga ni zrumanga ku babatisa, kambe a ni zrume ku zrezra madzrungula lamanene; nakone a ni swi yentxi hi ku tizrisa mazritu ya vhanu lava dondzrekiki, ku yentxela leswaku a mhandzri ya nxanisa* ya Kriste yi nga voniwi na yi nga li ya ntxhumu.
18 Hikusa a dzrungula mayelanu ni mhandzri ya nxanisa* i wuphunta ka lava yaka ku suvisiweni, kambe ka hine hi nga ku huluxiweni, dzrone i ntamu wa Xikwembu Nkulukumba.
19 Hikusa ku tsraliwe leswi: “Ni ta helisa wutlhazri bya tintlhazri ni wutivi bya tintivi ni ta byi bakanya.”*
20 Yi kwini ntlhazri? A kwini mutsrali?* Kumbe yi kwini ntlhazri ya filozofiya dzra misava leyi?* Xikwembu Nkulukumba a yentxe leswaku a wutlhazri bya misava byi va wuphunta.
21 Leswi vhanu va misava leyi va dumbaka wutlhazri byavu, a va mu tivi Xikwembu Nkulukumba. Leswi hi swi zrezraka swi voneka ku li wuphunta ka van’wana, kambe hi ku tizrisa dzrungula ledzri, Xikwembu Nkulukumba a teke xiboho xa ku huluxa lava mu kholwaka. A wutlhazri bya Xikwembu Nkulukumba byi kombisiwe hi ndlela yoleyo.
22 Hikusa a Vayuda va kombela mahlolana, kasi a Vagriki va djuletela wutlhazri;
23 kambe hine hi zrezra leswaku Kriste a dlayiwile a mhandzrini. Ka Vayuda a dzrungula ledzro dzri fana ni zribye ledzri wisanaka nakone ka vamatiko i wuphunta.
24 Nambitanu, ka lava vitaniwiki, nambi va li Vayuda kumbe Vagriki, Kriste i ntamu wa Xikwembu Nkulukumba ni wutlhazri bya Xikwembu Nkulukumba.
25 A mintxhumu ya Xikwembu Nkulukumba leyi vhanu va yi vonaka na yi li wuphunta, yi tlhazrihile ku tlula vhanu, nakone a mintxhumu ya Xikwembu Nkulukumba leyi vhanu va yi vonaka yi nge na ntamu, yi ni ntamu ku tlula vhanu.
26 Vamakwezru, ma swi vona leswaku a makazri kwenu n’wine mi vitaniwiki, a hi vanyingi kwenu lava nga tintlhazri hi ku ya hi vonela dzra misava, a hi vanyingi lava nga ni ntamu, nakone a hi vanyingi lava pfaka ka mindangu ya ku ganya,
27 kambe Xikwembu Nkulukumba a hlawule mintxhumu leyi misava yi yi vonaka na yi phuntile akuva a danisa tintlhazri; nakone Xikwembu Nkulukumba a hlawule mintxhumu leyi misava yi yi vonaka yi nge na ntamu, akuva a danisa mintxhumu leyi nga ni ntamu;
28 nakone Xikwembu Nkulukumba a hlawule mintxhumu ya misava leyi kalaka yi nga nyawuli nakone yi voneliwaka hansi, mintxhumu leyi voniwaka yi nga li ya ntxhumu, akuva a helisa mintxhumu leyi tikombaka yi li ya lisima,
29 akuva ku nga vi na lweyi a* tikulisaka a mahlweni ka Xikwembu Nkulukumba.
30 Kambe Xikwembu Nkulukumba hi yene a yentxiki leswaku mi va ni wumun’we na Kriste Yesu, lweyi kwezru a viki wutlhazri bya Xikwembu Nkulukumba, wululami, ku xwengisiwa ni ku huluxiwa hi xitizrulo,
31 ku yentxela leswaku swi va hi lani Matsralwa ma hlayaka ha kone ma ku: “Lweyi a tikhuzaka a a tikhuzi ha Yehovha.”
Tintlhamuxelo ta le hansi
^ Hi ku kongoma: “mi xwengisiwiki”.
^ Kumbe: “mi va ni wumun’we”.
^ Lweyi a tlhelaka a vitaniwa Petro.
^ Vona Ntlhamuxelo Wa Mazritu.
^ Vona Ntlhamuxelo Wa Mazritu.
^ Kumbe: “ni ta byi tsrhindzreta tlhelweni”.
^ Ku hlayiwa ntivi ya Nawu.
^ Kumbe: “xiyimu lexi xa misava; nguva leyi”. Vona Ntlhamuxelo Wa Mazritu.
^ Hi ku kongoma: “akuva ku nga vi na nyama leyi yi”.
