Papela dzra ku sungula ledzri yaka ka Vakorinte 12:1-31
12 Vamakwezru, ni djula leswaku mi ti twisisa ha hombe tinyiko ta moya wa ku xwenga.
2 Ma swi tiva leswaku na ma ha li vhanu va matiko,* a mi hlohloteliwa ni ku hambukisiwa hi swithombe leswi ni ku vulavula swi kalaka swi nga vulavuli, a mi swi landzrelela kun’wana ni kun’wana lomu a swi mi yisa kone.
3 Kutani ni djula mi swi tiva leswaku a ku na mhunu lweyi loko a vulavula na a li leswaku o kongomisiwa hi moya wa Xikwembu Nkulukumba, a nga hlayaka a ku: “Yesu a zrukiwile!” nakone a nga kone lweyi a nga hlayaka a ku: “Yesu i Hosi!” na a nga kongomisiwi hi moya wa ku xwenga.
4 Ku ni tinyiko ta moya ta ku siyanasiyana, kambe hinkwatu ti nyikeliwa hi moya wolowu wa wun’we;
5 ku ni tindlela ta ku siyanasiyana ta ku tizrela, kambe hi tizrela Hosi yoleyi ya yin’we;
6 nakone ku ni mintizro ya ku siyanasiyana, kambe i Xikwembu Nkulukumba yelweyi wa mun’we lweyi a nyikaka mun’wana ni mun’wana ntamu wa ku wu yentxa.
7 Kambe leswi moya wa ku xwenga wu pfunaka mun’wana ni mun’wana akuva a swi yentxa swa voneka nakone Xikwembu Nkulukumba a wu nyika mun’wana ni mun’wana akuva ku pfuneka van’wana.
8 Hikusa a moya, mun’we wu mu nyika wuswikoti bya ku vulavula hi wutlhazri, a moya wolowu wa wun’we mun’wana wu mu nyika wuswikoti bya ku vulavula mintxhumu leyi van’wana va kalaka va nga yi tivi,
9 mun’wana wu mu nyika lipfumelo, mun’wana wu mu nyika wuswikoti bya ku hanyisa,*
10 kambe mun’wana wu mu nyika ntamu wa ku yentxa mahlolana, mun’wana wu mu nyika wuswikoti bya ku profeta, mun’wana wu mu nyika wuswikoti bya ku kambela leswaku madzrungula ya kukazri ma nga va ma pfa ka Xikwembu Nkulukumba kumbe im-him, mun’wana wu mu nyika wuswikoti bya ku vulavula tindzrimi ta ku siyanasiyana, nakasi mun’wana wu mu nyika wuswikoti bya ku ndzrulutela leswi hlayiwiki hi tindzrimi tin’wana.
11 Kambe hinkwaswu leswo swi yentxiwa hi moya wolowu wa wun’we, wu yavela mun’wana ni mun’wana hi ku ya hi leswi wu swi zrandzrisaka xiswone.
12 Hikusa ku fana ni leswi mizri wu nga wun’we kambe wu nga ni swizro swinyingi, nakone a swizro hinkwaswu swi lumbaka mizri wolowu wa wun’we, nambileswi swi nga swinyingi, na yene Kriste swi xitasu.
13 Hikusa hinkwezru hi babatisiwe hi moya wun’we akuva hi va mizri wun’we, swi nge na mhaka leswaku hi Vayuda kumbe hi Vagriki, hi swikazrawa kumbe hi ntsrhunxiwile, hinkwezru hi yamukele moya wun’we.*
14 Hikusa nakunene a mizri a wu na xizro xin’we kambe wu ni swizro swinyingi.
15 Loko a nkondzro a wo hlaya leswi: “Leswi ni nga liki voko, a ni hambi xiyenge xa mizri”, leswo a swi nge ti wu yentxa wu nga vi xiyenge xa mizri.
16 Ni loko ndleve a yo hlaya leswi: “Leswi ni nga liki tihlo, a ni hambi xiyenge xa mizri”, leswo a swi nge ti yi yentxa yi nga vi xiyenge xa mizri.
17 Loko mizri hinkwawu a wo va tihlo, a mhunu a a ta yingelisa kuyini? Loko a mizri hinkwawu a wo va ndleve, a mhunu a a ta swi kotisa kuyini ku nun’hwetela?
18 Kambe Xikwembu Nkulukumba a beke xizro xin’wana ni xin’wana xa mizri xileswi a swi djulisiki xiswone.
19 Loko a swizro hinkwaswu a swo fana, a mizri a wu ta va kwini?
20 Xileswo, ku ni swizro swinyingi kambe a mizri i wun’we.
21 A tihlo a dzri nge dzri byeli voko dzri ku: “A ni ku vileli”, na yone nhloko a yi nge yi byeli minkondzro yi ku: “A ni mi vileli.”
22 Ku hambana ni leswo, a swizro swa mizri leswi swi tikombaka na swi nga li swa ntxhumu swa vileleka,
23 ni swizro swa mizri leswi hi yanakanyaka leswaku a swi na lisima ngopfu, hi swone leswi hi swi funeketaka ha hombe, xileswo a swizro swa mizri wezru leswi kalaka swi nga fanelanga ku voniwa, hi swi bekela xitxhavu lexikulu,
24 kambe a swizro swa mizri leswi nga swa lisima a swi swi vileli leswo. Nambitanu, Xikwembu Nkulukumba a vumbe mizri hi ndlela yoleyo, akuva swizro leswi vilelaka ku bekeliwa xitxhavu, swi bekeliwa xitxhavu ngopfu swinene,
25 a yentxe leswo akuva mizri wu nga vi na ku yavana kambe a swizro hinkwaswu swi va leswi zron’wekelanaka.
26 Loko xizro xin’we xi xaniseka,* a swizro leswin’wana hinkwaswu swi xaniseka na xone; ni loko xizro xin’we xi twalisiwa, a swizro leswin’wana hinkwaswu swi nyonxa na xone.
27 Kutani n’wine mi mizri wa Kriste, nakone mun’wana ni mun’wana wenu i xizro xa mizri wolowo.
28 Xikwembu Nkulukumba a beke swizro swa ku siyanasiyana a bandleni: Va ku sungula i vapostola; va wubidzri i vaprofeta; va wuzrazru i vadondzrisi; ku landzrela lava yentxaka mahlolana; ntsrhaku kwavu ku landzrela lava nga ni wuswikoti bya ku hanyisa;* ntsrhaku ku landzrela lava pfunaka van’wana; ntsrhaku ku landzrela lava nga ni tinyiko ta ku kongomisa; ni lava va nga ni nyiko ya ku vulavula tindzrimi ta ku siyanasiyana.
29 A hi hinkwavu va nga vapostola, a hi swone ke? A hi hinkwavu va nga vaprofeta, a hi swone ke? A hi hinkwavu va nga vadondzrisi, a hi swone ke? A hi hinkwavu va yentxaka mahlolana, a hi swone ke?
30 A hi hinkwavu va nga ni wuswikoti bya ku hanyisa, a hi swone ke? A hi hinkwavu va vulavulaka tindzrimi ta ku siyanasiyana, a hi swone ke? A hi hinkwavu va swi kotaka ku ndzrulutela leswi hlayiwiki hi tindzrimi tin’wana, a hi swone ke?
31 Kambe tamani mi tikazratela ku yamukela tinyiko letikulu. Nambitanu na ha ta mi komba ntxhumu wa ku yampswa ku tlula mintxhumu leyo hinkwayu.
Tintlhamuxelo ta le hansi
^ Leswi liki, na mi nga si va vapfumeli.
^ Hi ku kongoma: “tinyiko ta ku hanyisa”.
^ Kumbe: “hi nwisiwe moya wun’we”.
^ Kumbe: “xi vavisiwa”.
^ Kumbe: “lava nga ni tinyiko ta ku hanyisa”.
