Papela dzra ku sungula ledzri yaka ka Vakorinte 13:1-13
-
A lizrandzru dzri tlula hinkwaswu (1-13)
13 Nambi ni ngo vulavula tindzrimi ta vhanu ni ta tintsrumi kambe na ni nga na lizrandzru, ni fana ni xingerengere kumbe nsimbi leyi baka pongwe.
2 Nakone nambi ni ngo va ni nyiko ya ku profeta ni ya ku twisisa swihundla hinkwaswu swa ku xwenga ni tlhela ni va ni wutivi hinkwabyu, ni loko ni ngo va ni lipfumelo dzra dzrikulu lakakuva ni kota ni ku susumeta* ni tinhava, kambe na ni nga na lizrandzru, a ni ntxhumu.*
3 Nakone nambi ni ngo xavisa a mintxhumu yanga hinkwayu akuva ni disa van’wana, kumbe ni nyikela mizri wanga hi ku djula ku tikhuza, kambe na ni nga na lizrandzru, a ni pfuneki hi ntxhumu nikutsrongo.
4 A lizrandzru dzri lehisa mbilu nakone dzri ni wunene. A lizrandzru a dzri na wukwele. A dzri tibyeli, a dzri tikukumuxi,
5 a dzri yentxi leswi nga liki swinene,* a dzri djuleteli leswi pfunaka dzrone ntsena, a dzri hantli dzri hlundzruka. A dzri khomeleli ka mintxhumu ya ku biha leyi dzri yentxeliwiki yone.
6 A dzri nyonxi hi leswi kalaka swi nga lulamanga, kambe dzri nyonxa hi ntiyiso.
7 Dzri gwenta mintxhumu hinkwayu, dzri kholwa mintxhumu hinkwayu, dzri dumba mintxhumu hinkwayu, dzri tiyiselela mintxhumu hinkwayu.
8 A lizrandzru a dzri heli.* Kambe a nyiko ya ku profeta yi ta hela; a nyiko ya ku vulavula tindzrimi* yi ta hela; nambi wutivi byi ta hela.
9 Hikusa a hi na wutivi bya ku helela nakone a hi profeti hi ku helela,
10 kambe loko leswi heleliki swi tlhasa, leswi kalaka swi nga helelanga swi ta helisiwa.
11 Loko na ha li ntsrongwana a ni talisa ku vulavula ku fana ni ntsrongwana, ni pimisa ku fana ni ntsrongwana ni tlhela ni yanakanyisisa ku fana ni ntsrongwana; kambe swoswi ni kuliki ni tsrhike ku yentxa mintxhumu ya wutsrongwana.
12 Hikusa swoswi a hi voni ha hombe,* swi fana ni loko hi tivona hi xipelhu xa nsimbi, kambe hi ta gama hi vona ha hombe. Swoswi a ni na wutivi lebyi heleliki, kambe ni ta gama ni va na byone, hi lani Xikwembu Nkulukumba a ni tivaka ha kone.
13 Nambitanu swoswi ku sala leswizrazru: lipfumelo, ku lavisela ni lizrandzru; kambe lexikulu ngopfu ka leswizrazru i lizrandzru.
Tintlhamuxelo ta le hansi
^ Kumbe: “ku tsruvula”.
^ Kumbe: “a ni pfuni ntxhumu”.
^ Kumbe: “leswi danisaka van’wana”.
^ Kumbe: “a dzri hluleki”.
^ Ku hlayiwa hlolana dzra ku vulavula tindzrimi timbeni.
^ Kumbe: “hi ni limphume”.
