Papela dzra ku sungula ledzri yaka ka Vakorinte 16:1-24
16 Mayelanu ni swihanano leswi yaka ka vaxwengi, landzrelani minkongomiso leyi ni yi nyikeliki ka mabandla ya le Galatiya.
2 Hi siku dzra ku sungula dzra vhiki dzrin’wana ni dzrin’wana, mun’wana ni mun’wana wenu a fanela ku tibekela xa kukazri hi tlhelo hi ku ya hi leswi a nga na swone, akuva swihanano swi nga humesiwi loko kutani ni tlhasile.
3 Kambe loko ni tlhasa halanu, ni ta zrumela vavanuna lava ka mapapela yenu mi hlayaka leswaku ma va dumba akuva va heleketa swihanano swenu swa ku tizrandzrela a Yerusalema.
4 Nambitanu, loko swi fanela ku va na mine ni famba, ni ta famba na vone.
5 Kambe ni ta ta halanu kwenu loko ni ta va ni khalutile hi le Makedoniya, hikusa ni kunguhata ku khaluta hi le Makedoniya;
6 nakone swi nga yentxeka ni ta tsrhama nkama wa kukazri na n’wine, kumbexana ku za ku hela wuxika akuva mi ta gama mi ni heleketanyana lomu ni taka ya kone.
7 Hikusa a ni naveli ku mi vona swa nkamanyana, ni djula ku tsrhama nkama wa kukazri na n’wine, loko Yehovha a swi zrandzra.
8 Kambe ni ta tama ni tsrhama lani Efesa ku ko ku tlhasa nkhuvu wa Pentekoxta,
9 hikusa ni pfuleliwe mukhandlu lowukulu* wa ku yentxa mintizro yinyingi, nambitanu ku ni vakaneti vanyingi.
10 Kutani loko Timotewu a tlhasa, mu yentxani a titwa na a yamukeleka, mi tlhela mi tizrisana na yene akuva ku nga vi na lexi mu kazrataka loko a li na n’wine, hikusa a yentxa ntizro wa Yehovha, ku fana na mine.
11 Xileswo, ku nga vi na lweyi a mu dzrelaka. Mu heleketani hi ku zrula akuva a ta halenu kwanga, hikusa mine ni vamakwezru hi mu yimelile.
12 Ni kombele makwezru Apolosi leswaku a ta halanu kwenu ni vamakwezru van’wana. A a nga tiyimiselanga ku ta swoswi, kambe a ta ta loko a pfulekeliwa hi mukhandlu.
13 Tsrhamani na mi pfukile,* tiyani a lipfumelweni, vanani ni xixixi,* mi va ni ntamu.
14 Hinkwaswu leswi mi swi yentxaka swi yentxani hi lizrandzru.
15 Vamakwezru, ma swi tiva leswaku vandangu wa Stefanasi hi vone va viki vapfumeli va ku sungula a Akaya nakone va tinyiketele ka ku tizrela vaxwengi, kutani ni mi tsratsriya leswi:
16 Tibekani hansi ka vhanu va ku fana na vone ni ka hinkwavu lava hlengelaka ka ntizro lowu nakone va tizraka hi nkhinkhi.
17 Kambe na nyonxa hi leswi Stefanasi, Fortunatu na Akayiko va nga na mine halenu, hikusa va ni yentxele leswi a mi ta ni yentxela swone loko a mi li halenu.
18 Va ni tiyise ngopfu va tlhela va tiyisa na n’wine.* Xileswo, va nyikani lisima vavanuna va ku fana ni lava.
19 A mabandla ya le Aziya ma mi dzrungula. Akila na Prixka* kun’we ni bandla ledzri tlhanganaka kaya kwavu va mi dzrungula hi mbilu hinkwayu a Hosini.
20 Vamakwezru hinkwavu va mi dzrungula. Losananani hi ku n’quntana ka ku xwenga.
21 Mine Pawulo na mi dzrungula, leswi ni swi tsrala hi voko dzranga.
22 Lweyi a kalaka a nga yi zrandzri Hosi, a a zrukiwe.* Tana Hosi yezru!
23 Ingiki a timpswalu letikulu ta Hosi Yesu ti nga va na n’wine.
24 Hinkwenu n’wine mi nga ni wumun’we na Kriste Yesu ni mi zrumela lizrandzru dzranga.
Tintlhamuxelo ta le hansi
^ Hi ku kongoma: “xipfalu lexikulu”.
^ Kumbe: “Tsrhamani na mi hiteka”.
^ Kumbe: “yanani mahlweni mi famba ku kota vavanuna”.
^ Kumbe: “Va zrulise moya wanga ni wenu”.
^ Lweyi a tlhelaka a tiviwa hi vito dzra ku Prisila.
^ Kumbe: “a a khatisiwe”.
