Papela dzra ku sungula ledzri yaka ka Vakorinte 3:1-23
3 Xileswo vamakwezru, a ni swi kotanga ku vulavula na n’wine ku fana ni loko ni vulavula ni vhanu lava kongomisiwaka hi moya wa Xikwembu Nkulukumba,* kambe ni vulavule na n’wine ku fana ni loko ni vulavula ni vhanu lava kongomisiwaka hi miyanakanyu ya vhanu,* lava fanaka ni vatsrongwana ka Kriste.
2 Ni mi wundle hi mafi ku nga li hi swakuda leswi tiyiki, hikusa a mi nga si na swi kota ku da swakuda leswi tiyiki.* Nakunene ni swoswi a mi si na swi kota,
3 hikusa ma ha kongomisiwa hi mayanakanyela ya vhanu.* Leswi ma ha liki ni wukwele nakone mi holovisanaka, leswo swi kombisa leswaku mi ni mahanyela ya vhanu va misava leyi.
4 Hikusa loko mun’we a ku: “Mine ni wa Pawulo”, kambe mun’wana a ku: “Mine ni wa Apolosi”, xana a mo hanya ku fana ni vhanu va misava leyi?
5 Kasi Apolosi o va mani? Na ye Pawulo o va mani? Hine ho va malandzra ntsena, lama yentxaka ntizro lowu Hosi yi hi nyikiki wone, lama mi pfuniki kuva mi va vapfumeli.
6 Mine ni byalile, Apolosi a txheletela, kambe Xikwembu Nkulukumba hi yene a swi kulisiki,
7 xileswo lweyi a byalaka ni lweyi a txheletelaka a hi va lisima, kambe a wa lisima i Xikwembu Nkulukumba lweyi a swi kulisaka.
8 Lweyi a byalaka ni lweyi a txheletelaka va ni nkongometo wun’we,* kambe mun’wana ni mun’wana a ta yamukela hakelo dzrake hi ku ya hi ntizro wake.
9 Hikusa hine hi vatizrikulobye na Xikwembu Nkulukumba. N’wine mi nsimu leyi dzrimiwaka hi Xikwembu Nkulukumba, muyaku lowu yakiwaka hi Xikwembu Nkulukumba.
10 Hi kola ka timpswalu letikulu leti Xikwembu Nkulukumba a ni kombiki tone, ni beke masungulo ku fana ni muyaki lweyi a nga ni wuswikoti,* nambitanu ku ni mhunu mun’wana lweyi a yakaka henhla ka wone. Kambe mun’wana ni mun’wana a a tsrhamele ku xiyisisa ndlela leyi a yakaka ha yone henhla ka wone.
11 Hikusa a nga kone lweyi a nga bekaka masungulo man’wana handle ka lawa ma bekiwiki, ku nga Yesu Kriste.
12 A mhunu a nga ha yaka henhla ka masungulo hi woru, prata, mazribye ya lisima, timhandzri, byanyi kumbe nhlanga,
13 kambe a ntizro lowu mun’wana ni mun’wana a wu yentxiki, wu ta kambeliwa loko siku dzri tlhasa, wu ta kambeliwa hi ku tizrisa ndzrilo, akuva ku voniwa leswaku a ntizro lowu mun’wana ni mun’wana a wu yentxiki i wunene kumbe a hi wunene.
14 Loko ndzrilo wu nga swi hisi leswi mhunu a swi yakiki henhla ka masungulo, mhunu yelweyo a ta tovokisiwa;
15 loko ndzrilo wu swi hisa, a ta luzekeliwa, kambe yene a ta huluxiwa; nambitanu a ta fana ni mhunu lweyi a hulukiki ndzrilweni.
16 Xana a mi swi tivi leswaku n’wine mi tempele dzra Xikwembu Nkulukumba ni leswaku a moya wa Xikwembu Nkulukumba wu tsrhama kwenu?
17 Loko mhunu a hohlota tempele dzra Xikwembu Nkulukumba, Xikwembu Nkulukumba a ta mu helisa mhunu lweyo; hikusa tempele dzra Xikwembu Nkulukumba dzri xwengile nakone hi ye n’wine tempele ledzro.
18 Ku nga vi na lweyi a tikanganyisaka: Loko mun’we kwenu a pimisa leswaku a tlhazrihile ka misava leyi,* a a ve ximphunta akuva a va lweyi a tlhazrihiki.
19 Hikusa a wutlhazri bya misava leyi i wuphunta ka Xikwembu Nkulukumba, hi lani Matsralwa ma hlayaka ha kone ma ku: “A phasa tintlhazri hi mintlhamu ya tone.”
20 Ma tlhela ma ku: “Yehovha awa swi tiva leswaku a miyanakanyu ya tintlhazri a yi pfuni ntxhumu.”
21 Xileswo ku nga vi na lweyi a tikhuzaka hi leswi vhanu va nga swi yentxaka; hikusa mintxhumu hinkwayu ya mi lumba,
22 nambi ku li Pawulo kumbe Apolosi kumbe Khefasi* kumbe misava kumbe wutomi kumbe lifu kumbe mintxhumu leyi nga kone swoswi, kumbe mintxhumu leya ha taka, hinkwaswu swi lumba n’wine;
23 n’wine mi lumba Kriste; kasi Kriste yene a lumba Xikwembu Nkulukumba.
Tintlhamuxelo ta le hansi
^ Hi ku kongoma: “vhanu va moya”.
^ Hi ku kongoma: “ni vhanu va nyama”.
^ Hi ku kongoma: “a mi nga si na tiyela hi lani ku dzringaniki”.
^ Hi ku kongoma: “ma ha li va nyama”.
^ Hi ku kongoma: “i van’we”.
^ Kumbe: “mextri lweyi a nga ni wutlhazri”.
^ Kumbe: “xiyimu lexi xa misava; nguva leyi”. Vona Ntlhamuxelo Wa Mazritu.
^ Lweyi a tlhelaka a vitaniwa Petro.
