Papela dzra ku sungula ledzri yaka ka Vakorinte 4:1-21
4 A vhanu va fanela ku hi vona swanga malandzra ya Kriste lama tamelisiwiki swihundla swa ku xwenga swa Xikwembu Nkulukumba.
2 Lexi yimeliwaka ka malandzra i kuva ma dumbeka.
3 Kwanga a hi swa lisima ku kambeliwa hi n’wine kumbe ku kambeliwa hi tribunali dzra vhanu. Phela nambi mine a ni tikambeli.
4 Hikusa a ni tivoni na ni hone ntxhumu, kambe leswo a swi hlayi swone leswaku ni lulamile. Yehovha hi yene a ni kambelaka.*
5 Xileswo mi nga yavanyisi ntxhumu na nkama wa kone wu nga si na tlhasa, loko Hosi yi tlhasa yi ta yentxa leswaku a mintxhumu ya ku xwenga leyi nga munyameni yi ta livaningwini, nakone yi ta paluxa leswi nga timbilwini ta vhanu, kutani Xikwembu Nkulukumba a ta nyika mhunu mun’wana ni mun’wana lidzrumu ledzri fanelaka mhunu yelweyo.
6 Vamakwezru, ka leswi ni mi tsraleliki swone ni vulavule hi mine na Apolosi leswaku mi pfuneka, akuva hi ku vona xikombiso xezru mi dondzra nawu lowu liki: “Mi nga tluli leswi tsraliwiki”, ku yentxela leswaku mi nga tikulisi mi zrandzra mun’we mi nyenya mun’wana.
7 Hikusa i mani lweyi a ku yentxaka u va lweyi a hambaniki ni van’wana? Kone i yini lexi u nga na xone lexi u kalaka u nga nyikiwanga? Loko a li leswaku we nyikiwa, ha yini u tikulisa ingiki a we nyikiwa?
8 Xana mi yanakanya leswaku kutani mi ni hinkwaswu leswi mi swi vilelaka? Xana mi yanakanya leswaku kutani mi ganyile? Xana mi yanakanya leswaku mi sungule ku fuma na mi nga li na hine? A ni ta nyonxa loko a me sungula ku fuma hikusa na hine a hi ta va hi li tihosi kun’we na n’wine.
9 Hikusa ni vona leswaku Xikwembu Nkulukumba a yentxe leswaku hine vapostola hi va ntlawa wa wugamu lowu taka nghena xtadiyu akuva wu voniwa hi hinkwavu, swanga lava yavanyiseliwiki lifu, hikusa hi fana ni vhanu lava hambaka teyatru na va voniwa hi misava, tintsrumi ni vhanu.
10 Hine hi voniwa hi li swiphunta hi mhaka ya leswi hi landzrelaka Kriste, kambe n’wine mi yanakanya leswaku mi tlhazrihile hi mhaka ya leswi mi landzrelaka Kriste. Hine hi tikomba hi tsranile, kambe n’wine mi tikomba mi tiyile; n’wine ma dzrumisiwa, kambe hine hi voneliwa hansi.
11 Ku ta ta tlhasa swoswi hi tama hi va ni ndlala ni tozra, hi pfumala mpahla,* ha biwa,* a hi na ka ku tsrhama kone,
12 nakone ha tikazrata hi tizra hi mavoko yezru. Loko vhanu va hi zruka hine ha va katekisa; loko hi xanisiwa ha tiyisela hi ku lehisa mbilu;
13 loko hi lumbetiwa hi va hlamula hi ku zrula;* hi voniwa na hi li nsila ya misava, mbangu wa ku txukumeta nsila ya mixaka hinkwayu, ku ta ta tlhasa swoswi.
14 A ni mi tsraleli mintxhumu leyi akuva ni mi danisa, kambe ni mi tsralela akuva ni mi dondzrisa swanga vananga lava zrandzrekaka.
15 Hikusa nambiloko mi ni 10.000 wa vadondzrisi lava va mi dondzrisaka ndlela ya ku landzrela Kriste, a mi na vapapayi va vanyingi; hikusa hi mine ni nga papayi wenu lweyi a mi dondzrisaka madzrungula lamanene ni ndlela ya ku landzrela Kriste.
16 Xileswo na mi tsratsriya, ni yetiselani.
17 Hi leswo swi ni yentxaka ni mi zrumelela Timotewu, hikusa yene i n’wananga lweyi a zrandzrekaka nakone a dumbekaka Hosini. Yene a ta mi dzrimuxa leswi ni yi yentxisaka xiswone mintxhumu* a ntizrweni wa Kriste Yesu, a ta mi dzrimuxa leswi ni dondzrisaka swone a mimbangwini hinkwayu, a mabandleni hinkwawu.
18 Van’we venu va tikulisa, ingiki hi loko ni to kala ni nga ha tlheli ni mi yendzrela.
19 Kambe loko Yehovha a swi zrandzra, ni ta mi yendzrela ku nga li khale, na ni nga teli ku ta ta tiva leswi vhanu volavo va ku tikulisa va swi hlayaka, kambe ni tela ku ta ta tiva ntamu wavu.
20 Hikusa lexi kombisaka leswaku ha wu yingiseta Mfumu wa Xikwembu Nkulukumba, a hi leswi hi swi hlayaka kambe hi leswi hi swi yentxaka. Leswo swi kombisa leswaku hi na wone ntamu wa Xikwembu Nkulukumba.
21 Mi hlawula yini? Kuva ni mi tela na ni ni nkhavi kumbe ni ta hi lizrandzru ni hi moya wa ku zrula?
Tintlhamuxelo ta le hansi
^ Kumbe: “a ni yavanyisaka”.
^ Hi ku kongoma: “a hi yambalanga”.
^ Kumbe: “ha xanisiwa”.
^ Hi ku kongoma: “ha va tsratsriya”.
^ Hi ku kongoma: “tindlela tanga”.
