Papela dzra ku sungula ledzri yaka ka Vakorinte 6:1-20
6 Loko u ni mhaka leyi u holovisanaka ni mun’wana ha yone, ha yini u tiya ku ya tribunali ka vhanu lava kalaka va nga yi landzri milawu ya Xikwembu Nkulukumba, u tsrhika ku ya ka vaxwengi?
2 Kumbe mo kala mi nga swi tivi leswaku a vaxwengi va ta yavanyisa misava? Nakone loko a li leswaku a misava yi ta yavanyisiwa ha n’wine, mi nga hlula ha yini ku lulamisa timhaka leti nga nyawulikiki?
3 Mo kala mi nga swi tivi leswaku hi ta yavanyisa tintsrumi? Kutani ha yini hi nga lulamisi timhaka leti nga nyawulikiki ta wutomi lebyi?
4 Loko mi ni timhaka ta kukazri ta wutomi lebyi mi djulaka ku ti lulamisa, ha yini mi ti yisa ka vhanu lava nga hambikiki xiyenge xa bandla akuva va ya ti yavanyisa?
5 Leswo ni swi hlayela akuva ni mi yentxa mi va ni tingana. Ko kala ku nga na mhunu lweyi a nga ni wutlhazri makazri kwenu bya kuva a kota ku yavanyisa timhaka ta vamakwavu?
6 Kambe ku hambana ni leswo, a makwavu a ya mangalela makwavu ka vhanu lava nga liki vapfumeli!
7 Nakunene loko mi teka timhaka tenu mi ti yisa tribunali, mi va na mo tidanisa. Ha yini mi nga tiyiseli loko vamakwenu va mi yentxela swa ku biha? A swi nge ti yampswa mi pfumela ku kanganyisiwa?
8 A matsrhan’wini ya leswo, ma hona mi tlhela mi kanganyisa vamakwenu a mhakeni leyo!
9 Kumbe mo kala mi nga swi tivi leswaku vhanu lava kalaka va nga lulamanga a va nge ti da pfindla dzra Mfumu wa Xikwembu Nkulukumba? Mi nga kanganyisiwi. Lava yentxaka swa tingana hi tlhelo dzra tinkuku,* vagandzreli va swikwembu swa madzrimi, vhanu lava yentxaka wumbuye, vavanuna lava tiyentxaka vavasati, vavanuna lava yetlelaka ni vavanunakulobye,*
10 vayivi, vhanu va makwanga, timpopswi, vazruketeli ni lava va wutlaka swa van’wana, a va nge ti da pfindla dzra Mfumu wa Xikwembu Nkulukumba.
11 Nambitanu, leswo hi leswi van’we venu a mi li swone. Kambe mi hlampswiwe mi basa; mi yentxiwe lava xwengiki; mi voniwe mi li lava lulamiki hi kola ka vito dzra Hosi Yesu Kriste ni hi moya wa Xikwembu Nkulukumba.
12 Mintxhumu hinkwayu ya pfumeleleka kwanga, kambe a hi mintxhumu hinkwayu yi pfunaka. Mintxhumu hinkwayu ya pfumeleleka kwanga, kambe a xi kone lexi ni taka xi pfumelela xi ni kongomisa.*
13 A swakuda i swa khuzri, a khuzri i dzra swakuda, kambe ha swibidzri Xikwembu Nkulukumba a ta swi helisa. A mizri a wu hambeliwanga ku yentxa swa tingana hi tlhelo dzra tinkuku,* kambe wu hambeliwe ku yentxa ntizro wa Hosi, nakone a Hosi ya wu hlayisa.
14 Kambe Xikwembu Nkulukumba a pfuxe Hosi nakone na hine a ta hi pfuxa ku feni hi ku tizrisa ntamu wake.
15 Mo kala mi nga swi tivi leswaku a mizri wenu i swizro swa Kriste? Xana a swi ta va swinene kuva ni teka swizro swa Kriste ni swi patsra ni nghwavana? A swi nge ti va swinene nikutsrongo!
16 Xana a mi swi tivi leswaku lweyi a patsriwaka ni nghwavana i nyama yin’we na yone? Hikusa Xikwembu Nkulukumba a li: “Lavabidzri va ta va nyama yin’we.”
17 Kambe lweyi a patsriwiki ni Hosi, a tlhanganisiwe na yone hi le moyeni.
18 Tsrutsrumani swiyentxo swa tingana hi tlhelo dzra tinkuku!* Xidoho xin’wana ni xin’wana lexi mhunu a nga ha xi yentxaka xi le handle ka mizri wake, kambe lweyi a yentxaka swa tingana hi tlhelo dzra tinkuku a dohela mizri wake.
19 A mi swi tivi leswaku a mizri wenu i tempele dzra moya wa ku xwenga lowu nga ndzreni kwenu lowu Xikwembu Nkulukumba a mi nyikiki wone? Futsrhi a mi tilumbi,
20 hikusa Xikwembu Nkulukumba a mi xave hi ku dula. Xileswo, tizrisani mizri wenu akuva mi mu dzrumisa.
Tintlhamuxelo ta le hansi
^ Vona Ntlhamuxelo Wa Mazritu: “Swiyentxo swa tingana hi tlhelo dzra tinkuku”.
^ Kumbe: “vavanuna lava yentxaka swa tinkuku ni vavanunakulobye; vasodoma”.
^ Kumbe: “xi ni fuma”.
^ Hi Xigriki: porneía. Vona Ntlhamuxelo Wa Mazritu.
^ Hi Xigriki: porneía. Vona Ntlhamuxelo Wa Mazritu.
