Papela dzra ku sungula ledzri yaka ka Vakorinte 7:1-40
7 Kutani mayelanu ni leswi mi ni tsraleliki swone, swa yampswa kuva wanuna a nga mu khumbi* wansati;
2 kambe leswi swiyentxo swa tingana hi tlhelo dzra tinkuku* swi taliki ngopfu, wanuna mun’wana ni mun’wana a a ve ni nsati wake ni wansati mun’wana ni mun’wana a a ve ni nuna wake.
3 A nuna a a nyiki nsati wake leswi swi mu fanelaka, na yene nsati a a yentxi hi lani ku fanaka ka nuna wake.
4 A nsati a hi yene a fumaka mizri wake kambe wu fumiwa hi nuna wake; hi lani ku fanaka, a nuna a hi yene a fumaka mizri wake kambe wu fumiwa hi nsati wake.
5 Mi nga tsronani, handle ka loko mi pfumelelani ku swi yentxisa xiswoswo ku dzringana nkama wa kukazri, akuva mi tinyika nkama wa ku khongota mi ta tlhela mi kumana, ku yentxela leswaku Sathana a nga mi dzringi hi kola ka ku pfumala kwenu ku tikhoma.
6 Leswi ni swi hlayaka mi nga swi yentxa, kambe a hi leswaku o va nawu.
7 Kambe a ni navela leswaku vavanuna hinkwavu va fana na mine. Nambitanu, mun’wana ni mun’wana a ni nyiko yake leyi a yi kumiki ka Xikwembu Nkulukumba, hi leswo swi yentxaka van’we va txhata van’wana va nga txhati.
8 Swoswi ni byela lava kalaka va nga txhatanga ni lava feliwiki hi vanuna leswaku swa yampswa va tsrhamisa xiswoswo va fana na mine.
9 Kambe loko va hluleka ku tikhoma a va txhati, hikusa swa yampswa ku txhata ku tlula ku pshwa hi ku navela.
10 Lava txhatiki ni va nyika swileleto leswi: Wansati a nga fanelanga a hambana ni nuna wake, leswo a ku hlayi mine, ku hlaya Hosi.
11 Kambe loko a hambana na yene, a a tsrhami na a nga txhatanga kumbe a tlhelelana ni nuna wake; na yene wanuna a nga fanelanga a tsrhika nsati wake.
12 Kambe van’wana, mine, ku nge Hosi, ni va byela leswi: Loko makwezru a ni nsati lweyi a kalaka a nga li mupfumeli nakone nsati yelweyo a tiyimisela ku tsrhama na yene, a nga mu tsrhiki;
13 nakone loko wansati a ni nuna lweyi a kalaka a nga li mupfumeli nakone nuna yelweyo a tiyimisela ku tsrhama na yene, a nga mu tsrhiki.
14 Hikusa nuna lweyi a kalaka a nga li mupfumeli a voniwa a li lweyi a xwengiki hi mhaka ya nsati wake, ni nsati lweyi a kalaka a nga li mupfumeli a voniwa a li lweyi a xwengiki hi mhaka ya nuna wake lweyi a nga mupfumeli, loko a swi nga li xitasu, a vanenu a va ta va va nga xwenganga* kambe swoswi va xwengile.
15 Kambe loko lweyi a kalaka a nga li mupfumeli a hlawula ku hambana na yene, a a hambani; ka swiyimu swa ku fana ni leswo, makwezru wa xinuna kumbe wa xisati a nga sindzriseki ku tama a tsrhama na yene, Xikwembu Nkulukumba a mi vitanele kuva mi ta hanya a ku zruleni.
16 Wansati, swi tiva hi mani leswaku hi ku tsrhama na yene nkataku kumbexana u nga ha mu huluxa? Kumbe wene wanuna, swi tiva hi mani leswaku hi ku tsrhama na yene nsati waku kumbexana u nga ha mu huluxa?
17 Nambitanu, mun’wana ni mun’wana a a tami a tsrhama ka xiyimu lexi a a li ka xone nkama lowu Yehovha Xikwembu Nkulukumba a mu vitaniki ha wone. Nakone lowu hi wo nkongomiso lowu ni wu nyikelaka a mabandleni hinkwawu.
18 Xana ku ni lweyi a vitaniwiki na kutani a sokile? A a tame a va lweyi a sokiki. Ku ni lweyi a vitaniwiki na a nga sokanga? A nga soki.
19 A ku soka a swi hlayi ntxhumu, ni ko ku nga soki na swone a swi hlayi ntxhumu; a xa lisima i kuva mhunu a yingiseta milawu ya Xikwembu Nkulukumba.
20 Mun’wana ni mun’wana a a tsrhami ka xiyimu lexi a a li ka xone nkama lowu a vitaniwiki ha wone.
21 Xana u vitaniwe na wu li xikazrawa? Swi nga ku vilelisi leswo; kambe loko swi koteka kuva u ntsrhunxeka wu londzrovoti mukhandlu lowo.
22 Hikusa mun’wana ni mun’wana lweyi a Hosi yi mu vitaniki na a li xikazrawa, i nandzra wa Hosi lweyi a ntsrhunxiwiki; hi lani ku fanaka, mun’wana ni mun’wana lweyi a Hosi yi mu vitaniki na a li mhunu lweyi a ntsrhunxekiki, i xikazrawa xa Kriste.
23 Mi xaviwe hi ku dula; tsrhikani ku va swikazrawa swa vhanu.
24 Vamakwezru, mun’wana ni mun’wana a a tsrhami ka xiyimu lexi a a li ka xone nkama lowu Xikwembu Nkulukumba a mu vitaniki ha wone.
25 Mayelanu ni lava kalaka va ngi ngi sama va txhata* a ni na xileleto lexi pfaka hi ka Hosi, kambe ni nyikela mavonela yanga swanga mhunu lweyi a dumbekaka lweyi a kombisiwiki timpswalu hi Hosi.
26 Xileswo hi mhaka ya swikazratu leswi nga kone swoswi, ni yanakanya leswaku swa yampswa kuva mhunu a tama a tsrhamisa xileswi a nga xiswone.
27 Xana u ni nsati? U nga zami ku mu tsrhika. Xana a wu na nsati? U nga mu djuleteli.
28 Kambe ni loko u txhata a wu dohi. Nakone loko lweyi a kalaka a ngi ngi yentxa swa tinkuku a txhata a ngo doha. Nambitanu, lava txhataka va ta va ni swikazratu wuton’wini. Kambe mine no zama ku mi vhikela ka swone.
29 Handle ka leswo, vamakwezru, ni mi byela leswi: A nkama lowu saliki i wutsrongo. Ku sukela swoswi, lava nga ni vasati a va yentxi ingiki a va navu,
30 lava dzrilaka a va yentxi ingiki a va dzrili, lava nyonxiki a va yentxi ingiki a va nyonxanga, lava xavaka a va yentxi ingiki a va na ntxhumu,
31 ni lava tizrisaka mintxhumu ya misava leyi a va yentxi ingiki a va yi tizrisi ngopfu; hikusa xiyimu xa misava leyi xa txintxa.
32 Nakunene, ni djula kuva mi nga kazrateki. Wanuna lweyi a kalaka a nga txhatanga a zron’wekela mintxhumu ya Hosi ni leswi a nga swi yentxaka akuva a yi nyonxisa.
33 Kambe wanuna lweyi a txhatiki a zron’wekela mintxhumu ya misava ni leswi a nga swi yentxaka akuva a nyonxisa nsati wake,
34 xileswo a yavanile. Hi lani ku fanaka, wansati lweyi a kalaka a nga txhatanga ni lweyi a kalaka a ngi ngi sama a yentxa swa tinkuku,* va zron’wekela mintxhumu ya Hosi akuva va va lava xwengiki a mizrini ni le miyanakanywini.* Kambe wansati lweyi a txhatiki a zron’wekela mintxhumu ya misava ni leswi a nga swi yentxaka akuva a nyonxisa nuna wake.
35 Nambitanu, leswi ni swi hlayela kuva mi pfuneka, ku nga li ku mi sivela,* ni djula kuva mi yentxa leswi nga swinene akuva mi kota ku tama mi tizrela Hosi na mi nga dzrivatiwi.
36 Kambe loko mhunu lweyi a kalaka a nga txhatanga a vona leswaku a nga ha swi koti ku lawula ku navela kwake ka swa tinkuku, na kutani a wupfile hi le mizrini ni le miyanakanywini, a a yentxi leswi a swi djulaka; a nga dohi. A a txhati.
37 Kambe loko mhunu a titsrimbelile mbilwini yake nakone a nga na xivileleko xa ku txhata a tlhela a kota ku lawula ku navela kwake, ni kuva futsrhi a teke xiboho a mbilwini yake xa kuva a nga txhati, a yentxa swone.
38 Ni lweyi a txhataka a yentxa swone, kambe lweyi a kalaka a nga txhati a yentxa swone hi ku tlulisa.
39 A nsati a tsrimbiwile ka nuna wake loko nuna wake a ha hanya. Kambe loko nuna wake a fa, a ntsrhunxekile ku txhata ni lweyi a mu djulaka, kambe ntsena a Hosini.
40 Kambe hi mavonela yanga, a ta nyonxa ngopfu swinene loko a tama a tsrhamisa xiswoswo; nakone na dumba leswaku ni kongomisiwa hi moya wa Xikwembu Nkulukumba.
Tintlhamuxelo ta le hansi
^ Leswi liki, a nga yentxi swa tinkuku ni.
^ Hi Xigriki: porneía. Vona Ntlhamuxelo Wa Mazritu.
^ Hi ku kongoma: “a va ta va va nga basanga”.
^ Hi ku kongoma: “lava kalaka va ngi ngi sama va yentxa swa tinkuku”.
^ Ku hlayiwa lava kalaka va ngi ngi sama va txhata.
^ Hi ku kongoma: “ni le moyeni”.
^ Hi ku kongoma: “ku mi zreyela ntlhamu”.
