Papela dzra ku sungula ledzri yaka ka Vakorinte 9:1-27
9 Xana a ni ntsrhunxekanga? Xana a ni mupostola? Xana a ni mu vonanga Yesu Hosi yezru? Xana n’wine a mi mihandzru ya ntizro wanga a Hosini?
2 Nambiloko ni nga li mupostola ka van’wana, kwenu nakunene ni mupostola! Hikusa n’wine mi xikombiso xa* leswaku ni mupostola wa Hosi.
3 Lava va ni solasolaka ni va hlamula hi ndlela leyi:
4 Xana hine a hi na yone mfanelo ya ku da ni ku nwa?
5 Xana hine a hi na yone mfanelo ya ku fambafamba ni nsati lweyi a nga mupfumeli loko hi yendzra, ku fana ni vapostola lavan’wana, vamakwavu va Hosi kun’we na Khefasi?*
6 Kumbe ko va mine na Barnaba ntsena hi fanelaka ku tizra akuva hi kuma swa ku tihanyisa?
7 Xana dzri kone sotxha ledzri tihakelelaka madixpeza ya dzrone hinkwawu loko dzri li wusotxhweni? I mani lweyi a byalaka nsinya wa mawuvha a gama a nga di mihandzru ya wone? Kone i mani lweyi a byisaka ntlhambi a gama a nga nwi leiti dzra swifuyu swa ntlhambi wolowo ke?
8 Xana leswi ni swi hlayaka ko va mavonela ya vhanu? Kumbe na wone Nawu wu hlaya swoleswi?
9 Hikusa ka Nawu wa Moxe ku tsraliwe leswi: “U nga pfali nomu wa homu loko yi li ku huleni* ka mavele.” Xana Xikwembu Nkulukumba o zron’wekela tihomu ntsena?
10 Kumbe a hlaye leswo hi mhaka yezru? Nakunene ku tsraliwe leswo hi mhaka yezru, hikusa lweyi a dzrimaka ni lweyi a hulaka va fanela ku yentxa leswo na va dumba leswaku va ta kuma xan’wantxhumu.
11 Loko hi byale mintxhumu ya moya a xikazri kwenu, xana swi bihile kuva mi hi pfuna hi leswi hi swi pfumalaka?
12 Loko van’wana va ni mfanelo ya ku pfuniwa hi n’wine, hine a hi na yone mfanelo leyo ku va tlula? Nambitanu, hine a hi yi londzrovotanga mfanelo leyo, kambe hi tiyiselela mintxhumu hinkwayu akuva ku nga vi na ntxhumu lexi sivelaka madzrungula lamanene mayelanu na Kriste.
13 Mo kala mi nga swi tivi leswaku vhanu lava tizraka tempeleni va da swakuda leswi buyisiwaka a tempeleni, ni leswaku lava tizraka altarini nkama ni nkama va yamukela swin’wana swa leswi nyikeliwaka a altarini?
14 Hi lani ku fanaka, a Hosi yi lelete leswaku lava zrezraka madzrungula lamanene va hanya hi madzrungula lamanene.
15 Kambe ka timfanelo leto a ni londzrovotanga ni yin’we ka tone. Nakunene a ni mi tsralelanga leswo akuva mi ni yentxela xa kukazri, hikusa a swi ta yampswa ku fa ku tlula . . . a nga kone lweyi a taka ni susela xivangelo lexi ni nga na xone xa ku tikhuza!
16 Loko ni zrezra madzrungula lamanene, leswo a hi xivangelo xa kuva ni tikhuza, hikusa i mfanelo kuva ni swi yentxa. Nakunene, ni le khombyeni loko ni nga zrezri madzrungula lamanene!
17 Loko ni swi yentxa hi ku swi zrandzra ni ta kuma hakelo; nambiloko ni nga swi djuli ku swi yentxa na ha tama ni va ni wutiyanguleli lebyi.
18 Kutani he dzrini hakelo dzranga? A hakelo dzranga i kuva ni zrezra madzrungula lamanene hi ku swi zrandzra na ni nga hakeliwi ntxhumu, akuva ni nga ti tizrisi hi ndlela ya ku biha timfanelo leti ni nga na tone swanga muzrezri wa madzrungula lamanene.
19 Hikusa nambileswi ni nga mhunu lweyi a ntsrhunxekiki, ni tiyentxe xikazrawa xa vhanu hinkwavu, akuva ni ta kota ku koka vhanu vanyingi ngopfu swinene.
20 Ka Vayuda ni tiyentxe Muyuda akuva ni koka Vayuda; ka lava landzraka Nawu wa Moxe ni tiyentxe lweyi a landzraka Nawu wa Moxe akuva ni koka lava landzraka Nawu wa Moxe, nambileswi mine ni kalaka ni nga landzri Nawu wa Moxe.
21 Ka lava kalaka va nga wu landzri Nawu wa Moxe, ni tiyentxe lweyi a nga wu landzrikiki Nawu wa Moxe akuva ni koka lava kalaka va nga wu landzri Nawu wa Moxe, nambileswi nakunene ni landzraka nawu wa Xikwembu Nkulukumba ni tlhela ni fumiwa hi nawu wa Kriste.
22 Ka lava kalaka va nga tiyanga ni tiyentxe lweyi a kalaka a nga tiyanga akuva ni koka lava kalaka va nga tiyanga. Ni tiyentxe mintxhumu hinkwayu ka vhanu va mixaka hinkwayu, akuva hi tindlela hinkwatu ku ta va ni lava ni taka va huluxa.
23 Kambe hinkwaswu leswi ni swi yentxa hi kola ka madzrungula lamanene akuva ni yavelana wone ni van’wana.
24 Xana a mi swi tivi leswaku ka mpalisanu ku tsrutsruma vatsrutsrumi hinkwavu, kambe i mun’we ntsena lweyi a ganyaka? Xileswo tsrutsrumani hi ndlela leyi taka yentxa leswaku mi ganya.
25 Hinkwavu lava nghenaka ka mpalisanu va* tikhoma ka mintxhumu hinkwayu. Nakunene leswo va swi yentxa akuva va kuma xihiwa lexi honekaka,* kambe hine hi swi yentxela kuva hi kuma xihiwa lexi nga tiki honeka.
26 Xileswo a ni tsrutsrumi na ni nge na nkongometo;* a swibakela swanga ni swi kongomisa hi ndlela leyi nga tiki yentxa leswaku ni ba moya;
27 kambe ni ba mizri wanga ni wu kongomisa swanga xikazrawa, akuva mine ni zrezrelaka van’wana ni nga gami ni va lweyi a kalaka a nga yamukeleki ka Xikwembu Nkulukumba.
Tintlhamuxelo ta le hansi
^ Hi ku kongoma: “mfungu wa”.
^ Lweyi a tlhelaka a vitaniwa Petro.
^ Kumbe: “ku sileni”.
^ Kumbe: “Mutsrutsrumi mun’wana ni mun’wana awa”.
^ Hi ku kongoma: “ngiyana leyi honekaka”.
^ Kumbe: “nyamutsrutsrumi”.
