Papela dzra ku sungula dzra Yohane 2:1-29
2 Vatsrongwana vanga, ni mi tsralela mintxhumu leyi akuva mi nga yentxi xidoho. Nambitanu, loko mhunu wa kukazri a txhuka a doha, hi ni mupfuni* lweyi a nga kun’we na Papayi, ku nga Yesu Kriste mhunu lweyi a lulamiki.
2 Yene i gandzrelo ledzri nyikeliwiki akuva dzri funeketa* swidoho swezru, ku nga li swidoho swezru ntsena, kambe ni swa misava hinkwayu.
3 Loko hi tama hi yingiseta milawu yake hi kombisa leswaku ha mu tiva.
4 Lweyi a liki: “Na mu tiva”, kambe a nga yi yingiseti milawu yake, i muhembi nakone mhunu lweyo a nga na ntiyiso.
5 Kambe lweyi a yingisetaka zritu dzrake, swi ta tikomba leswaku nakunene mhunu yelweyo awa mu zrandzra Xikwembu Nkulukumba. Loko na hine hi yentxa leswo, hi ta va na hi kombisa leswaku hi ni wumun’we na yene.
6 Lweyi a liki a ni wumun’we na yene a fanela ku tama a hanya hi lani yene a hanyiki ha kone.*
7 Vamakwezru lava zrandzrekaka, a nawu lowu ni mi tsralelaka wone a hi wa nyiwana, kambe i nawu wa khale lowu mi nga na wone ku sukela a ku sunguleni. A nawu lowu wa khale i zritu ledzri mi dzri yingeliki.
8 Nambitanu, ni mi tsralela nawu lowumpshwa, lowu yene a wu landzriki nakone na n’wine mi wu landzraka, hikusa a munyama wa khaluta nakone a livaningu dzra ntiyiso dzri sungule ku vaninga.
9 Lweyi a liki a le livaningwini nakasi a nyenya makwavu a ha li munyameni.
10 Lweyi a zrandzraka makwavu a le livaningwini, nakone a ku na ntxhumu lowu nga mu wisaka.
11 Kambe lweyi a nyenyaka makwavu a le munyameni, a famba munyameni nakone a nga ku tivi lomu a yaka kone hikusa a munyama wu mu dlaye matihlo.
12 N’wine vatsrongwana, ni mi tsralela hikusa a swidoho swenu swi dzrivaleliwile hi kola ka vito dzrake.
13 N’wine vapapayi, ni mi tsralela hikusa ma mu tiva lweyi a nga kone ku sukela a ku sunguleni. N’wine madjaha, ni mi tsralela hikusa mi hlule Sathana.* N’wine vana, ni mi tsralela hikusa ma mu tiva Papayi.
14 N’wine vapapayi, ni mi tsralela hikusa ma mu tiva lweyi a nga kone ku sukela a ku sunguleni. N’wine madjaha, ni mi tsralela hikusa mi tiyile, ma dzri kholwa zritu dzra Xikwembu Nkulukumba nakone mi hlule Sathana.
15 Mi nga zrandzri misava kumbe mintxhumu leyi nga misaveni. Loko mhunu a zrandzra misava, a nga mu zrandzri Papayi;
16 hikusa hinkwaswu leswi nga misaveni, swa ku fana ni ku navela ka nyama, ku navela ka matihlo, ni ku va mhunu a kombisa* mintxhumu leyi a nga na yone a wuton’wini, a swi pfi ka Papayi, kambe swi pfa misaveni.
17 Handle ka leswo, a misava yi ta khaluta kun’we ni ku navela ka yone, kambe lweyi a yentxaka ku zrandzra ka Xikwembu Nkulukumba a ta tsrhama hi lani ku nga helikiki.
18 Vananga, lowu i nkama wa wugamu, nakone hi lani mi swi yingeliki ha kone leswaku lweyi a lwisanaka na Kriste* awa ta, nambi swoswi ku humelele vanyingi lava lwisanaka na Kriste, ku nga leswi swi hi tiyisekisaka leswaku lowu i nkama wa wugamu.
19 A va li na hine, kambe va sukile; hikusa a va nga li vezru,* loko a va li vezru a va ta tama va va na hine. Kambe va sukile leswaku swi ta tikomba leswaku a hi hinkwavu va nga vezru.
20 N’wine mi totiwe hi moya lowu pfaka ka lweyi a xwengiki, nakone hinkwenu mi ni wutivi.
21 A ni mi tsraleli hi leswaku mo kala mi nga wu tivi ntiyiso, kambe hi leswi mi wu tivaka, ni hi leswi ku nga liki na madzrimi lama humaka ka ntiyiso.
22 I mani muhembi, xana a hi yene lweyi a yalaka leswaku Yesu i Kriste? A mhunu yelweyo i antikriste, a nga pfumeli ka Papayi ni ka N’wana.
23 Mun’wana ni mun’wana lweyi a kalaka a nga pfumeli ka N’wana a nga yamukeleki ka Papayi. Kambe lweyi a hlayaka leswaku awa pfumela ka N’wana, awa yamukeleka ni le ka Papayi.
24 Mi fanela ku hlayisa leswi mi swi yingeliki ku sukela a ku sunguleni. Loko mi hlayisa leswi mi swi yingeliki ku sukela a ku sunguleni, mi ta tama mi va ni wumun’we ni N’wana kun’we na Papayi.
25 Handle ka leswo, leswi a hi dumbisiki swone i wutomi lebyi nga helikiki.
26 Ni mi tsralela mintxhumu leyi akuva mi tivonela ka lava va zamaka ku mi hambukisa.
27 Kambe n’wine, leswi mi hlawuliwiki* hi Xikwembu Nkulukumba hi ku tizrisa moya wake wa ku xwenga, ni hi leswi a moya wake wu nga kwenu, a mi vileli wa ku mi dondzrisa; kambe Xikwembu Nkulukumba a tizrisa moya wolowo akuva a mi dondzrisa mintxhumu hinkwayu, nakone a ku hlawuliwa kwenu i ka ntiyiso a hi ka madzrimi. Kutani vanani ni wumun’we na yene, hi lani moya wu mi dondzrisiki ha kone.
28 Xileswo vatsrongwana vanga, tamani mi va ni wumun’we na yene, akuva loko a humelela hi kota ku vulavula na hi ntsrhunxekile ni leswaku loko a tlhela akuva a ta va na hine hi nga mu tumbeli hi ku dana.
29 Leswi mi tivaka leswaku yene a lulamile, tiyisekani leswaku lweyi a yentxaka leswi lulamiki i n’wana wa Xikwembu Nkulukumba.
Tintlhamuxelo ta le hansi
^ Kumbe: “muvulavuleli”.
^ Kumbe: “gandzrelo dzra ku dzrivaleliwa swidoho swezru; ndlela ya ku kondletela ku zrula”.
^ Hi ku kongoma: “a fanela ku tama a famba hi lani yene a fambiki ha kone”.
^ Hi ku kongoma: “mubihi”.
^ Kumbe: “a gwira hi”.
^ Hi Xigriki lweyi a lwisanaka na Kriste a vitaniwa antikriste.
^ Kumbe: “a va nga hi lumbi”.
^ Hi Xigriki a zritu ledzri dzri tlhamuxela ku tota kumbe ku txhela mafuzra.
