Madzrungula Lamanene Lama Tsraliwiki hi Matewu 1:1-25
1 Buku dzra matimu* ya Yesu Kriste,* n’wana wa Davhida, n’wana wa Abrahamu:
2 Abrahamu a ve papayi wa Izaki,Izaki a ve papayi wa Yakobe;Yakobe a ve papayi wa Yuda ni vamakwavu;
3 Yuda na Tamari va pswale Faresi na Zara;Faresi a ve papayi wa Hezroni;Hezroni a ve papayi wa Aramu;
4 Aramu a ve papayi wa Aminadabi;Aminadabi a ve papayi wa Nasoni;Nasoni a ve papayi wa Salmoni;
5 Salmoni na Rahabi va pswale Bowasi;Bowasi na Ruti va pswale Obede;Obede a ve papayi wa Yese;
6 Yese a ve papayi wa hosi Davhida.Davhida ni nsati wa Uriya va pswale Solomoni;
7 Solomoni a ve papayi wa Robowamu;Robowamu a ve papayi wa Abiya;Abiya a ve papayi wa Asa;
8 Asa a ve papayi wa Yehoxafati;Yehoxafati a ve papayi wa Yoramu;Yoramu a ve papayi wa Uziya;
9 Uziya a ve papayi wa Yotamu;Yotamu a ve papayi wa Akazi;Akazi a ve papayi wa Ezekiya;
10 Ezekiya a ve papayi wa Manasi;Manasi a ve papayi wa Amoni;Amoni a ve papayi wa Yosiya;
11 Yosiya a ve papayi wa Yekoniya ni vamakwavu hi nkama lowu va khomiwiki va yisiwa a Babilona.
12 Ntsrhaku ka loko va khomiwile va yisiwa a Babilona, Yekoniya a ve papayi wa Salatiyele;Salatiyele a ve papayi wa Zerubabele;
13 Zerubabele a ve papayi wa Abiyudi;Abiyudi a ve papayi wa Eliyakimi;Eliyakimi a ve papayi wa Azori;
14 Azori a ve papayi wa Sadoki;Sadoki a ve papayi wa Akimi;Akimi a ve papayi wa Eliyudi;
15 Eliyudi a ve papayi wa Eliyazari;Eliyazari a ve papayi wa Matani;Matani a ve papayi wa Yakobe;
16 Yakobe a ve papayi wa Yosefa nuna wa Mariya, mamana wa Yesu, lweyi a vitaniwaka Kriste.
17 Kutani ku sukela ka Abrahamu ku ya tlhasa ka Davhida, ku ve ni 14 wa tinxaka; ku sukela ka Davhida ku ya tlhasa loko va khomiwa va yisiwa a Babilona, ku ve ni 14 wa tinxaka; ku sukela ka loko va khomiwile va yisiwa a Babilona ku ya tlhasa ka Kriste, ku ve ni 14 wa tinxaka.
18 Kambe a ku pswaliwa ka Yesu Kriste ku ve hi ndlela leyi: Hi nkama lowu mamana wake Mariya a dumbisiwiki mutxhatu hi Yosefa, a kume nyimba hi moya wa ku xwenga* na va nga si na txhata.
19 Nambitanu, leswi Yosefa nuna wake a a li mhunu wa ku lulama nakone a a nga djuli ku mu hamba xihlekiso a vhanwini, a kunguhate ku mu tsrhika xihundleni.
20 Kambe ntsrhaku ka loko a yanakanyisise hi mhaka leyi, ntsrumi ya Yehovha* yi humelele kwake a lozrweni yi ku: “Yosefa n’wana wa Davhida, u nga txhavi ku titekela Mariya nsati waku u famba na yene kaya, hikusa a nyimba leyi a nga na yone a yi kume hi moya wa ku xwenga.
21 A ta pswala n’wana wa djaha, u fanela ku mu txhula vito dzra ku Yesu,* hikusa a ta huluxa vhanu vake ka swidoho swavu.”
22 Nakunene hinkwaswu leswi swi yentxeke akuva ku hetiseka mazritu lawa Yehovha a ma hlayiki hi ku tizrisa muprofeta wake, a ku:
23 “Vonani! A n’hwanyana a ta va ni nyimba, a ta pswala n’wana wa djaha, nakone va ta mu txhula vito dzra ku Emanuwele”, leswi loko swi ndzruluteliwa swi liki: “Xikwembu Nkulukumba a na hine.”
24 Kutani Yosefa a pfuka wuzrongweni a va a ya teka nsati wake a famba na yene kaya hi lani ntsrumi ya Yehovha yi mu byeliki ha kone.
25 Kambe a nga yentxanga timhaka ta tinkuku na yene ku ya tlhasa loko a pswala n’wana wa djaha, a va Yosefa a mu txhula leswaku i Yesu.
Tintlhamuxelo ta le hansi
^ Kumbe: “lixaka dzra”.
^ Kumbe: “Mesiya; Mutotiwa”.
^ Kumbe: “ntamu wa Xikwembu Nkulukumba”.
^ Ka 237 wa makhambi lawa vito dzra Yehovha dzri humelelaka ha wone ka Matsralwa ya Wukriste ya Xigriki, ledzri i dzra ku sungula.
^ Vito ledzri liki Yesu dzri yelana ni vito dzra Xiheberu ledzri liki Yexuwa kumbe Yoxuwa, leswi tlhamuxelaka leswaku “Yehovha i Muhuluxi”.
