Mintizro ya Vapostola 14:1-28
14 A Ikoniya Pawulo na Barnaba va nghene sinagogeni dzra Vayuda va vulavula hi ndlela leyi yentxiki leswaku a xitsrhungu lexikulu xa Vayuda ni Vagriki xi ndzruluka vapfumeli.
2 Kambe a Vayuda lava kalaka va nga pfumelanga va hlohlotela vhanu va matiko leswaku va lwisana ni vamakwezru.
3 Xileswo Pawulo na Barnaba va hete nkama wa wunyingi na va vulavula va nga txhavi ntxhumu hi kola ka ntamu lowu Yehovha a a va nyike wone, a va pfumelele ku yentxa mahlolana ni swihlamaliso akuva a tiyisekisa leswaku mazritu lawa va ma hlayaka mayelanu ni timpswalu take letikulu i ntiyiso.
4 Nambitanu, a xitsrhungu xa doropa a xi yavanile; van’we a va yima ni Vayuda kambe van’wana a va yima ni vapostola.
5 Loko vhanu va matiko, Vayuda kun’we ni vafumi vavu va kunguhate ku va xanisa ni ku va khandla hi mazribye,
6 Pawulo na Barnaba va biwe ndleve kutani va tsrutsruma va ya ka madoropa ya Likawoniya, Listra, Derbe ni le migangeni ya le kusuhi.
7 Kohala, va ye mahlweni va zrezra madzrungula lamanene.
8 A Listra a ku ni wanuna wa kukazri lweyi a a limale milenge. A a pswaliwe na a limalile nakone a a ngi ngi sama a famba.
9 Wanuna lweyo a a tsrhamile a yingiseta Pawulo loko a khanela. Loko Pawulo a mu lavisisa kutani a xiya leswaku a ni lipfumelo dzra kuva a nga hanyisiwa,
10 a mu byela hi zritu dzra ku tlakuka a ku: “Sekeleka u yima hi milenge yaku.” Xileswo wanuna lweyo a ku vhuthu* a sungula ku famba.
11 Loko switsrhungu swi vona leswi Pawulo a swi yentxiki, swi bandlukana hi lidzrimi dzra xilikawoniya·swi ku: “A swikwembu swi titxintxe swi va vhanu, swi xika swi hi tela!”
12 Kutani swi txhula Barnaba swi ku i Zewusi, kambe Pawulo swi ku i Hermisi, hikusa hi yene lweyi a a zrangela ku vulavuleni.
13 Kutani a muprista wa xikwembu Zewusi, lexi a tempele dzra xone a dzri kumeka phambheni ka doropa, a buyisa tihomu ni tihazri ta swiluva a nyangweni ya doropa akuva yene kun’we ni switsrhungu va ta yentxela magandzrelo Pawulo na Barnaba.
14 Kambe loko vapostola Barnaba na Pawulo va twa leswo, va handzrula timpahla tavu va va va tsrutsruma va ya ka xitsrhungu va tlhasa va huwelela va ku:
15 “Vavanuna, ha yini mi yentxa leswi? Na hine hi vhanu lava nga ni ku tsrana ka ku fana ni kwenu, hi mi zrezrela madzrungula lamanene akuva mi tsrhika mintxhumu leyi nga pfuniki ntxhumu, mi gandzrela Xikwembu Nkulukumba lweyi a hanyaka, lweyi a hambiki tilo, misava, lwandle ni mintxhumu hinkwayu leyi nga ka swone.
16 A minkameni ya khale a pfumelele matiko hinkwawu kuva ma yentxa mintxhumu hi lani ma djulaka ha kone,
17 nambileswi a kalaka a nga tsrhikanga ku mi komba wumboni bya leswaku yene a yentxa mintxhumu leyinene, hi ku mi nisela timpfula hi le tilweni, a yentxa leswaku masimu yenu ma bindzrula ngopfu hi nkama wa kone, a mi nyika swakuda swa ku va mi da mi xuzra a tlhela a tata timbilu tenu hi ku nyonxa.”
18 Kambe nambileswi va hlayiki mintxhumu leyi, swi va kazratele ngopfu swinene ku sivela switsrhungu leswaku swi nga va hambeli magandzrelo.
19 Kambe ku tlhase Vayuda lava a va huma Antiyokiya ni le Ikoniya va hlohlotela switsrhungu, kutani va khandla Pawulo hi mazribye va gama va mu koka va mu humesa handle ka doropa na va yanakanya leswaku a file.
20 Nambitanu, loko vadondzrisiwa va mu tsrandzrelile, a sekeleke a nghena doropeni. Hi siku ledzri landzreliki a suka na Barnaba va ya Derbe.
21 Ntsrhaku ka loko va zrezre madzrungula lamanene va tlhela va yentxa vadondzrisiwa va vanyinginyana a doropeni ledzro, va tlhelele a Listra, Ikoniya ni le Antiyokiya,
22 lani va tiyisiki vadondzrisiwa va va kutxa ku tama va va ni lipfumelo ledzri tiyiki va ku: “Hi fanela ku kumana ni mahlomulo manyingi na hi nga si na nghena a Mfun’wini wa Xikwembu Nkulukumba.”
23 Handle ka leswo, va va bekele vakulu a bandleni dzrin’wana ni dzrin’wana. Va khongote va tlhela va titsrona swakuda, va gama va va nyikela ka Yehovha lweyi va pfumeliki ka yene.
24 Ntsrhaku ka leswo va tsremakanye hi le Pisidiya va ya Pamfiliya,
25 nakone ntsrhaku ka loko va zrezre zritu dzra Xikwembu Nkulukumba a Perga, va fulamele va ya Ataliya.
26 Va suka kolanu va wela va ya Antiyokiya, ku nga lani hi ku tizrisa timpswalu letikulu ta Xikwembu Nkulukumba va nyikiwiki ntizro lowu swoswi va wu hetisisiki.
27 Loko va tlhasile va hlengeleta bandla, va dzri dzrungulele mintxhumu yinyingi leyi Xikwembu Nkulukumba a yi yentxiki hi ku tizrisa vone, ni leswaku a pfulele vamatiko ndlela ya leswaku va kota ku va vapfumeli.
28 Xileswo va tsrhame nkama wa wunyingi ni vadondzrisiwa.
Tintlhamuxelo ta le hansi
^ Hi ku kongoma: “a ntlula”.
