Papela ledzri yaka ka Tito 3:1-15
3 Yana mahlweni u va dzrimuxa ku va va tibeka hansi, va yingiseta mimfumu ni wulawuli, va tiyimisela ku yentxa ntizro wun’wana ni wun’wana lowunene,
2 va nga honi vhanu van’wana mavito, va nga zrandzri timholova, kambe va yanakanyela, minkama hinkwayu va va ni ku zrula ni vhanu hinkwavu.
3 Hikusa na hine hi ke hi va swiphunta, hi va vhanu lava kalaka va nga yingiseti, a hi lahlekile, a hi li swikazrawa swa ku navela ni ku tinyonxisa ka ku siyanasiyana, a hi li vhanu lava bihiki, lava nga ni matsrhoho, lava nyenyentsaka nakone a hi nyenyanana.
4 Nambitanu, loko a timpswalu ta Xikwembu Nkulukumba Muhuluxi wezru, ni lizrandzru ledzri a nga na dzrone hi vhanu swi kombisiwile,
5 a hi huluxe hi mati lawa ma hi nyikiki wutomi ni hi ku hi yentxa lavampshwa hi moya wa ku xwenga, (na ku nga li hi leswaku he yentxa ntizro wa kukazri wa ku lulama, kambe hi kola ka timpswalu take).
6 A hi txhululele moya lowu hi ntalu hi ku tizrisa Yesu Kriste Muhuluxi wezru,
7 ku yentxela leswaku ntsrhaku ka loko hi voniwe hi li lava lulamiki hi kola ka timpswalu take letikulu hi va vamadapfindla va wutomi lebyi nga helikiki lebyi hi byi yimeliki.
8 A timhaka leti ta dumbeka nakone ni djula leswaku u tama u ti tshimisisa akuva lava pfumeliki ka Xikwembu Nkulukumba va tsrhamela ku yanakanya hi ku yentxa mintizro leyinene. A timhaka leti i tinene nakone ta pfuna a vhanwini.
9 Kambe fambela kule ni ku phikisana ka wuphunta, ku landzrelela matimu ya tinxaka ta vakokwana, ku kanetana ni ku lwa hi timhaka ta Nawu, hikusa a mintxhumu leyo a hi ya ntxhumu nakone a yi pfuni ntxhumu.
10 Kasi ke, a mhunu lweyi a hlohlotelaka dondzro ya madzrimi, mu fulazreli ntsrhaku ka loko u mu kawuke* kabidzri kambe a nga yingeli,
11 hikusa wa swi tiva leswaku a mhunu wa ku tanu a hambuke ndleleni, o doha nakone a swidoho swake swi mu yavanyisile.
12 Loko ni zrumela Artemasi kumbe Tikiko halanu kwaku, yentxa hinkwaswu leswi u nga swi kotaka akuva u kumana na mine a Nikopolisi, hikusa ni kunguhate ku ya heta wuxika hinkwabyu kohala.
13 Yentxa hinkwaswu leswi u nga swi kotaka akuva u longelela Zenasi mhunu lweyi a wu tivaka ngopfu Nawu, na Apolosi akuva va nga pfumali ntxhumu ka liyendzro dzravu.
14 Kambe na vone vamakwezru va dondzrisi ku yentxa mintizro leyinene akuva va kota ku pfunisa loko ku va ni xivileleko xa xihantla, ku yentxela leswaku va nga kiyeleliwi hi mintizro leyinene.*
15 Hinkwavu lava nga na mine va ku dzrungula. Ni dzrunguleli vakristekulozri lava va hi zrandzraka.
Ingiki a timpswalu letikulu ti nga va na n’wine.
