Papela ledzri dzri yaka ka Vaefesa 4:1-32
4 Xileswo, mine Pawulo xib’otxhwa hi kola ka Hosi yezru, ni mi tsratsriya leswaku mi hanya hi ndlela leyi fambisanaka ni leswi mi vitaneliwiki swone,
2 hi ku titsrongahata hinkwaku,* ku zrula, ku lehisa mbilu, mi byatsrhanana hi lizrandzru,
3 mi tikazratela ku hlayisa wumun’we lebyi moya wu byi nyikelaka, mi tlhela mi hanya hi ku zrula.
4 Ku ni mizri wun’we ni moya wun’we, ku fana ni leswi ku nga ni dumbo dzrin’we ntsena ledzri mi vitaneliwiki dzrone;
5 A Hosi i yin’we, a lipfumelo i dzrin’we, a babatiso i dzrin’we;
6 Xikwembu Nkulukumba i mun’we, lweyi a nga Papayi wa vhanu hinkwavu, a tlakukiki ku tlula hinkwavu nakone a tizrisaka hinkwavu akuva a yentxa mintxhumu.
7 Kutani, mun’wana ni mun’wana wezru a kombiwe timpswalu letikulu hi ku ya hi leswi Kriste a mu pimelisiki xiswone nyiko leyi ya mahala,
8 hikusa a Matsralwa ma li: “Loko a tlhantukele henhla a teke swib’otxhwa; a nyike bandla vavanuna swanga tinyiko.”
9 Kutani a mazritu lawa ma liki “a tlhantukele” ma tlhamuxela yini? Ma tlhamuxela leswaku a zrange hi ku xika a ta mimbangwini ya le hansi, leswi liki: a misaveni.
10 Lweyi a xikiki hi yelweyi a tlheliki a tlhantukela henhlahenhla ka matilo, akuva mintxhumu hinkwayu yi hetiseka hi kola kwake.
11 Nakone a nyike bandla vavanuna va kukazri akuva va tizra swanga vapostola, van’wana akuva va tizra swanga vaprofeta, van’wana akuva va tizra swanga vaevhangeli,* van’wana akuva va va vabyisi ni vadondzrisi,
12 hi nkongometo wa kuva va pfuna* vaxwengi akuva va famba hi ndlela leyi yi nga yone, va tizrela van’wana ni ku tiyisa mizri wa Kriste,
13 ku ya tlhasa lani hinkwezru hi taka va ni lipfumelo dzrin’we ni wutivi bya ntiyiso mayelanu ni N’wana wa Xikwembu Nkulukumba, akuva hi va vhanu lava wupfiki, leswi liki, hi wupfa hi ku helela ku fana na Kriste.
14 Xileswo a ha ha fanelanga hi va vatsrongwana, hi susumetiwa ingiki hi loko ho susumetiwa hi mavimbi hi yisiwa hala ni hala hi moya wun’wana ni wun’wana wa tindondzro, hi wukanganyisi bya vhanu ni hi maqhinga yavu.
15 Kambe na hi hanya hi ntiyiso, a hi kuleni ka mintxhumu hinkwayu hi ku susumetiwa hi lizrandzru na hi fambisana na Kriste, lweyi a nga nhloko.
16 Ha yene a swizro hinkwaswu swa mizri swi tlhanganisiwa ha hombe nakone swa tizrisana akuva swi nyika nyama leswi yi swi vilelaka. Loko xizro xin’wana ni xin’wana xi yentxa ntizro hi ndlela leyinene, leswo swi pfuna mizri akuva wu kula, ku yentxela leswaku mizri hinkwawu wu va lowu tiyiki a lizrandzrwini.
17 Xileswo, ni mi byela ni tlhela ni mi tsratsriya leswi a mahlweni ka Hosi, leswaku a ma ha fanelanga mi famba hi ndlela leyi vamatiko va fambaka ha yone ka mayanakanyela yavu lawa ma kalaka ma nga pfuni ntxhumu.
18 A miyanakanyu yavu yi le munyameni nakone va tsravukane ni wutomi lebyi pfaka ka Xikwembu Nkulukumba, hikusa a va swi djuli ku tiva Xikwembu Nkulukumba, hi leswi va tlanyaliki timbilu.
19 Leswi va kalaka va nga ha na tingana, va tinyiketele ka mahanyela ya ku biha* va yentxa mintxhumu ya nsila ya mixaka hinkwayu lakakuva nambi ku kolwa va nga kolwi ha yone.
20 Kambe mi dondzrile nakone ma swi tiva leswaku Kriste a nga tsrhamisisanga xileswo,
21 swanga hi leswi nakunene mi yingeliki mi tlhela mi dondzrisiwa hi ku fambisana ni ntiyiso lowu Yesu a wu dondzrisiki.
22 Mi dondzrisiwe ku txukumeta wumhunu bya khale, lebyi fambisanaka ni mahanyela lawa a mi li na wone nakone byi honiwaka hi ku navela ka byone ka ku biha loku kanganyisaka.
23 Ni leswaku mi fanela ku tama mi va ni mayanakanyela lamampshwa,
24 nakone mi fanela ku yambala wumhunu lebyimpshwa lebyi fambisanaka ni ku zrandzra ka Xikwembu Nkulukumba, lebyi seketeliwiki ka wululami bya ntiyiso ni ku dumbeka.
25 Kutani leswi mi tsrhikiki madzrimi, mun’wana ni mun’wana wenu a a vulavuli ntiyiso ni mhunu mun’wana, hikusa hi swizro swa mizri wun’we.
26 Hlundzrukani, kambe mi nga dohi; mi nga tsrhiki dambu dzri pela na ma ha kwatile;
27 mi nga nyiki Diyavulosi mukhandlu.*
28 A muyivi a nga ha tlheli a yiva; kambe, a a tizri hi ku tikazrata a yentxa ntizro lowunene hi mavoko yake, akuva a ta kuma xa ku nyika lweyi a pfumalaka.
29 A zritu dzra ku bola dzri nga humi a minon’wini yenu, kambe a ku humi ntsena mazritu lamanene lama yakaka hi ku ya hi xivileleko xa nkama wolowo, akuva ma tiyisa lava va ma yingelaka.
30 Nakone mi nga hlundzrukisi* moya wa ku xwenga wa Xikwembu Nkulukumba, lowu mi fungiwiki ha wone akuva mi ta huluxiwa hi xitizrulo loko ku tlhasa siku dzra ku huluxiwa.
31 Tsrhikani ku bekelana xiviti, ku hlundzruka, ku leva, pongwe, nhlambha, kun’we ni mintxhumu hinkwayu leyi bihiki.
32 Kambe kombananani wumbilu, ntwelawusiwana, mi dzrivalelana hi ku ntsrhunxeka ku fana ni leswi na yene Xikwembu Nkulukumba a mi dzrivaleliki hi ku ntsrhunxeka hi ku tizrisa Kriste.
Tintlhamuxelo ta le hansi
^ Kumbe: “hi miyanakanyu ya ku titsrongahata”.
^ Kumbe: “vazrezri va madzrungula lamanene”.
^ Hi ku kongoma: “va wololoxa”.
^ Kumbe: “mahanyela ya tingana”. Hi Xigriki: asélgeia. Vona Ntlhamuxelo Wa Mazritu.
^ Kumbe: “mi nga mu nyiki mbangu Diyavulosi”.
^ Kumbe: “mi nga khunguvanyisi”.
