Papela ledzri yaka ka Vagalatiya 2:1-21
2 Kutani ntsrhaku ka 14 wa malembe ni tlhele ni tlhantukela a Yerusalema na ni na Barnaba, nakone ni teke Tito ni famba na yene.
2 Ni tlhantuke ni ya kohala hikusa ni tlhamuxeliwe* leswaku a ni fanela ku ya kone, ni tlhase ni va byela madzrungula lamanene lawa ni ma zrezraka ka vamatiko. Nambitanu, ne tlhasa ni kumana ntsena ni vavanuna lava hloniphiwaka ngopfu swinene akuva ni tiyiseka leswaku ntizro lowu a ni wu yentxa ni lowu kutani a ni wu yentxile a wu nga li wa mahala.
3 Kambe nambi ku li Tito lweyi a a li na mine, a nga sindzrisiwanga ku soka, nambileswi a a li Mugriki.
4 Kambe a mhaka leyi yi pfuke hi mhaka ya vamakwezru va madzrimi lava va nyanimeliki va nghena bandleni, akuva va hlola* ntsrhunxeko lowu hi tikholisaka hi wone hi ku va ni wumun’we na Kriste Yesu, ku yentxela leswaku va hi yentxa swikazrawa hi ku helela.
5 A hi va yingisetanga nambi ku li swa nkamanyana,* akuva a ntiyiso wa madzrungula lamanene wu tama wu va na n’wine.
6 Kambe mayelanu ni vavanuna volavo lava a va tikomba ingiki i va lisima, ku hlaya ntiyiso, vavanuna volavo lava hloniphiwaka ngopfu swinene a va ni dondzrisanga ntxhumu wa nyiwana. Ina, a ni na mhaka ni leswi a va li swone ku sunguleni, hikusa Xikwembu Nkulukumba a nga yi hi leswi mhunu a langutekisaka xiswone.
7 Kambe loko va xiya leswaku ni nyikiwe ntizro wa ku zrezrela madzrungula lamanene vhanu lava kalaka va nga sokanga, ku fana ni leswi Petro a nyikiwiki ntizro wa ku zrezrela madzrungula lamanene vhanu lava sokiki
8 (hikusa lweyi a nyikiki Petro ntamu wa ku va mupostola ka lava va sokiki hi yelweyi a nyikiki mine ntamu wa ku va mupostola ka vamatiko)
9 ni loko va xiya leswaku a timpswalu letikulu a ti nyikiwe mine, Yakobe, Khefasi* na Yohane lava a va tikomba va li tinsika* ta bandla, va q’evule Barnaba na mine ku komba leswaku ha pfumelelana leswaku hine hi ya ka vamatiko kambe vone va ya ka lava sokiki.
10 Ntsena ve hi kombela leswaku hi nga swi dzrivali swisiwana, nakone leswo hi leswi na mine ni tikazratelaka ngopfu swinene ku swi yentxa.
11 Nambitanu, loko Khefasi* a te Antiyokiya, ni mu kawuke na hi lavisanile hikusa leswi a swi yentxiki a swi nga li swinene.*
12 Hikusa na ku nga si na tlhasa vavanuna va kukazri lava a va pfa hi ka Yakobe, a a talisa ku da swakuda ni vhanu va matiko; kambe loko va tlhasile, a tsrhike ku da swakuda na vone a tlhela a titsravukanisa na vone hi ku txhava lava sokiki.
13 A Vayuda lavan’wana na vone va tipatsre na yene ka wukanganyisi lebyi, lakakuva nambi Barnaba a wongeka a tipatsra na vone ka wukanganyisi byavu.
14 Kambe loko ni xiye leswaku leswi a va swi yentxa a swi nga fambisani ni ntiyiso wa madzrungula lamanene ni byele Khefasi* a mahlweni ka hinkwavu ni ku: “Loko wene nambileswi u nga Muyuda u hanyisa xileswi vamatiko va hanyisaka xiswone, ku nga li leswi Vayuda va hanyisaka xiswone, ha yini u djula leswaku vamatiko va hanya hi ku landzra swihena swa Vayuda?”
15 Hine hi nga Vayuda va mapswaliwa, nakone hi nga liki vadohi lava pfaka ka vamatiko,
16 ha pfumela leswaku a mhunu a voniwa a li lweyi a lulamiki ku nga li hi ku va a landzra nawu kambe ntsena hi ku va a va ni lipfumelo ka Yesu Kriste. Xileswo hi kombisa lipfumelo dzrezru ka Kriste Yesu akuva hi voniwa hi li lava lulamiki hi ku va ni lipfumelo ka Kriste ku nga li hi ku va hi landzra nawu hikusa a nga kone lweyi a* taka voniwa a li lweyi a lulamiki hi ku va a landzra nawu.
17 Kutani loko na hine hi voniwa na hi li vadohi nkama lowu hi lwelaka ku voniwa hi li lava lulamiki hi kola ka Kriste, xana swi djula ku hlaya leswaku Kriste a hi hlohlotela ku doha? Nikutsrongo!
18 Loko ni tlhela ni yaka mintxhumu yoleyi ni yi hahluliki, ni kombisa leswaku a ni wu yingiseti nawu.
19 Hikusa hi ku pfuniwa hi wo nawu ni file loko swi ta a mhakeni ya nawu, akuva ni kota ku hanyela Xikwembu Nkulukumba.
20 Ni gongondzreliwe mhandzrini kun’we na Kriste. A ka ha li mine lweyi a hanyaka kambe i Kriste lweyi a hanyaka nakone a ni wumun’we na mine. Nakunene a wutomi lebyi ni byi hanyaka swoswi a nyameni ni byi hanya hi lipfumelo ledzri ni nga nadzru ka N’wana wa Xikwembu Nkulukumba, lweyi a ni zrandzriki a va a tinyikela hi mhaka yanga.
21 A ni ti yali* timpswalu letikulu ta Xikwembu Nkulukumba, hikusa loko a li leswaku mhunu a ta voniwa a li lweyi a lulamiki hi ku va a landzra nawu swi hlaya leswaku Kriste a fe swa mahala.
Tintlhamuxelo ta le hansi
^ Hi ku kongoma: “ni pfuleteliwe”.
^ Kumbe: “va kambela”.
^ Hi ku kongoma: “wora dzrin’we”.
^ Lweyi a tlhelaka a vitaniwa Petro.
^ Kumbe: “mapilari”.
^ Lweyi a tlhelaka a vitaniwa Petro.
^ Kumbe: “hikusa a a ni nandzru”.
^ Lweyi a tlhelaka a vitaniwa Petro.
^ Hi ku kongoma: “a ku na nyama leyi”.
^ Kumbe: “A ni ti beki hi tlhelo”.
