Papela ledzri yaka ka Vagalatiya 3:1-29
-
Ku hambana ka mintizro ya Nawu ni ya lipfumelo (1-14)
-
Mhunu lweyi a lulamiki a ta hanya hi kola ka lipfumelo (11)
-
-
Abrahamu a nga nyikiwanga xidumbiso hi ku tizrisa Nawu (15-18)
-
Kriste i n’wana wa Abrahamu (16)
-
-
Masungulo ni nkongometo wa Nawu (19-25)
-
Vana va Xikwembu Nkulukumba hi kola ka lipfumelo (26-29)
-
Lava lumbaka Kriste i vana va Abrahamu (29)
-
3 N’wine Vagalatiya, swiphunta ndzrin’wine! Mi tlhamuxeliwe ha hombe leswi lifu dzra Yesu Kriste a mhandzrini dzri hlayaka swone, kutani i mani a mi hlohloteliki kuva mi hambuka?
2 Leswi ni djulaka ku mi vutisa swone* hi leswi: Mi yamukele moya wa ku xwenga hi ku va mi landzre nawu kumbe kuve hi leswi mi kombisiki lipfumelo ka leswi mi swi yingeliki?
3 Xana me phunta ngopfu? A ku sunguleni mi yentxe mintxhumu hi ku fambisana ni moya wa Xikwembu Nkulukumba, ha yini swoswi mi djula ku gamisa hi ku kongomisiwa hi ku kala ku hetiseka loku nga vhanwini?
4 Xana mintxhumu ya yinyingi leyi mi yi tiyiseleliki me yi tiyiselela swa mahala? Na dumba leswaku nakunene a swi vanga swa mahala.
5 Kutani, xana lweyi a mi nyikaka moya wa ku xwenga a tlhela a yentxa mahlolana a makazri kwenu a swi yentxa hi mhaka ya leswi mi landzraka nawu kumbe hi mhaka ya leswi mi kombisaka lipfumelo ka leswi mi swi yingeliki?
6 Swi ve hi ndlela yoleyo ka Abrahamu “a kombise lipfumelo ka Yehovha, kutani a voniwa a li lweyi a lulamiki”.
7 Nakunene ma swi tiva leswaku lava nga ni lipfumelo hi vone va nga vana va Abrahamu.
8 A zritwini dzrake, Xikwembu Nkulukumba a hlaye leswaku a a ta vona vhanu va matiko va li lava va lulamiki hi kola ka lipfumelo, xileswo a zrange a byela Abrahamu na swi nga si na yentxeka a ku: “A matiko hinkwawu ma ta tovokisiwa hi ku tizrisa wene.”
9 Hi ndlela yoleyo, lava nga ni lipfumelo va tovokisiwa kun’we na Abrahamu lweyi a a ni lipfumelo.
10 Hinkwavu lava dumbelaka ka mintizro ya nawu va zrukiwile, hikusa ku tsraliwe leswi: “Mun’wana ni mun’wana lweyi a kalaka a nga tami a yentxa hinkwaswu leswi tsraliwiki a bukwini dzra Nawu a zrukiwile.”
11 Handle ka leswo, swi le livaleni leswaku a nawu a hi wone wu yentxaka leswaku mhunu a voniwa a li lweyi a lulamiki hi Xikwembu Nkulukumba, hikusa “mhunu lweyi a lulamiki a ta hanya hi kola ka lipfumelo”.
12 A Nawu a wu tiseketelanga ka lipfumelo. Kambe, “mun’wana ni mun’wana lweyi a yentxaka mintxhumu leyi, a ta hanya hi kola ka yone”.
13 Kriste a hi xavile, a hi ntsrhunxa ka xizruku xa Nawu hi ku va a va xizruku a matsrhan’wini ya kuva ku va hine, hikusa ku tsraliwe leswi: “Mun’wana ni mun’wana lweyi a hayekiwaka a mhandzrini a zrukiwile.”
14 Leswi swi ve hi ndlela leyo akuva a tovoko dzra Abrahamu dzri ta tela matiko hi kola ka Kriste Yesu, ku yentxela leswaku hi kola ka lipfumelo dzrezru hi kota ku yamukela moya wa ku xwenga lowu Xikwembu Nkulukumba a dumbisiki ku wu nyikela.
15 Vamakwezru, ni vulavula hi ku tizrisa xifaniso lexi tolovelekiki a vhanwini: Loko a xipfumelelanu xo za xi tiyisekisiwa, nambi ko va ntsena hi mhunu mun’we, a nga kone lweyi a nga xi yentxaka xi nga ha tizri kumbe a yengesela swin’wana ka xone.
16 A swidumbiso swi byeliwe Abrahamu ni n’wanake.* A tsralwa a dzri hlayi swone leswaku “ni le ka vanaku”,* ingiki hi loko dzro hlaya vhanu vanyingi. Ku hambana ni leswo dzri li “ni le ka n’wanaku”,* ku komba leswaku i mun’we, ku nga Kriste.
17 Henhla ka hinkwaswu, ni li: A Nawu lowu viki kone ntsrhaku ka 430 wa malembe lama landzreliki a wu xi honisanga xipfumelelanu lexi Xikwembu Nkulukumba a zrangiki a xi yentxa, nambi ku li xidumbiso a wu xi helisanga.
18 Hikusa loko a li leswaku Xikwembu Nkulukumba a nyikela pfindla hi ku tizrisa nawu, swi hlaya leswaku a ka ha li hi ku tizrisa xidumbiso; kambe Xikwembu Nkulukumba a nyike Abrahamu pfindla hi mbilu hinkwayu hi ku tizrisa xidumbiso.
19 Kutani, ha yini ku nyikeliwe Nawu? A Nawu wu nyikeliwe akuva wu paluxa mintxhumu ya ku biha leyi vhanu va yi yentxiki, nakone wu tizre ku ya tlhasa loko ku humelela n’wana* lweyi a xidumbiso xi yentxeliwiki yene; wu nyikeliwe a mavokweni ya mutlhanganisi hi ku tizrisa tintsrumi.
20 Loko a xipfumelelanu xi yentxiwa hi mhunu mun’we a ku vileleki mutlhanganisi, kambe Xikwembu Nkulukumba a xi yentxe na a li wuswakwe.
21 Kutani, xana a Nawu wu lwisana ni swidumbiso swa Xikwembu Nkulukumba? Nakunene a swi xitasu! Hikusa loko a nawu wu nyikeliwe akuva wu kota ku nyika wutomi, nakunene a hi ta voniwa hi li lava lulamiki hi ku va hi landzra nawu.
22 Kambe a Tsralwa dzri kombise leswaku vhanu hinkwavu va fumiwa hi xidoho, akuva a xidumbiso lexi kumiwaka hi kola ka lipfumelo ka Yesu Kriste xi nyikiwa lava kombisaka lipfumelo.
23 Nambitanu, na lipfumelo dzri nga si na tlhasa, a hi zrindzriwa hi nawu, a hi nyikeliwe ka wone akuva wu hi lawula, na hi yimela lipfumelo ledzri a dzri li kusuhi ni ku paluxiwa.
24 Xileswo a Nawu wu ve mukongomisi* wezru wu hi yisa ka Kriste, akuva hi kota ku voniwa hi li lava lulamiki hi kola ka lipfumelo.
25 Kambe leswi kutani a lipfumelo dzri tlhasiki, a ha ha vileli mukongomisi.*
26 Nakunene, hinkwenu mi vana va Xikwembu Nkulukumba hi kola ka lipfumelo ledzri mi nga na dzrone ka Kriste Yesu.
27 Hikusa hinkwenu mi babatisiwiki ka Kriste mi yetisele* Kriste.
28 A ku na Muyuda nambi ku li Mugriki, a ku na xikazrawa nambi ku li mhunu lweyi a ntsrhunxekiki, a ku na wanuna a ku na wansati, hikusa hinkwenu mi mhunu mun’we mi vadondzrisiwa va Kriste Yesu.
29 Xin’wana futsrhi, loko mi lumba Kriste, nakunene mi vana va* Abrahamu, nakone mi vadi va pfindla ledzri dumbisiwiki.
Tintlhamuxelo ta le hansi
^ Hi ku kongoma: “Leswi ni djulaka ku swi tiva kwenu”.
^ Hi ku kongoma: “mbewu yake”.
^ Hi ku kongoma: “timbewu taku”.
^ Hi ku kongoma: “mbewu yaku”.
^ Hi ku kongoma: “mbewu”.
^ Kumbe: “mutlhavukanyisi”.
^ Kumbe: “mutlhavukanyisi”.
^ Hi ku kongoma: “mi yambale”.
^ Hi ku kongoma: “mbewu ya”.
