Papela ledzri yaka ka Vagalatiya 4:1-31
4 Kutani ni hlaya leswaku loko madapfindla a ha li ntsrongwana, a nga hambananga ni nandzra, nambileswi a nga hosi ya mintxhumu hinkwayu,
2 hikusa ku ni vhanu lava mu hlayisaka va tlhela va hlayisa ni yindlu yake, ku ya tlhasa nkama lowu bekiwiki hi papayi wake.
3 Hi lani ku fanaka, na hine, a nkama lowu na ha ha li vatsrongwana a hi li swikazrawa swa mahanyela ni mayanakanyela ya misava leyi.
4 Kambe loko nkama lowu bekiwiki wu tlhasile, Xikwembu Nkulukumba a zrumele N’wanake, lweyi a pswaliwiki hi wansati nakone a a li hansi ka nawu,
5 akuva a huluxa lava nga hansi ka nawu hi ku va xava, leswaku Xikwembu Nkulukumba a hi yentxa vanake.
6 Kutani leswi mi nga vana, Xikwembu Nkulukumba a zrumele moya wa N’wanake a timbilwini tezru, nakone wone wu huwelela wu ku: “Abba,* Papayi!”
7 Xileswo a ma ha li swikazrawa, kambe mi vana; nakone leswi mi nga vana, Xikwembu Nkulukumba a tlhele a mi yentxa vamadapfindla.
8 Nambitanu, a nkama lowu a mi nga mu tivi Xikwembu Nkulukumba, a mi li swikazrawa swa swikwembu swa madzrimi.
9 Kambe leswi swoswi mi tivaka Xikwembu Nkulukumba, kumbe, mi tiviwaka hi Xikwembu Nkulukumba, ha yini mi djula ku tlhelela ka mintxhumu ya ku kala yi nga pfuni ntxhumu ya misava leyi mi tlhela mi ya va swikazrawa swa yone?
10 Mi tikazratela ku hlawulekisa masiku, tihweti, tinguva ni malembe.
11 Ni txhava leswaku a minzamu leyi ni yi yentxiki akuva ni mi pfuna yi nga va yi ve ya mahala.
12 Vamakwezru, na mine ni ke ni fana na n’wine, kambe ni txintxile, xileswo na mi kombela, txintxani ku fana ni leswi na mine ni txintxiki. A mi ni yentxelanga xa ku biha.
13 Kambe ma swi tiva leswaku a ve hi kola ka mavabyi ni viki ni mukhandlu wa ku sungula wa ku mi zrezrela madzrungula lamanene.
14 Nambileswi a ku vabya kwanga ku viki ntsrhwalu kwenu, a mi ni dzrelanga nambi ku ni nyenya,* kambe mi ni yamukelile ingiki hi loko mo yamukela ntsrumi ya Xikwembu Nkulukumba kumbe ingiki hi loko mo yamukela Kriste Yesu.
15 Ku kwini ku nyonxa loku a mi li na kone? Hikusa na tiyiseka leswaku loko a swe koteka, a mi ta va mi xokole ni matihlo yenu mi ni nyika wone.
16 Xana ne ndzruluka nala wenu hi leswi ni mi byelaka ntiyiso?
17 Vavanuna lava, va hisekela ku yiva timbilu tenu, kambe a vo mi navelela leswinene; a matsrhan’wini ya leswo, vo djula ku mi tsravukanisa na mine, akuva mi hisekela ku landzrela vone.
18 Nambitanu, minkama hinkwayu i swinene kuva mhunu a mi hisekela hi nkongometo lowunene kambe a nga swi yentxi ntsena loko ni li na n’wine,
19 n’wine vananga, ni tlhelaka ni lun’wa hi kola kwenu ku fana ni mamana lweyi a nga kusuhi ni ku phuluka nakone ni taka tama ni lun’wa ku ya tlhasa loko mi kombisa wumhunu bya Kriste.
20 A ni navela ku va na n’wine swoswi ni va ni vulavula hi ndlela leyi hambaniki, hikusa na kazrateka hi n’wine.
21 N’wine mi djulaka ku yingiseta nawu, ni byelani: Xana a mi swi tivi leswi Nawu wu hlayaka swone?
22 Hi xikombiso, ku tsraliwe leswaku Abrahamu a ve ni vana vabidzri va madjaha, mun’we a pswaleliwe yene hi nandzra wa xisati kasi lwemun’wana a pswaleliwe yene hi nsati wake lweyi a a ntsrhunxekile;
23 kambe lweyi a pswaleliwiki yene hi nandzra wa xisati a pswaliwe hi ndlela ya ntumbuluku* kasi lweyi a pswaleliwiki yene hi nsati wake a ve hi kola ka xidumbiso.
24 A mintxhumu leyi yo fanekisela; hikusa vavasati lava va yimela swipfumelelanu swibidzri, xin’we xa le Nhaveni ya Sinayi, lexi pswalaka vana lava nga swikazrawa, ku nga Agari.
25 Agari a yimela Sinayi ku nga nhava ya Arabiya, nakone a fanekisela Yerusalema wa namunhla, hikusa a le wukazraweni ni vana vake.
26 Kambe Yerusalema wa le henhla a ntsrhunxekile nakone i mamana wezru.
27 Hikusa ku tsraliwe leswi: “Nyonxa, wene wansati lweyi a kalaka a nga pswali; bana nkulungwana, wene wansati lweyi a kalaka a nga lun’wi; hikusa a vana va wansati lweyi a kalaka a nga pswali i vanyingi ngopfu swinene ku tlula vana va wansati lweyi a nga ni nuna.”
28 Kutani n’wine vamakwezru, mi vana va xidumbiso ku fana na Izaki.
29 Kambe a ku fana ni leswi lweyi a pswaliwiki hi ndlela ya ntumbuluku* a sunguliki ku xanisa lweyi a pswaliwiki hi moya, ni swoswi swi tanu.
30 Nambitanu, a tsralwa dzri li yini? Dzri li: “Hlongola nandzra wa xisati ni n’wanake, hikusa a n’wana wa nandzra wa xisati a nge ti txhuka a va madapfindla kun’we ni n’wana wa wansati lweyi a ntsrhunxekiki.”
31 Xileswo vamakwezru, hine a hi vana va nandzra wa xisati, kambe hi vana va wansati lweyi a ntsrhunxekiki.
Tintlhamuxelo ta le hansi
^ I zritu dzra dzra Xiheberu kumbe Xiyaramayika ledzri dzri tlhamuxelaka leswaku “Oh, Papayi!”
^ Kumbe: “nambi ku ni thukela”.
^ Hi ku kongoma: “hi le nyameni”.
^ Hi ku kongoma: “hi le nyameni”.
