Papela ledzri yaka ka Vagalatiya 5:1-26
5 Kriste a hi ntsrhunxile akuva hi tikholisa hi ntsrhunxeko wolowo. Xileswo tiyani, nakone mi nga pfumeli ku tlhela mi zrwala mpinga wa wukazrawa.
2 Mine Pawulo, ni mi byela leswaku loko mo sokisiwa, Kriste a ta va a nga pfuni ntxhumu kwenu.
3 Ni tlhela ni byela wanuna mun’wana ni mun’wana lweyi a sokisiwaka leswaku a fanela ku landzra Nawu hinkwawu.
4 N’wine mi zamaka ku voniwa mi li lava lulamiki hi ku va mi landzra nawu mi tsravukanile na Kriste; mi tsrhike timpswalu take letikulu.
5 Kambe hine hi yimele ku va lava lulamiki a mahlweni ka Xikwembu Nkulukumba, leswi taka koteka ntsena hi moya wa ku xwenga ni hi lipfumelo dzrezru.
6 Hikusa ka mudondzrisiwa wa Kriste Yesu, a ku soka ni ku nga soki a swi pfuni ntxhumu, kambe a xa lisima i ku va ni lipfumelo ledzri kombisiwaka hi lizrandzru.
7 A ku sunguleni a mi yentxa swone.* I mani lweyi a mi tsrhikisiki ku tama mi yingiseta ntiyiso?
8 A dondzro ya lava va mi tsrhikisaka a yi pfi ka Lweyi a mi vitanaka.
9 A fermentu dzritsrongo dzri kukumukisa mbila hinkwayu.
10 Na tiyiseka leswaku n’wine mi nga vadondzrisiwa va Hosi mi ta pfumelelana na mine, kambe lweyi a mi vangelaka swikazratu, swi nge na mhaka leswaku hi yene mani, a ta yamukela yavanyiso ledzri mu fanelaka.
11 Kambe mine vamakwezru, loko na ha tama ni zrezra mayelanu ni ku soka, ha yini na ha tama ni xanisiwa? Loko na ha tama ni zrezra mayelanu ni ku soka a mhandzri ya nxanisa* a ya ha li xihinga.
12 Ni navela leswaku a vhanu lava zamaka ku mi djikisa va ngo titsrhena.*
13 Vamakwezru, mi vitaneliwe ntsrhunxeko; o va ku mi nga tizrisi ntsrhunxeko lowu swanga mukhandlu wa kuva mi hetisisa ku navela ka nyama, kambe hi lizrandzru tizrelananani.
14 Hikusa a Nawu hinkwawu wu songiwa* hi xileleto xin’we lexi liki: “U fanela ku zrandzra vhanu van’wana* hi ndlela leyi u tizrandzraka ha yone.”
15 Kambe loko mi tama mi lumanana ni ku hahlulelana, mi le nghozini ya ku va mi helisana hi xin’wine.
16 Kambe ni mi byela leswi: Tamani mi kongomisiwa hi moya wa Xikwembu Nkulukumba kutani a mi nge ti txhuka mi yentxa ku navela ka nyama.
17 Hikusa a nyama yi lwisana ni moya wa Xikwembu Nkulukumba hi mhaka ya ku navela ka yone nakone a moya wa Xikwembu Nkulukumba wu lwisana ni nyama; a mintxhumu leyi a yi fambisani, hi leswo swi yentxaka kuva mi nga yentxi mintxhumu leyi mi yi djulaka.
18 Handle ka leswo, loko mi kongomisiwa hi moya wa Xikwembu Nkulukumba a mi le hansi ka nawu.
19 A mintizro ya nyama yi le livaleni, yone hi leyi: swiyentxo swa tingana hi tlhelo dzra tinkuku,* nsila, mahanyela ya ku biha,*
20 ku gandzrela swithombe, wungoma,* mona, timholova, wukwele, mahlundzru, ku kanetana, ku yavana, ku landzrelela tindondzro ta vhanu,
21 matsrhoho, ku popswa, minkhuvu leyi kalaka yi nga lawuleki,* ni mintxhumu ya ku fana ni leyi. Ni mi ba ndleve mayelanu ni mintxhumu leyi hi lani ni samiki ni mi ba ndleve ha kone, ni ku: Lava va yentxaka mintxhumu leyi, a va nge ti nghena a Mfun’wini wa Xikwembu Nkulukumba.
22 Hi tlhelo dzrin’wana, a mihandzru ya moya wa Xikwembu Nkulukumba i lizrandzru, ku nyonxa, ku zrula, ku lehisa mbilu, wumbilu, wunene, lipfumelo,
23 ku nabyala, ku tikhoma. A ku na nawu lowu lwisanaka ni mintxhumu leyi.
24 Handle ka leswo, lava va lumbaka Kriste Yesu va gongondzrele nyama ni ku navela ka yone a mhandzrini.
25 Loko hi pfumelela moya wa Xikwembu Nkulukumba wu kongomisa wutomi byezru, a hi tameni hi hanya hi ku kongomisiwa hi moya wa Xikwembu Nkulukumba.
26 Hi nga txhuki hi tibyela, hi vanga ku phikisana, ni ku tsrhohokana.
Tintlhamuxelo ta le hansi
^ Hi ku kongoma: “A mi tsrutsruma ha hombe”.
^ Vona Ntlhamuxelo Wa Mazritu.
^ Kumbe: “va nga va vatsrheniwa”, hi ndlela yoleyo va nga ha fanekeli ku hetisisa nawu wolowu a va wu yimelela.
^ Hi ku kongoma: “wu hetisisiwa”.
^ Kumbe: “walekwenu”.
^ Hi Xigriki: porneía. Vona Ntlhamuxelo Wa Mazritu.
^ Kumbe: “mahanyela ya tingana”. Hi Xigriki: asélgeia. Vona Ntlhamuxelo Wa Mazritu.
^ Kumbe: “wuloyi”.
^ Kumbe: “minkhuvu ya mpfilumpfilu”.
