Papela ledzri yaka ka Varoma 1:1-32
1 Mine Pawulo, xikazrawa xa Kriste Yesu ni vitaneliwiki ku va mupostola nakone ni hlawuliwiki akuva ni zrezra madzrungula lamanene ya Xikwembu Nkulukumba,
2 lawa a ma dumbisiki khale a Matsralweni ya ku xwenga hi ku tizrisa vaprofeta vake,
3 mayelanu ni N’wanake lweyi a pswaliwiki lixakeni dzra* Davhida
4 kambe hi ntamu wa moya wa ku xwenga a vitaniwiki N’wana wa Xikwembu Nkulukumba hi ku pfuxiwa ku feni (ina, Yesu Kriste Hosi yezru.
5 Ha yene hi yamukele timpswalu letikulu ni wupostola, akuva vhanu va matiko hinkwawu va kota ku kombisa lipfumelo ni ku mu yingiseta akuva ku dzrumisiwa vito dzrake,
6 na n’wine mi hlawuliwe ka wone matiko wolawo akuva mi lumba Yesu Kriste)
7 ni tsralela hinkwenu mi nga Roma, n’wine lava zrandzriwaka hi Xikwembu Nkulukumba nakone mi vitaneliwiki ku va vaxwengi:
Ingiki mi nga va ni timpswalu letikulu ni ku zrula leswi pfaka ka Xikwembu Nkulukumba Papayi wezru ni le ka Hosi yezru Yesu Kriste.
8 Ku sungula, hi vito dzra Yesu Kriste ni tlangela Xikwembu Nkulukumba hi mhaka yenu hinkwenu, hikusa a lipfumelo dzrenu ku vulavuliwa ha dzrone a misaveni hinkwayu.
9 Hikusa Xikwembu Nkulukumba lweyi ni mu yentxelaka ntizro wa ku xwenga hi mbilu yanga hinkwayu hi ku twalisa madzrungula lamanene mayelanu ni N’wanake, i mboni ya leswaku minkama hinkwayu a ni tsrhiki ku mi patsra swikhongotweni swanga,
10 na ni kombela leswaku loko swi koteka, hi ku ya hi ku zrandzra ka Xikwembu Nkulukumba, ni za ni swi kota ku mi yendzrela.
11 Hikusa ni swi navela ngopfu ku mi vona, akuva ni ta mi nyika nyiko ya kukazri ya moya leswaku mi ta tiyisiwa;
12 kumbe leswaku hi ta tiyisana hi lipfumelo ledzri hi nga na dzrone, mine kun’we na n’wine.
13 Kambe vamakwezru, ni djula mi swi tiva leswaku ku dzringana makhambi manyingi ni djule ku mi yendzrela akuva ni ta kuma mihandzru leyinene ya ku zrezra kwanga kohalanu hi lani swi nga ha kone a matikweni man’wana, kambe ku ta tlhasa swoswi ni siveliwile.
14 Ni ni xikweneti ka Vagriki ni ka lava kalaka va nga li Vagriki,* ka lava dondzrekiki ni ka lava kalaka va nga dondzrekanga;
15 xileswo na n’wine halanu Roma ni swi navela ngopfu ku mi zrezrela madzrungula lamanene.
16 A ni daniseki hi madzrungula lamanene; hikusa nakunene wone i ntamu wa Xikwembu Nkulukumba lowu a wu tizriselaka ku huluxa hinkwavu lava nga ni lipfumelo, ku sungula hi Muyuda ku landzrela Mugriki.
17 Hikusa hi madzrungula lamanene Xikwembu Nkulukumba a kombisa wululami byake ka lava va mu kholwaka nakone leswo swi tiyisa lipfumelo dzravu, hi lani swi tsraliwiki ha kone: “Kambe mhunu lweyi a lulamiki a ta hanya hi kola ka lipfumelo.”
18 Hikusa Xikwembu Nkulukumba lweyi a nga tilweni, a kombisa mahlundzru yake ka vhanu lava kalaka va nga djuli ku mu yingiseta ni lava kalaka va nga lulamanga, lava yentxaka mintxhumu leyi kalaka yi nga lulamanga akuva va sivela vhanu ku tiva ntiyiso,
19 hikusa Xikwembu Nkulukumba a va nyike xikombiso lexi khanyiki akuva va kota ku mu tiva ha hombe.
20 Hikusa nambileswi Xikwembu Nkulukumba a kalaka a nga voniwi ku sukela loko misava yi tumbuluxiwile, swa koteka kuva vhanu va tiva leswaku a ni ntamu lowu nga helikiki ni leswaku i Xikwembu Nkulukumba hakunene, hikusa va nga swi xiya ka mintxhumu leyi tumbuluxiwiki, lakakuva va nga ha na xa ku tiyimelela ha xone.
21 Hikusa nambileswi a va mu tiva Xikwembu Nkulukumba, a va mu dzrumisanga swanga Xikwembu Nkulukumba nambi ku li ku mu tlangela, kambe va pimise mintxhumu ya ku kala yi nga pfuni ntxhumu nakone a timbilu tavu ta ku kala ti nga tlhazrihanga a ti twisisanga ntxhumu.
22 Nambileswi a va tibyela leswaku va tlhazrihile, va ndzruluke swiphunta.
23 A matsrhan’wini ya ku twalisa Xikwembu Nkulukumba lweyi a hanyaka hi lani ku nga helikiki, va twalisa swifaniso leswi fanaka ni vhanu lava faka, swifaniso leswi fanaka ni tinyanyana, swihazri swa mune wa minenge, kun’we ni swihazri swa ku famba hi khuzri.*
24 Xileswo Xikwembu Nkulukumba a va pfumelele ku hetisisa ku navela ka timbilu tavu ka manyala, kutani va yentxa mintxhumu ya tingana hi mizri wavu.
25 Va txintxe ntiyiso wa Xikwembu Nkulukumba va wu yentxa madzrimi, va gandzrela ntumbuluku va tlhela va wu yentxela ntizro wa ku xwenga a matsrhan’wini ya ku swi yentxela Xikwembu Nkulukumba lweyi a dzrumisiwaka hi lani ku nga helikiki. Amen.
26 Hi leswo swi yentxiki kuva Xikwembu Nkulukumba a va tsrhika va va ni ku navela ka swa tinkuku loku nga ni tingana, hikusa vavasati va tsrhike ku yentxa swa tinkuku hi ndlela ya ntumbuluku kambe va swi yentxa hi ndlela leyi nga liki ya ntumbuluku;
27 hi lani ku fanaka, vavanuna na vone va tsrhike ku yentxa swa tinkuku ni vavasati ku nga leswi swi nga swa ntumbuluku, va sungula ku pfuzra hi ku navelana hi xivone, vavanuna ni vavanunakulobye, va yentxa mintxhumu ya nsila, kambe va ta khatisiwa hi lani ku dzringanaka* mintizro yavu ya ku biha.
28 Leswi va swi voniki swi nge na lisima ku tiva Xikwembu Nkulukumba, Xikwembu Nkulukumba a va tsrhike va tama va va ni miyanakanyu yoleyo leyi kalaka yi nga pfuni ntxhumu, xileswo va yentxa mintxhumu leyi a va nga fanelanga va yi yentxa.
29 Va tale hi mintxhumu hinkwayu leyi kalaka yi nga lulamanga, wubihi, makwanga,* matsrhoho, ku dlaya, timholova, wukanganyisi, nsele, mahlevo,
30 ku lumbeta, ku nyenya Xikwembu Nkulukumba, ku zruketela, ku tikulisa, ku tibyela, ku kunguhata mintxhumu ya ku biha, ku nga yingiseti vapswele,
31 ku pfumala ku twisisa, ku kala ku hetisisa swidumbiso swavu, ku pfumala lizrandzru ni timpswalu.
32 Nambileswi va wu tivaka ha hombe nawu wa ku lulama wa Xikwembu Nkulukumba, wa leswaku lava yentxaka mintxhumu yoleyo va faneliwa hi ku fa, va tama va yi yentxa va tlhela va seketela lava yi yentxaka.
Tintlhamuxelo ta le hansi
^ Hi ku kongoma: “ka mbewu ya”.
^ Hi ku kongoma: “Vabarbara”.
^ Kumbe: “leswi kokovaka”.
^ Kumbe: “va ta kuma hakelo ledzri dzringanaka”.
^ Kumbe: “wunavenave”.
