Papela ledzri yaka ka Varoma 11:1-36
11 Kutani na vutisa, xana Xikwembu Nkulukumba a va fulazrelile vhanu vake? Nikutsrongo! Hikusa na mine ni Muisrayele, ntukulu wa* Abrahamu, wa lixaka dzra Benjamini.
2 Xikwembu Nkulukumba a nga va fulazrelanga vhanu vake, lava a va hlawuliki ku sunguleni. Xana a mi swi tivi leswi tsralwa dzri swi hlayaka mayelanu na Eliya, loko a khongote ka Xikwembu Nkulukumba a hlayela Vaisrayele?
3 A te: “Yehovha, va dlaye vaprofeta vaku, va gilhita a maaltari yaku, ke sala mine nakone swoswi va zama ku ni dlaya.”
4 Kambe Xikwembu Nkulukumba a mu hlamule swaku yini? A te: “Na ha ni 7.000 wa vavanuna lava kalaka va nga mu khinsamelanga Bali.”
5 Ni swoswi swa ha li hi ndlela yoleyo, ku ni lava saliki ka lava hlawuliwiki hi kola ka timpswalu letikulu ta Xikwembu Nkulukumba.
6 Kutani loko ku hlawuliwa koloko ku li hi kola ka timpswalu letikulu ta Xikwembu Nkulukumba, swi hlaya leswaku a ku yi hi mintizro; loko a vo hlawuliwa hi ku ya hi mintizro a ku nge ti va timpswalu letikulu.
7 Kutani hi nga kuyini? Leswi Israyele a a swi djuletela ngopfu a nga swi kumanga, kambe swi kumiwe hi vahlawuliwa. Lavan’wana va tlanyalise timbilu tavu,
8 hi lani Matsralwa ma hlayaka ha kone ma ku: “Xikwembu Nkulukumba a yentxe leswaku va khutsriyela ngopfu swinene hi tlhelo dzra moya lakakuva matihlo yavu ma nga voni ni tindleve tavu ti nga yingeli ku ta tlhasa namunhla.”
9 Handle ka leswo, Davhida a li: “A minkhuvu yavu a yi ve* ntlhamu akuva va wa kutani va khatisiwa.”
10 A matihlo yavu a ma ve munyama akuva va nga voni, nakone yentxa leswaku a minhlana yavu yi tsrhama na yi gotsrhekile.
11 Xileswo na vutisa: Xana Vayuda va titlirinye* va wa lakakuva va nge he ti swi kota ku pfuka? Nakunene a swi xitasu! Kambe leswi va dohiki swi yentxe leswaku vamatiko va kuma ku huluxiwa, leswi yentxiki leswaku Vayuda va va ni matsrhoho.
12 Kutani leswi ku doha kwavu ku tiseliki misava matovoko, nakone ku pumbeka kwavu ku yentxiki leswaku vhanu va matiko va tovoka, a ha ha hlayi matovoko lawa ma taka va kone loko nhlayu yavu yi ta va yi tlhanganisiwile!
13 Swoswi ni vulavula na n’wine vhanu va matiko. Leswi ni nga mupostola lweyi a zrumeliwiki ka vamatiko, ni hlawulekisa* ntizro lowu ni wu yentxelaka Xikwembu Nkulukumba
14 akuva hi ndlela ya kukazri ni yentxa leswaku lava ku fana na mine va nga Vayuda, va va ni matsrhoho mayelanu ni leswi n’wine mi swi yamukeliki kutani ni huluxa van’we vavu.
15 A ku txukumetiwa ka Vayuda ku yentxe leswaku van’we a misaveni va va ni wuxaka* na Xikwembu Nkulukumba. Loko swoswi Xikwembu Nkulukumba a tlhela a yamukela van’we ka Vayuda, swi ta va na swi fana ni loko a va pfuxa ka lava fiki.
16 Handle ka leswo, loko mapawu lawa ma zrangaka ma hambiwa ku sukela ka mbila ya kukazri ma xwengile, na yo mbila hinkwayu yi xwengile; nakone loko limitsru dzri xwengile, na wo mazrwavi ma xwengile.
17 Nambitanu, loko ku phatluliwe mazrwavi ya kukazri ku gama ku khuleketiwa wene kutani u sungula ku tikholisa hi mati ya manene lama pfaka ka limitsru dzra nsinya wolowo wa nhlwazri nambileswi wene u nga zrwavi dzra nsinya wa nhlwazri wa nhova,
18 u nga tibyeli leswaku wa yampswa ku tlula mazrwavi laman’wana. Loko u tibyela leswaku wene wa yampswa ku ma tlula, dzrimuka leswaku a wu zrwalanga limitsru, kambe a limitsru hi dzrone dzri zrwaliki wene.
19 Van’we venu va ta ku: “A mazrwavi laman’wana ma tsrhoviwile akuva ku khuleketiwa mine.”
20 Leswo i ntiyiso! Va tsrhoviwile hikusa va pfumale lipfumelo, kambe wene wa ha tiyile hikusa u ni lipfumelo. Xileswo u nga tibyeli, kambe tivoneli.
21 Hikusa loko Xikwembu Nkulukumba a nga ma tsretsrelelanga mazrwavi lawa a ma li ka nsinya wolowo ha khale nambi wene a nge ti ku tsretsrelela.
22 Xileswo byi tekeli nhlokweni wunene bya Xikwembu Nkulukumba ni ku khatisa kwake. A khatisa lava wiki, kambe wene a ku komba wunene, nakone a ta tama a ku komba byone, ntsena loko wa ha tama u yentxa leswi swi taka ku yentxa u faneliwa hi wunene byake; kambe loko u nga yentxi leswo na wene u ta tsremiwa.
23 Loko na vone va sungula ku kombisa lipfumelo, va ta khuleketiwa, hikusa Xikwembu Nkulukumba a nga swi kota ku tlhela a va khuleketa a nsinyeni.
24 Hikusa loko wene we ke tsremiwa ka nsinya wa nhlwazri lowu nga wa nhova hi ntumbuluku wa wone, kutani u ta khuleketiwa ka nsinya wa nhlwazri lowu we ke yentxa hi ku byaliwa, ku nga leswi nga liki swa ntumbuluku, a ha ha hlayi mazrwavi lawa ma nga ya nsinya wolowo hi ntumbuluku, swi nga nabyala ngopfu kuva ma tlhela ma khuleketiwa ka wone!
25 Hikusa vamakwezru, ni djula leswaku mi xi tiva xihundla lexi xa ku xwenga akuva mi nga tibyeli leswaku mi tlhazrihile. Nakunene leswi Xikwembu Nkulukumba a swi yentxaka swi tama swi va xihundla, hi leswi: Van’we ka Vaisrayele va tlanyalise timbilu tavu nakone swi ta tama swi va hi ndlela yoleyo ku ya tlhasa loko nhlayu hinkwayu ya vhanu va matiko yi hlengeletiwa,
26 kutani hi ndlela yoleyo Vaisrayele hinkwavu va huluxiwa. Hi lani Matsralwa ma hlayaka ha kone ma ku: “A muhuluxi* a ta ta a pfa Siyoni, kutani a yentxa leswaku a vana va Yakobe va tsrhika wubihi hinkwabyu.
27 Nakone lexi hi xo xipfumelelanu lexi ni taka xi yentxa na vone loko ni susa swidoho swavu.”
28 Nakunene, van’we vavu i valala va madzrungula lamanene, nakone leswo swi yentxe leswaku n’wine mi pfuneka; kambe Xikwembu Nkulukumba a va hlawulile nakone awa va zrandzra hi mhaka ya vakokwana vavu.
29 Hikusa Xikwembu Nkulukumba a nge ti tisola hi ku nyikela mintxhumu leyi a yi nyikelaka nambi ku tisola hi ku vitana lava a va vitanaka.
30 Hikusa ku fana ni leswi n’wine a mi nga mu yingiseti Xikwembu Nkulukumba kambe swoswi mi kombisiwiki timpswalu hi mhaka ya ku kala ku yingiseta kwavu,
31 na vone swoswi a va mu yingiseti Xikwembu Nkulukumba, leswi yentxaka leswaku Xikwembu Nkulukumba a mi komba timpswalu, kambe va nga kombisiwa timpswalu ku fana ni leswi na n’wine mi kombisiwiki timpswalu.
32 Hikusa vhanu hinkwavu a va yingiseti, nakone Xikwembu Nkulukumba a va tsrhike ka xiyimu xolexi akuva a ta komba vhanu hinkwavu timpswalu.
33 A hi ku yenta ka wupfundzri, wutlhazri ni wutivi bya Xikwembu Nkulukumba, a ku yavanyisa kwake ni tindlela take a swi koteki ku swi twisisa hi ku helela!
34 Hikusa “i mani lweyi a tivaka miyanakanyu ya Yehovha nakone i mani lweyi a nga vaka mutlhavukanyisi wake?”*
35 Kumbe, “i mani lweyi a zrangiki a nyika Xikwembu Nkulukumba ntxhumu wa kukazri, lakakuva swi fanela kuva Xikwembu Nkulukumba a mu hakela?”
36 Hikusa mintxhumu hinkwayu yi pfa kwake, yi kone hi kola kwake nakone i yake. A a dzrumisiwi hi lani ku nga helikiki. Amen.
Tintlhamuxelo ta le hansi
^ Hi ku kongoma: “mbewu ya”.
^ Hi ku kongoma: “A menza wavu a wu ve”.
^ Kumbe: “va tikhenye”.
^ Kumbe: “ni wu nyika lisima”.
^ Kumbe: “va tlhelelana”.
^ Hi ku kongoma: “A muntsrhuxi”.
^ Kumbe: “i mani a nga mu baka ndleve?”
