Papela ledzri yaka ka Varoma 16:1-27
16 Ni mi tsratsriya leswaku mi yamukela* Febe makwezru wa xisati lweyi a tizrelaka bandla dzra le Kenkereya.
2 Sizani mi mu yamukela hi ndlela leyi fanelaka vhanu va Hosi lava xwengiki mi tlhela mi mu pfuna ka xin’wana ni xin’wana lexi a nga ha xi vilelaka hikusa na yene a pfune vanyingi, ku patsra na mine.
3 Ni dzrungulelani Prixka* na Akila lava hi tizraka xikan’we a ntizrweni wa Kriste Yesu.
4 Vone va beke wutomi byavu a nghozini hi mhaka yanga nakone a hi mine ntsena ni va tlangelaka kambe ni mabandla hinkwawu ya vamatiko ma va tlangela.
5 Nakone dzrungulani bandla hinkwadzru ledzri tlhanganaka a kaya kwavu. Dzrungulani Epenetu lweyi ni mu zrandzraka ngopfu, lweyi a viki mun’we wa valandzreli va Kriste va ku sungula a Aziya.
6 Dzrungulani Mariya, lweyi a mi tizreliki ngopfu.
7 Dzrungulani Androniku na Yuniya maxaka yanga tlhelo swib’otxhwakulozri, vavanuna lava nga ni ndhuma leyinene a makazri ka vapostola nakone ku nga khale va li valandzreli va Kriste ku tlula mine.
8 Ni dzrungulelani Ampiliyatu, munghanu wanga lweyi a zrandzrekaka a Hosini.
9 Dzrungulani Urbano, lweyi a tizraka na hine a ntizrweni wa Kriste kun’we na Xitakiyo, munghanu wanga lweyi a zrandzrekaka.
10 Dzrungulani Apelesi nandzra wa Kriste lweyi a yamukelekaka. Dzrungulani ndangu wa Arixtobulu.
11 Dzrungulani Herodiyoni, xaka dzranga. Dzrungulani vandangu wa ka Narkiso lava nga valandzreli va Hosi.
12 Dzrungulani Trifena na Trifoza, vavasati lava tizraka ngopfu a ntizrweni wa Hosi. Dzrungulani Persida makwezru wa xisati lweyi a zrandzrekaka, hikusa a tizre ngopfu a ntizrweni wa Hosi.
13 Dzrungulani Rufu nandzra wa Hosi lweyi a hlawuliwiki, nakone dzrungulani mamana wake lweyi a nga mamana ni kwanga.
14 Dzrungulani Asinkritu, Flegone, Hermisi, Patrobasi na Hermasi kun’we ni vamakwezru lava va nga na vone.
15 Dzrungulani Filologo na Yuliya, Nereya kun’we ni makwavu wa xisati, na Olimpasi kun’we ni vaxwengi hinkwavu lava va nga na vone.
16 Losananani hi ku n’quntana ka ku xwenga,* a mabandla hinkwawu ya Kriste ma mi dzrungula.
17 Na mi tsratsriya vamakwezru, leswaku mi tivonela ka lava va vangaka ku yavana ni ku tsranisa lipfumelo dzra van’wana, ku nga leswi lwisanaka ni leswi mi swi dondzriki, fambelani kule na vone.
18 Hikusa vhanu lavo a va tizreli Hosi yezru Kriste kambe va tizrela ku navela kwavu,* va kanganyisa vhanu lava kalaka va nga tlhazrihanga hi ku tizrisa mazritu ya ku nyonxisa ni lawa ma tikombaka ingiki i manene.
19 Kambe vhanu hinkwavu va swi tiva leswaku n’wine ma yingiseta nakone leswo swa ni nyonxisa. Nambitanu, ni djula leswaku ka leswinene mi va lava tlhazrihiki, kambe ka leswa ku biha mi va lava kalaka va nga tlhazrihanga.
20 Ku nga li khale Xikwembu Nkulukumba lweyi a nyikanaka ku zrula a ta pfotlosa Sathana a hansi ka minkondzro yenu. Ingiki a timpswalu letikulu ta Hosi yezru Yesu ti nga va na n’wine.
21 Timotewu mutizrikulozri awa mi dzrungula; Lukiyu, Yasoni na Sosipatro, maxaka yanga, na vone va mi dzrungula.
22 Mine Tertiyu, ni tsraliki papela ledzri, na mi dzrungula hi vito dzra Hosi.
23 Gayu lweyi a ni yamukeliki swanga muyeni wake nakone a bandla hinkwadzru dzri hlengeletanaka a kaya kwake, awa mi dzrungula. Eraxtu mutameli wa mali ya doropa, awa mi dzrungula, na ye makwavu Kwarto awa mi dzrungula.
24 *——
25 Xikwembu Nkulukumba a nga mi tiyisa hi ku tizrisa madzrungula lamanene lawa ni ma zrezraka mayelanu na Yesu Kriste, lama yelanaka ni xihundla xa ku xwenga lexi fihliwiki ku dzringana malembe manyingi
26 kambe lexi swoswi xi paluxiwiki nakone ku tizrisiwiki Matsralwa ya wuprofeta akuva xi tiviwa hi vhanu hinkwavu, leswi swi fambisana ni xileleto xa Xikwembu Nkulukumba lweyi a hanyaka lweyi a zrandzraka leswaku vhanu va matiko hinkwawu va va ni lipfumelo kwake va tlhela va mu yingiseta;
27 Xikwembu Nkulukumba, lweyi a nga yene ntsena lweyi a tlhazrihiki, a a dzrumisiwi hi ku tizrisa Yesu Kriste hi lani ku nga helikiki. Amen.
Tintlhamuxelo ta le hansi
^ Kumbe: “Ni mi tivisa”.
^ Lweyi a tlhelaka a tiviwa hi dzra ku Prisila.
^ Kumbe: “Losananani hi lizrandzru”.
^ Kumbe: “makhuzri yavu”.
^ Mazritu ya ndzrimana leyi a ma kone ka matsralwa ya khale.
