Papela ledzri yaka ka Varoma 4:1-25
4 Loko swi li hi ndlela leyo hi nga hlaya leswaku kokwana wezru Abrahamu a kume yini?
2 Hi xikombiso, loko Abrahamu a e voniwa a li lweyi a lulamiki hi kola ka mintizro yake a a ta va ni xivangelo xa ku tibyela, kambe ku nga li mahlweni ka Xikwembu Nkulukumba.
3 Kasi a tsralwa dzri li yini? dzri li: “Abrahamu a kombise lipfumelo ka Yehovha, kutani a voniwa a li lweyi a lulamiki.”
4 Loko mhunu a tizra akuva a tikumela swa ku tihanyisa, a muholo wake a wu voniwi swanga nyiko* kambe wu voniwa swanga ntxhumu lowu mu lumbaka.*
5 Ku hambana ni leswo, a mhunu lweyi a kalaka a nga tizri kambe a kombisaka lipfumelo ka Xikwembu Nkulukumba, Xikwembu Nkulukumba lweyi a hlayaka leswaku mhunu a lulamile nambiloko a li mudohi, a vona lipfumelo dzra mhunu yelweyo swanga ku lulama.
6 Davhida na yene a vulavula hi ku nyonxa ka mhunu lweyi Xikwembu Nkulukumba a mu vonaka na a lulamile kambe na ku nga li hi mhaka ya mintizro leyi a yi yentxiki, a ku:
7 “Va nyonxa lava dzrivaleliwiki mintizro yavu ya ku biha, ni lava swidoho swavu swi dzrivaliwiki;*
8 awa nyonxa mhunu lweyi xidoho xake Yehovha a taka kala a nga xi beki miyanakanywini.”
9 Kutani ke, xana a ku nyonxa koloko ko tela vhanu lava sokiki ntsena, kumbe ni lava kalaka va nga sokanga? Hikusa hi li: “A lipfumelo ledzri Abrahamu a a li na dzrone dzri yentxe leswaku a voniwa a li lweyi a lulamiki.”
10 A voniwe a li lweyi a lulamiki loko swi te yini? Loko a sokile kumbe na a nga si na soka? Loko a nga si na soka.
11 Ntsrhaku ka leswo Xikwembu Nkulukumba a mu byele leswaku a soka swanga xikombiso. A ku soka koloko a ku li xitiyisekiso xa* leswaku a voniwe a li lweyi a lulamiki hi kola ka lipfumelo ledzri a dzri kombisiki na a nga si na soka, akuva a va papayi wa hinkwavu lava nga ni lipfumelo nambiloko va nga sokanga, ku yentxela leswaku na vone va voniwa va li lava lulamiki;
12 a tlhele a va papayi wa lava va sokiki, nambitanu, ku nga li ntsena wa lava sokiki kambe ni wa lava va yetiselaka ha hombe lipfumelo ledzri papayi wezru Abrahamu a a li na dzrone na a nga si na soka.
13 Hikusa a ku vanga nawu wu yentxiki leswaku Abrahamu kumbe vanake va* yamukela xidumbiso xa leswaku Abrahamu a fanela ku va mu di wa pfindla dzra misava, kambe kuve hi leswi a voniwiki a li lweyi a lulamiki hi mhaka ya lipfumelo.
14 Hikusa loko a li leswaku vhanu va ta da pfindla hi ku va va landzra nawu, a lipfumelo dzri kumeka dzri nga ha pfuni ntxhumu, na xo xidumbiso lexi yentxeliwiki Abrahamu xi va xi nga ha li xa ntxhumu.
15 Hi ntshimantshima a Nawu wu pfuxa mahlundzru, kambe lani ku nga liki na nawu, nambi ku tlula nawu a ku kone.
16 Hi leswo swi yentxaka leswaku a xidumbiso xi kumiwa hi kola ka lipfumelo akuva xi ta va timpswalu letikulu ta Xikwembu Nkulukumba, ku yentxela leswaku vana hinkwavu va* Abrahamu va kuma xidumbiso lexi, ku nga li ntsena lava yingisetaka Nawu kambe ni lava va kombisaka lipfumelo dzra ku fana ni dzra Abrahamu, lweyi a nga papayi wa hinkwezru.
17 (Leswo hi leswi Matsralwa ma swi hlayaka ma ku: “Ni ku yentxe u va papayi wa matiko manyingi.”) Abrahamu a kombise lipfumelo ka Xikwembu Nkulukumba, lweyi a yentxaka leswaku vafi va hanya nakone a vulavulaka hi mintxhumu leyi kalaka yi nga li kone ingiki hi loko yi li kone.*
18 Nambileswi a swi tikomba ingiki a swi nge he ti koteka leswaku a va ni vana, Abrahamu a a ni lipfumelo dzra leswaku a a ta va papayi wa matiko manyingi hi ku ya hi leswi a a byeliwe swone, swaku: “A vana vaku va ta va vanyingi* hi ndlela leyi.”
19 Nakone nambileswi lipfumelo dzrake a dzri nga tsrananga, a a yanakanya leswaku a nge he ti swi kota ku va ni vana, (swanga hi leswi a a ni kolomu ka 100 wa malembe), ni hi leswi a a tiva leswaku Sara a a duhwale ngopfu lakakuva a nga va ni vana.
20 Kambe hi mhaka ya xidumbiso xa Xikwembu Nkulukumba, a nga zanga a ganaganeka kumbe ku heleliwa hi lipfumelo; ku hambana ni leswo, lipfumelo dzrake dzri mu tiyisile, a dzrumisa Xikwembu Nkulukumba
21 a tlhela a tiyiseka hi ku helela leswaku leswi Xikwembu Nkulukumba a mu dumbisiki swone a ta swi kota ku swi hetisisa.
22 Hi mhaka ya leswo, a voniwe a li “lweyi a lulamiki”.
23 Nambitanu, a mazritu lama liki: “A voniwe a li lweyi a lulamiki” a ma tsraliwanga hi mhaka yake ntsena,
24 kambe ni hi mhaka yezru, na hine hi ta voniwa hi li lava lulamiki, hikusa hi ni lipfumelo kwake, Yene lweyi a pfuxiki Yesu Hosi yezru a ku feni.
25 Yesu a nyikeliwe hi mhaka ya swidoho swezru nakone a pfuxiwile akuva hi ta kota ku voniwa hi li lava lulamiki.
Tintlhamuxelo ta le hansi
^ Kumbe: “timpswalu letikulu”.
^ Kumbe: “lowu a wu li xikweneti”.
^ Kumbe: “swi funeketiwiki”.
^ Hi ku kongoma: “mfungu wa”.
^ Hi ku kongoma: “mbewu yake yi”.
^ Hi ku kongoma: “mbewu hinkwayu ya”.
^ Kumbexana: “a vitanaka mintxhumu leyi nga liki kone akuva yi va kone”.
^ Hi ku kongoma: “A mbewu yaku yi ta va yinyingi”.
