Papela ledzri yaka ka Varoma 5:1-21
5 Xileswo, leswi kutani hi voniwiki hi li lava lulamiki hi kola ka lipfumelo dzrezru, a hi tikholiseni hi ku zrula loku hi nga na kone* na Xikwembu Nkulukumba hi kola ka Hosi yezru Yesu Kriste,
2 lweyi hi mhaka ya lipfumelo ledzri hi nga na dzrone a yentxiki leswaku swi koteka ku va hi kuma timpswalu letikulu ni ku va ni wuxaka na Xikwembu Nkulukumba. Kutani a hi nyonxeni* hikusa hi ni dumbo dzra leswaku Xikwembu Nkulukumba a ta hi tlakuxa.*
3 Ku nga li leswo ntsena, kambe a hi nyonxeni* loko hi xaniseka, hikusa hi lani hi swi tivaka ha kone a ku xaniseka ku hi pfuna ku tiyisela;
4 a ku tiyisela ku hi yentxa hi yamukeleka ka Xikwembu Nkulukumba; a ku yamukeleka kwake ku hi nyika dumbo,
5 nakone a dumbo a dzri hi yentxi hi daniseka; hikusa Xikwembu Nkulukumba a tizrisa moya wake wa ku xwenga lowu a hi hananaka wone, akuva a kombisa leswaku awa hi zrandzra.
6 Hikusa nakunene na ha ha li vadohi,* Kriste hi nkama lowu bekisiwiki a fele vhanu lava nga mu txhavikiki Xikwembu Nkulukumba.
7 Swi nga ha kazrata kuva mhunu wa kukazri a fela mhunu lweyi a lulamiki; nambileswi n’waninkama mhunu wa kukazri a nga ha tiyimiselaka ku fela mhunu lweyi a nga munene.
8 Kambe Xikwembu Nkulukumba a kombise leswaku awa hi zrandzra, hikusa nambileswi a ha ha li vadohi, Kriste a hi felile.
9 Kutani, leswi swoswi hi voniwaka hi li lava lulamiki hi mhaka ya ngati ya Yesu, hi nga tiyiseka hi ku helela leswaku ha yene hi ta kuma ku huluxiwa ka mahlundzru ya Xikwembu Nkulukumba.
10 Hikusa nambileswi a hi li valala va Xikwembu Nkulukumba, hi lifu dzra N’wanake hi ndzruluke vanghanu vake,* a ha ha hlayi leswi kutani hi nga vanghanu vake,* hi ta huluxiwa hi wutomi bya Yesu.
11 Kambe ku nga li leswo ntsena, hi tlhela hi nyonxa hi leswi Xikwembu Nkulukumba a hi yentxeliki swone hi ku tizrisa Hosi yezru Yesu Kriste, lweyi ha yene swoswi swi kotekaka kuva hi va ni wunghanu* na Xikwembu Nkulukumba.
12 Kutani, ku fana ni leswi xidoho xi ngheniki misaveni hi mhunu mun’we, ni ku fa ku ve kone hi mhaka ya xidoho, xileswo a lifu dzri tlulele vhanu hinkwavu hikusa hinkwavu va dohile . . . .
13 Hikusa a xidoho xi zrange xi va kone a misaveni na Nawu wu nga si na va kone, kambe loko ku nge na nawu a ku nge hlayiwi leswaku vhanu va dohile.
14 Nambitanu, a lifu dzri fume ku sukela a nkameni wa Adamu ku ya tlhasa a masikwini ya Moxe, dzri fume nambi ku li ka lava kalaka va nga yentxanga xidoho xa ku fana ni xa Adamu, lweyi a a fana ni lweyi a a ha li ku teni.
15 Kambe a nyiko ya Xikwembu Nkulukumba a yi fani ni xidoho xa Adamu. Hikusa vhanu vanyingi va file hi mhaka ya xidoho xa mhunu mun’we, kambe a timpswalu ta Xikwembu Nkulukumba ni nyiko yake ya mahala leswi a swi nyikelaka hi kola ka timpswalu letikulu hi mhunu mun’we, Yesu Kriste, i swikulu ngopfu! Hi ku tizrisa nyiko leyi, Xikwembu Nkulukumba a txhululela vhanu vanyingi matovoko ya ku tala ngopfu swinene.
16 Nakone leswi tisiwaka hi nyiko ya mahala ya Xikwembu Nkulukumba, a swi fani ni leswi tisiwaka hi xidoho xa mhunu mun’we. Hikusa xidoho lexi yentxiwiki hi mhunu mun’we xi yentxe leswaku vhanu hinkwavu va voniwa nandzru, kambe a nyiko ya mahala ya Xikwembu Nkulukumba leyi viki kone ntsrhaku ka swidoho swinyingi, yi yentxe leswaku vhanu va voniwa va li lava lulamiki.
17 Hikusa loko lifu dzri kote ku fuma hi mhaka ya xidoho xa mhunu mun’we, a ha ha hlayi lava yamukelaka timpswalu letikulu na ti li tinyingi kun’we ni nyiko ya mahala ya kuva va voniwa va li lava lulamiki, va ta hanya akuva va fuma swanga tihosi hi kola ka mhunu mun’we, Yesu Kriste!
18 Kutani ke, ku fana ni leswi xidoho xin’we xi yentxiki leswaku vhanu hinkwavu va voniwa nandzru, na xo xiyentxo xin’we xa ku lulama xi yentxe leswaku vhanu hinkwavu va voniwa va li lava lulamiki akuva va kuma wutomi.
19 Hikusa ku fana ni leswi ku kala ku yingiseta ka mhunu mun’we ku yentxiki leswaku vhanu vanyingi va va vadohi, hi ndlela leyi fanaka, vhanu vanyingi va ta va lava lulamiki hi mhaka ya ku yingiseta ka mhunu mun’we.
20 A Nawu wu nyikeliwe akuva vhanu va ta swi tiva leswaku va yentxa swidoho swinyingi. Kambe lani swidoho swi nga swinyingi, a timpswalu ta Xikwembu Nkulukumba na tone i tinyingi ngopfu swinene;
21 ku yentxela leswaku ku fana ni leswi xidoho xi fumiki kun’we ni lifu, na tone timpswalu letikulu ti fuma hi kola ka wululami, akuva vhanu va kuma wutomi lebyi nga helikiki hi ku tizrisa Yesu Kriste Hosi yezru.
Tintlhamuxelo ta le hansi
^ Kumbexana: “hi ni ku zrula”.
^ Kumbexana: “ha nyonxa”.
^ Hi ku kongoma: “hi ta yamukela ku phatima ka Xikwembu Nkulukumba”.
^ Kumbexana: “ha nyonxa”.
^ Hi ku kongoma: “na ha ha tsranile”.
^ Hi ku kongoma: “hi tlhelelane na yene”.
^ Hi ku kongoma: “hi tlhelelaniki na yene”.
^ Kumbe: “ku tlhelelana”.
