Papela ledzri yaka ka Varoma 7:1-25
7 Vamakwezru, xana a mi swi tivi leswaku a Nawu wu fuma mhunu ntsena loko a ha hanya? (Hikusa ni vulavula ni vhanu lava wu tivaka nawu.)
2 Hi xikombiso, wansati lweyi a txhatiwiki a tsrimbiwile hi nawu ka nuna wake loko nuna wake a ha hanya; kambe loko nuna wake a fa, wansati lweyo a ntsrhunxekile ka nawu wa nuna wake.
3 Xileswo, loko nuna wake a ha hanya, wansati yelweyo a ta va na o mbuyeta loko a va nsati wa wanuna mun’wana. Kambe loko nuna wake a fa a ntsrhunxekile ka nawu wa nuna wake, xileswo a ta va na a nga mbuyeti loko a va nsati wa wanuna mun’wana.
4 Hi lani ku fanaka vamakwezru, a mizri wa Kriste wu mi ntsrhunxile ka Nawu wa Moxe, leswo swi yentxeke akuva mi ta lumba mhunu mun’wana, ku nga lweyi a pfuxiwiki ku feni, akuva hi ta yentxa mintxhumu leyi nyonxisaka Xikwembu Nkulukumba.
5 Hikusa nkama lowu na ha ha hanya hi ku ya hi ku navela ka nyama, a Nawu wu hi yentxe hi tiva ku navela ka ku biha loku a ku li mizrini wezru,* a ku navela koloko a ku hi yisa ku feni ntsena.
6 Kambe swoswi hi ntsrhunxiwile ka Nawu, hikusa wone awa ha hi lawuli, swoswi hi tizrela Xikwembu Nkulukumba hi ndlela yimpshwa na hi kongomisiwa hi moya, ku nga li hi ndlela ya khale ya ku kongomisiwa hi Nawu lowu tsraliwiki.
7 Xana hi hlaya leswaku a Nawu i xidoho? Nakunene a hi hlayi swone! Phela loko a ku nga vanga Nawu, a ni nge ti swi tiva leswaku xidoho i yini. Hi xikombiso, a ni nge ti swi tiva leswaku swi bihile ku navela mintxhumu ya vambeni loko Nawu a wu nga hlayanga wu ku: “U nga txhuki u navela swa vambeni.”
8 Kambe hi mhaka ya Nawu, a xidoho xi ni pfuxele mixaka hinkwayu ya ku navela, hikusa nkama lowu Nawu a wu nga li kone, a xidoho a xi nga na ntamu.
9 Nakunene, na Nawu wu nga si va kone a ni hanya. Nambitanu, loko Nawu wu tlhasile a xidoho xi tlhele xi hanya kambe mine ni fa.
10 Nakone ni gungule leswaku a Nawu lowu a wu fanela ku ni yisa wuton’wini, wu ni yise ku feni.
11 Hikusa a xidoho xi londzrovote mukhandlu lowu pfuliwiki hi Nawu akuva xi ni kanganyisa xi tlhela xi ni dlaya hi ku tizrisa wone.
12 Xileswo a Nawu wa Moxe wone hi wuswawone wu xwengile, nakone leswi wu swi hlayaka swi xwengile, swi lulamile futsrhi i swinene.
13 Xana leswo swi djula ku hlaya leswaku ni dlayiwe hi leswi nga swinene? Nakunene a swi hlayi swone! Kambe a xidoho hi xone xi ni dlayiki, a Nawu i wunene kambe wu swi kombisile leswaku a xidoho a xi li ku ni dlayeni, xileswo leswi Nawu wu swi hlayaka swi swi kombise ha hombe leswaku a xidoho xi bihe ngopfu swinene.
14 Hikusa ha swi tiva leswaku a Nawu wu pfa hi ka Xikwembu Nkulukumba hi ku tizrisa moya wake, kambe a xikazratu xi na mine hikusa ni mhunu wa nyama lweyi a xaviseliwiki xidoho.
15 Hikusa a ni swi twisisi leswi ni swi yentxaka. Hikusa leswi ni navelaka ku yentxa swone a ni swi yentxi, kambe ni yentxa leswi ni swi nyenyaka.
16 Nambitanu, na pfumela leswaku a Nawu i wunene kambe na ha tama ni yentxa mintxhumu leyi ni nga djulikiki ku yi yentxa.
17 Xileswo a ka ha li mine lweyi a yentxaka mintxhumu leyo ya ku biha, kambe i xidoho lexi nga ndzreni kwanga.
18 Hikusa na swi tiva leswaku a ndzreni kwanga, ni hlaya a nyameni yanga, a ku tsrhami ntxhumu xa xinene; hikusa nambi ni swi navela ku yentxa leswinene a ni na wuswikoti bya ku swi hetisisa.
19 Hikusa leswinene leswi ni swi navelaka a hi swone leswi ni swi yentxaka, kambe swa ku biha leswi ni kalaka ni nga swi naveli hi swone leswi ni swi yentxaka.
20 Kutani loko ni yentxa mintxhumu leyi ni kalaka ni nga djuli ku yentxa yone, a ka ha li mine ni yi yentxaka, kambe i xidoho lexi tsrhamaka ndzreni kwanga.
21 Kutani, ni xiya leswi* mayelanu na mine: Loko ni djula ku yentxa leswi nga swinene, ni kokeka ku yentxa leswi bihiki.
22 Nakunene hi le ndzrenindzreni na wu zrandzra Nawu wa Xikwembu Nkulukumba,
23 kambe ka mizri wanga* ni vona nawu wun’wana lowu lwaka ni Nawu lowu nga miyanakanywini yanga nakone wu ni yentxaka xib’otxhwa xa nawu wa xidoho lowu nga ka mizri wanga.*
24 Mbuyangwana mine! I mani lweyi a taka ni huluxa ka mizri lowu wu ni yisaka ka ku fa loku?
25 Ni tlangela Xikwembu Nkulukumba hikusa awa ni huluxa hi ku tizrisa Yesu Kriste Hosi yezru! Xileswo a miyanakanywini yanga ni xikazrawa xa Nawu wa Xikwembu Nkulukumba kambe a nyameni yanga ni xikazrawa xa nawu wa xidoho.
Tintlhamuxelo ta le hansi
^ Hi ku kongoma: “a swizrweni swezru”.
^ Hi ku kongoma: “ni xiya nawu lowu”.
^ Hi ku kongoma: “a swizrweni swanga”.
^ Hi ku kongoma: “a swizrweni swanga”.
