Papela ledzri yaka ka Varoma 8:1-39
-
Wutomi ni ntsrhunxeko leswi hi nyikiwaka hi moya wa ku xwenga (1-11)
-
Moya lowu wu hi yentxaka hi va vana va Xikwembu Nkulukumba wu nyikela wumboni (12-17)
-
Ntumbuluku wu yimela ku ntsrhunxiwa ka vana va Xikwembu Nkulukumba (18-25)
-
“A moya wa ku xwenga wa hi kombelela” (26, 27)
-
Lava Xikwembu Nkulukumba a zrangiki a va hlawula (28-30)
-
Ku hlula hi kola ka lizrandzru dzra Xikwembu Nkulukumba (31-39)
8 Xileswo, lava nga ni wumun’we na Kriste Yesu a va voniwi nandzru wa kuva va khatisiwa.
2 Hikusa a nawu wa moya wa ku xwenga wu mi nyike wutomi akuva mi kota ku hanya na mi ni wumun’we na Kriste Yesu, a nawu wolowo wu tlhele wu mi huluxa ka nawu wa xidoho ni wa lifu.
3 Leswi Nawu wu hlulekiki ku swi yentxa hi mhaka ya leswi mizri wa vhanu wu tsraniki wu tlhela wu va ni xidoho, Xikwembu Nkulukumba a swi yentxile hi ku zrumela N’wanake na a ni mizri wa ku fana ni mizri wa vhanu va nyama lowu nga ni xidoho akuva a ta susa xidoho, hi ndlela leyo a yavanyise xidoho lexi nga vhanwini a xi vona nandzru,
4 ku yentxela leswaku leswi lulamiki leswi Nawu wu swi djulaka, swi hetiseka kwezru, hine lava kongomisiwaka hi moya wa ku xwenga ku nga li hi mizri lowu nga ni xidoho.
5 Hikusa lava va hanyaka hi ku kongomisiwa hi mizri lowu nga ni xidoho, va beka miyanakanyu yavu ka mintxhumu ya nyama, kambe lava va hanyaka hi ku kongomisiwa hi moya wa ku xwenga, va beka miyanakanyu yavu ka mintxhumu ya moya.
6 Hikusa ku beka miyanakanyu ka mintxhumu ya nyama swi yisa ku feni, kambe ku beka miyanakanyu ka mintxhumu ya moya swi nyika wutomi ni ku zrula;
7 hikusa ku pfumelela mizri wezru lowu nga ni xidoho wu kongomisa miyanakanyu yezru swi hi yentxa valala va Xikwembu Nkulukumba, nakunene a mizri lowu nga ni xidoho a wu nge wu yingiseti nawu.
8 Xileswo lava pfumelaka ku kongomisiwa hi mizri wa nyama lowu nga ni xidoho a va nge mu nyonxisi Xikwembu Nkulukumba.
9 Nambitanu, n’wine vamakwezru a mi pfumeli ku kongomisiwa hi mizri wenu lowu nga ni xidoho kambe mi kongomisiwa hi moya wa Xikwembu Nkulukumba loko nakunene wu li kone kwenu. Kambe loko mhunu a nga na mayanakanyela ya Kriste, mhunu yelweyo a nga lumbi Kriste.
10 Kambe loko mi ni wumun’we na Kriste, a moya wa ku xwenga wu mi yentxa mi hanya hi leswi mi voniwaka mi li lava lulamiki nambiloko mizri wu file hi mhaka ya xidoho.
11 Kutani loko a moya wa lweyi a pfuxiki Yesu a ku feni wu li kone kwenu, lweyi a pfuxiki Kriste Yesu a ku feni a ta yentxa leswaku ni mizri wenu lowu faka wu hanya, hi ku tizrisa moya wake lowu nga kone kwenu.
12 Xileswo vamakwezru, a hi fanelanga hi yingiseta nyama yezru leyi nga ni xidoho;
13 hikusa loko mi yingiseta nyama nakunene mi ta fa, kambe loko mi pfumelela moya lowu Xikwembu Nkulukumba a mi nyikaka wone wu mi pfuna kuva mi dlaya mintizro ya nyama, mi ta hanya.
14 Hikusa hinkwavu lava kongomisiwaka hi moya wa Xikwembu Nkulukumba, nakunene i vana va Xikwembu Nkulukumba.
15 A mi yamukelanga moya lowu mi yentxaka mi va swikazrawa ni ku yentxa leswaku mi tlhela mi hanya hi ku txhava, a matsrhan’wini ya leswo mi yamukele moya lowu wu hi yentxaka hi va vana va Xikwembu Nkulukumba, a moya wolowo wu hi yentxa hi huwelela hi ku: “Abba,* Papayi!”
16 A moya wa Xikwembu Nkulukumba wu hi yentxa hi tiyiseka* leswaku hi vana va Xikwembu Nkulukumba.
17 Kutani loko hi li vana, swi hlaya leswaku hi tlhela hi va vadi va pfindla dzra Xikwembu Nkulukumba, nakone a ta hi nyika pfindla ledzri a nyikiki Kriste kambe ku fana na Kriste ku sungula hi fanela ku xaniseka akuva hi ta tlakuxiwa ku fana na yene.
18 A ku xaniseka hinkwaku loku hi kumanaka na kone swoswi, ni ku vona ku nga li ka ntxhumu loko ku pimanisiwa ni nkama lowu Xikwembu Nkulukumba a taka kombisa hakelo dzra ku hlamalisa ledzri hi taka dzri yamukela.
19 Hikusa ntumbuluku hinkwawu wu wu yimeli ngopfu swinene nkama lowu Xikwembu Nkulukumba a taka kombisa leswaku vanake va yamukele hakelo dzravu dzra ku hlamalisa.
20 Hikusa ntumbuluku hinkwawu wu bekiwe ka xiyimu xa ku kala xi nga pfuni ntxhumu, na ku nga li hi ku zrandzra ka wone, kambe hi kola ka leswi Xikwembu Nkulukumba a swi pfumeleliki, nambitanu a hi nyike dumbo
21 dzra leswaku na wone ntumbuluku wu ta ntsrhunxiwa a wukazraweni bya xidoho ni lifu kutani wu va ni ntsrhunxeko lowu phatimaka wa vana va Xikwembu Nkulukumba.
22 Hikusa ha swi tiva leswaku a ntumbuluku hinkwawu wu ya mahlweni wu konya ni ku vaviseka ku ta tlhasa swoswi.
23 Ku nga li leswo ntsena, kambe na hine hi yamukeliki xiyenge xa ku sungula xa hakelo, ku nga moya wa ku xwenga, ha konya ndzreni kwezru na ha ha swi yimela ngopfu kuva Xikwembu Nkulukumba a hi yentxa vanake, ku nga ku ntsrhunxiwa ka mizri wezru hi xitizrulo.
24 Hikusa nkama lowu hi nga huluxiwa hi kume dumbo ledzri, kambe loko ntxhumu lowu a wu yimeliwile wu hetiseka, awa ha yimeliwi, hikusa mhunu a nga wu yimelisa kuyini ntxhumu lowu a wu vonaka?
25 Kambe loko hi lavisela ntxhumu lowu hi kalaka hi nga wu voni, a hi kazrali hi tama hi wu yimela hi ku tiyisela.
26 Hi lani ku fanaka, a moya wa ku xwenga na wone wa hi pfuna loko hi tsranile; a mhaka hi leswaku minkama yimbeni hi pfana hi nga swi tivi leswaku hi ta khongota hi kombela yini, nambitanu a moya wa ku xwenga wa hi kombelela loko hi konya kambe hi hluleka ku humesa mazritu.
27 Kambe lweyi a kambelaka timbilu awa wu tiva ntlhamuxelo wa leswi moya wu hlayaka swone, hikusa leswi wu swi kombelelaka vaxwengi swi fambisana ni ku zrandzra ka Xikwembu Nkulukumba.
28 Ha swi tiva leswaku Xikwembu Nkulukumba a yentxa leswaku mintizro yake hinkwayu yi tizrisana akuva ku pfuneka lava mu zrandzraka, ku nga lava vitaniwaka hi ku ya hi nkongometo wake;
29 hikusa a tiyisekise leswaku lava a zrangiki a va hlawula, va fanela ku fana ni N’wanake* ku yentxela leswaku a N’wanake a va mativula xikazri ka vamakwavu va vanyingi.
30 Handle ka leswo, lava a va hlawuliki hi vone lava a tlheliki a va vitana; nakone lava a va vitaniki a tlhele a va vona va li lava lulamiki. Hi wugamu lava a va voniki va li lava lulamiki hi vone a tlheliki a va tlakuxa.
31 Kutani hi ta ku yini hi mintxhumu leyi? Loko Xikwembu Nkulukumba a li na hine, i mani lweyi a nga lwaka na hine?
32 Leswi nambi ku li N’wanake a kalaka a nga mu felelanga, kambe a mu nyikeliki akuva a hi fela hinkwezru, xana a nge hi nyiki mintxhumu leyin’wana hinkwayu hi mbilu yake hinkwayu, ku yengetela ka ku va a hi nyike N’wanake?
33 I mani lweyi a nga lumbetaka vahlawuliwa va Xikwembu Nkulukumba? A nga kone a nga yentxaka leswo, hikusa Xikwembu Nkulukumba hi yene a va vonaka va li lava lulamiki.
34 I mani lweyi a nga va nyikaka nandzru? A nga kone a nga yentxaka leswo, hikusa Kriste Yesu lweyi a fiki a tlhela a pfuxiwa, swoswi a tsrhame vokweni dzra xinene dzra Xikwembu Nkulukumba nakone awa hi kombelela.
35 I mani a nga yentxaka leswaku Kriste a tsrhika ku hi zrandzra? Xana i mahlomulo, kumbe swikazratu, kumbe ku xanisiwa, kumbe ndlala, kumbe ku pfumala mpahla, kumbe mhangu, kumbe xipada?
36 A Matsralwa ma li: “Minkama hinkwayu va djula ku hi dlaya hi leswi hi nga vhanu vaku; a vhanu va hi vona na hi li tihamba leti yaka ku dlayiweni.”
37 Kambe hi ku pfuniwa hi lweyi a hi zrandzraka ha hlula ka mintxhumu leyi hinkwayu.
38 Na kholwa leswaku nambi ku li lifu, kumbe wutomi, kumbe tintsrumi, kumbe mimfumu, kumbe mintxhumu leyi nga kone swoswi, kumbe mintxhumu leyi ya ha taka, kumbe mintamu,
39 kumbe ku tlakuka, kumbe ku yenta, kumbe ntxhumu wun’wana lowu tumbuluxiwiki, a swi nge swi koti ku hi hambanisa ni lizrandzru dzra Xikwembu Nkulukumba ledzri a dzri kombisiki hi ku tizrisa Kriste Yesu Hosi yezru.
Tintlhamuxelo ta le hansi
^ I zritu dzra Xiheberu kumbe dzra Xiyaramayika ledzri tlhamuxelaka leswaku “Oh Papayi!”
^ Hi ku kongoma: “wu nyikela wumboni kun’we ni moya wezru”.
^ Kumbe: “ni xifaniso xa N’wanake”.
