Papela ledzri yaka ka Varoma 9:1-33
9 Swanga mulandzreli wa Kriste ni hlaya ntiyiso a ni hembi; a lipfalu dzranga ledzri kongomisiwaka hi moya wa ku xwenga dzra swi seketela leswo,
2 leswaku ni kazrateki ngopfu swinene nakone ni twa ku fofozra loku nga helikiki a mbilwini.
3 Loko a swi koteka a ni ta tiyentxa lweyi a hambanisiwiki na Kriste ni va lweyi a zrukiwiki akuva ku pfuneka vamakwezru, maxaka yanga ya le nyameni,
4 ku nga Vaisrayele. Xikwembu Nkulukumba a va hlawule leswaku va va vanake, a va tlakuxa, a va nyika swipfumelelanu, a va nyika Nawu, a va nyika ndjombo ya ku mu tizrela a tlhela a va nyika swidumbiso.
5 Vone i vatukulu va vakokwana vezru, ku nga lava Kriste swanga mhunu wa nyama a humiki kwavu. Xikwembu Nkulukumba lweyi a nga henhla ka hinkwaswu a a dzrumisiwi hi lani ku nga helikiki. Amen.
6 Nambitanu, a swi hlayi swone leswaku zritu dzra Xikwembu Nkulukumba dzre hluleka. Hikusa a hi vhanu hinkwavu va le Israyele va nga “Vaisrayele” va kakunene.
7 Nambileswi va nga va lixaka dzra* Abrahamu a hi hinkwavu va nga vana; kambe ku tsraliwe leswi: “Lava va taka vitaniwa vana vaku* va ta pfa hi ka Izaki.”
8 Leswi liki, a hi hinkwavu vana va Abrahamu* va nga vana va Xikwembu Nkulukumba ha kakunene, kambe a vana lava pswaliwiki hi mhaka ya xidumbiso hi vone va nga vana va Abrahamu va ntiyiso.
9 Hikusa Xikwembu Nkulukumba a dumbise leswi: “Ni ta ta lembe dzri taka hi nkama wa ku fana ni wolowu,* kutani Sara a ta va na a ni n’wana wa djaha.”
10 A ku vanga lanu ntsena, kambe swi ve hi ndlela yoleyo ni loko Rabeka a ve ni nyimba ya mahahla, leyi a yi kumiki hi kokwana wezru Izaki;
11 hikusa na ma nga si na pswaliwa nakone ma nga si na yentxa ntxhumu lowunene kumbe lowu bihiki, Xikwembu Nkulukumba a zrange a kombisa leswaku he wini lweyi a a ta mu hlawula, hikusa a hlawula lweyi a mu djulaka, a nga yi hi mintizro ya mhunu yelweyo.
12 Rabeka a byeliwe leswi: “Lwenkulu a ta va nandzra wa lwentsrongo.”
13 Hi lani swi tsraliwiki ha kone: “Ni zrandzre Yakobe, kambe Esawu ni mu nyenyile.”
14 Xana swi djula ku hlaya leswaku Xikwembu Nkulukumba a nga lulamanga? Nakunene a swi hlayi swone!
15 Hikusa Xikwembu Nkulukumba a byele Moxe a ku: “Ni ta komba timpswalu lweyi ni taka hlawula ku mu komba timpswalu, nakone ni ta kombisa ntwelawusiwana ka mun’wana ni mun’wana lweyi ni taka hlawula ku mu komba wone.”
16 Xileswo a swi yi hi ku navela ka mhunu kumbe hi ku tikazrata kwake,* kambe swi ya hi timpswalu ta Xikwembu Nkulukumba.
17 Hikusa a tsralwa dzri byela Faro dzri ku: “Ni ku tsrhike u tama u hanya: akuva ni ta ku tizrisa leswaku ni kombisa ntamu wanga ni leswaku ni ta twalisa vito dzranga a misaveni hinkwayu.”
18 Xileswo, a kombisa timpswalu ka mun’wana ni mun’wana lweyi a mu djulaka, kambe lweyi a djulaka ku tiwomisa nhloko awa mu pfumelela.
19 Kutani van’we va ta ni vutisa va ku: “Leswi ku nga liki na mhunu lweyi a nga lwisanaka ni xiboho xa Xikwembu Nkulukumba, ha yini a ha tama a hi vona nandzru?”
20 Kambe wene mhunu wo va mani akuva u solasola Xikwembu Nkulukumba? Xana a hotsro yi nga vutisa lweyi a yi vumbiki yi ku: “Ha yini u ni vumbe hi ndlela leyi?”
21 Xana muvumbi a nga na yone mfanelo ya ku va a hamba tihotsro tibidzri hi vumba dzra dzrin’we, yin’we akuva yi tizrisiwa ka swiyimu swa ku hlawuleka nakasi leyin’wana yi tizrisiwa siku ni siku?
22 Swi hi lani ku fanaka ka Xikwembu Nkulukumba, awa swi navela ku kombisa mahlundzru yake ni ku yentxa leswaku ntamu wake wu tiviwa, nambitanu a va lehisela mbilu ngopfu swinene vhanu lava mu hlundzrukisaka* nakone va faneliwaka hi ku suvisiwa.
23 A yentxe leswo akuva a kombisa ku phatima kwake lokukulu, ka lava taka yamukela timpswalu take* ni hakelo ledzri a va lulamiseliki dzrone,
24 ku nga hine a hi vitaniki ku nga li ntsena a xikazri ka Vayuda kambe ni le ka vamatiko.
25 Swi hi lani a hlayaka ha kone ni le ka buku dzra Hoxeya: “Lava nga liki vhanu vanga ni ta va vitana ‘vhanu vanga’, ni wansati lweyi a kalaka a nga zrandzriwi ni ta mu vitana ‘muzrandzriwa’,
26 nakone a mbangwini lowu va byeliwiki leswi: ‘A mi vhanu vanga’, a mbangwini wolowo va ta vitaniwa vana va Xikwembu Nkulukumba lweyi a hanyaka.’”
27 Handle ka leswo, Ezaya a huwelela a hlaya leswi mayelanu ni Israyele: “Nambileswi a vana va Israyele va nga vanyingi ku fana ni misava ya lwandle, ku to huluxiwa vhanu vatsrongo ntsena.
28 Hikusa Yehovha a ta yavanyisa misava a va a tsrema mhaka hi ku kahlula.”
29 Nakone hi lani Ezaya a profetiki ha kone: “Loko Yehovha wa makhandzra a a nga hi siyelanga vana,* a hi ta va hi fane ni Sodoma ni Gomora.”
30 Kutani hi nga ku yini? Hi nga hlaya leswaku vhanu va matiko nambileswi a va nga lweli ku va vhanu lava lulamiki, va voniwe va li lava lulamiki hi leswi va kombisiki lipfumelo;
31 kambe Israyele nambileswi a a tikazratela ku landzra Nawu wa wululami, a hlulekile ku hanya ha wone.
32 Ha yini a hlulekile? Hikusa a a yanakanya leswaku a ta voniwa a li lweyi a lulamiki hi mhaka ya mintizro yake ku nga li hi mhaka ya lipfumelo. A titlirinye* hi “zribye ledzri wisanaka”;
33 hi lani swi tsraliwiki ha kone: “Lavisa! A Siyoni ni beka zribye ledzri taka wisa vhanu ni ledzri taka va kwatisa, kambe mun’wana ni mun’wana lweyi a kombisaka lipfumelo ka dzrone a nge ti danisiwa.”
Tintlhamuxelo ta le hansi
^ Hi ku kongoma: “mbewu ya”.
^ Hi ku kongoma: “mbewu yaku”.
^ Hi ku kongoma: “vana va Abrahamu va nyama”.
^ Kumbe: “hi nguva yoleyi”.
^ Hi ku kongoma: “a swi yi hi ku va mhunu a swi navela nambi hi ku tsrutsruma kwake”.
^ Hi ku kongoma: “tihotsro ta mahlundzru”.
^ Hi ku kongoma: “ka tihotsro ta timpswalu”.
^ Hi ku kongoma: “mbewu”.
^ Kumbe: “A tikhenye”.
