Papela dzra Yuda 1:1-25
1 Mine Yuda, nandzra wa Yesu Kriste tlhelo makwavu wa Yakobe, ni tsralela lava vitaniwiki, lava zrandzriwaka hi Xikwembu Nkulukumba, Papayi, lava bekiseliwiki ku ya va kun’we na Yesu Kriste:
2 Ingiki Xikwembu Nkulukumba a nga mi yengetelela timpswalu, ku zrula ni lizrandzru.
3 Vazrandzriwa, nambileswi a ni yentxa hinkwaswu leswi ni nga swi kotaka akuva ni mi tsralela mayelanu ni ku huluxiwa kwezru, ni vone swi vileleka ku mi tsralela ni mi tsratsriya leswaku mi tikazratela ku lwela lipfumelo dzrenu ledzri a vaxwengi va nyikiwiki dzrone kan’we swi helela kolanu.
4 A mhaka hi leswaku ku ni vhanu lava nyanimeliki va nghena a makazri kwenu, lava ku sukela khale matsralwa ma hlayiki leswaku va bekiseliwe yavanyiso ledzri. Vone i vhanu lava nga txhavikiki Xikwembu Nkulukumba, lava tizrisaka timpswalu letikulu ta Xikwembu Nkulukumba akuva va tiyimelela ka mahanyela yavu ya ku biha* nakone a va dumbekanga ka N’winyi wezru wa mun’we, tlhelo Hosi yezru Yesu Kriste.
5 Nambileswi mi swi tivaka ha hombe hinkwaswu leswi, ni djula ku mi dzrimuxa leswaku Yehovha a huluxe vhanu vake a tikweni dzra Egipta, kambe hi ku famba ka nkama a helise lava va kalaka va nga kombisanga lipfumelo.
6 Na tone tintsrumi leti tsrhikiki xiyimu xa tone xa ku sungula ti suka a mbangwini wa tone a tilweni, a ti tsrimbe hi la ku nga helikiki hi matxhini a munyameni lowukulu a ti bekisela siku ledzrikulu dzra yavanyiso.
7 Hi lani ku fanaka, Sodoma ni Gomora ni madoropa mambeni ya le kusuhi, ma tinyiketele ka swiyentxo swa tingana hi tlhelo dzra tinkuku* ni ku tinyiketela a ku naveleni ka nyama loku nga liki ka ntumbuluku; ku va ma kume yavanyiso dzra ndzrilo lowu nga helikiki swi bekiwe leswaku swi va xikombiso kwezru.
8 Nambileswi va tivaka timhaka leti, vavanuna lava na vone va tsrhamela ku yanakanya swa ku biha, va yentxa mintxhumu leyi ntxhimisaka mizri, va yeyisa lava va nga ni wulawuli ni ku tlhela va khanela ku biha hi vahlawuliwa.
9 Kambe loko Mikayele ntsrumi leyikulu a phikisane na Diyavulosi hi ntsrumbu wa Moxe, Mikayele a nga dzringisanga ku yavanyisa Diyavulosi hi ku mu hlamula hi mazritu ya ku biha, kambe a te: “Yehovha a a ku khatise.”
10 Kambe vhanu lava va vulavula ku biha hi mintxhumu hinkwayu leyi nakunene va kalaka va nga yi twisisi. Ku fana ni swihazri leswi nga yanakanyikiki, va yentxa mintxhumu leyi vo ko yi tiva hi ntumbuluku kutani yi ya yi va hona.
11 Khombo ka vone, hikusa va landzre ndlela ya Khayini va tlhela va tsrutsrumela ndleleni ya ku biha ya Balama hi ku djula hakelo, nakone va suvisiwile hi kola ka mavulavulela ya wudukwa ya Kora!
12 Lavo va fana ni mazribye lama tumbeliki matini loko va li minkhubyini yenu ya lizrandzru, i vabyisi lava vo ko tiwundla na va nga txhavi ntxhumu, i matlavi lama ngeke na mati ma yingayingisiwaka hi moya, i minsinya leyi nga pswalikiki ntxhumu a ku heleni ka wuxika, leyi fiki hi ku helela* yi tlhela yi tsruvuliwa;
13 i mavimbi ya lwandle lama levaka lama tlhutlhaka swiyentxo swavu swa tingana, i tinyeleti leti ngeke na ndlela, va ta pfaleliwa a munyameni lowukulu hi lani ku nga gamikiki.
14 Enoki lweyi a a li wa wu 7 ku sukela ka Adamu, na yene a profete leswi hi vhanu lava: “Vonani! Yehovha a tile ni tintsrumi take ta ntsrandzravahlayi*
15 akuva a ta yavanyisa ni ku khatisa hinkwavu lava va nga mu txhavikiki Xikwembu Nkulukumba hi kola ka mintxhumu hinkwayu ya ku biha leyi va yi yentxiki, ni hi kola ka mintxhumu hinkwayu ya ku nyenyentsa leyi vadohi va yi vulavuliki ha yene.”
16 Vhanu lava va tsrhamela ku solasola, a va nyonxi hi leswi va nga na swone wuton’wini, va zrangisa ku navela kwavu, nakone va titlakuxa ni ku khuzela vambeni akuva ku pfuneka vone.
17 Kambe n’wine vazrandzriwa, dzrimukani leswi samiki swi hlayiwa* hi vapostola va Hosi yezru Yesu Kriste,
18 lava a va tsrhamela ku mi byela va ku: “A masikwini ya wugamu ku ta va ni vasandzri, lava taka ya hi ku navela kwavu ka ku biha loku kalaka ku nga mu nyonxisi Xikwembu Nkulukumba.”
19 Vone i vhanu lava vangaka ku yavana, lava nga ni mahanyela ya wuhazri,* lava ngeke na moya wa Xikwembu Nkulukumba.*
20 Kambe n’wine vazrandzriwa, tiyisani lipfumelo dzrenu ledzri xwengiki ngopfu, mi khongota na mi pfuniwa hi moya wa ku xwenga,
21 akuva mi tama mi zrandzriwa hi Xikwembu Nkulukumba, na ma ha yimela timpswalu ta Hosi yezru Yesu Kriste leti taka yentxa leswaku mi kuma wutomi lebyi nga gamikiki.
22 Nakone yanani mahlweni mi va komba timpswalu lava nga ni ku ganaganeka;
23 va huluxani hi ku va phula ndzrilweni. Kambe yanani mahlweni mi komba vambeni timpswalu, na mi tivonela, mi nyenya nambi mpahla leyi ntxhimisiwiki hi mintizro yavu ya ku biha.
24 Xikwembu Nkulukumba a nga swi kota ku mi sizrelela akuva mi nga wi kambe mi yima mi tiyile mbangwini wake lowa ku xwenga mi nge na nandzru nakone na mi nyonxe ngopfu.
25 Yene i Xikwembu Nkulukumba wezru wa mun’we ni Muhuluxi wezru, nakone a faneliwa hi ku phatima, wukulukumba, ntamu ni wuhosi ku sukela minkameni leyi ngeke na masungulo, swoswi ni hi lani ku nga helikiki ha Yesu Kriste Hosi yezru. Amen.
Tintlhamuxelo ta le hansi
^ Kumbe: “mahanyela yavu ya tingana”. Hi Xigriki: asélgeia. Vona Ntlhamuxelo Wa Mazritu.
^ Vona Ntlhamuxelo Wa Mazritu.
^ Kumbe: “yi fiki hi kabidzri”.
^ Kumbe: “makume ya makume ya madzana”.
^ Kumbe: “swi profetiwa”.
^ Kumbe: “i vhanu va nyama”.
^ Kumbe: “wumoya”.
