A Paxkwa dzra wugamu dzra Yesu a dzri ta va ni ntlhamuxelo lowukulu. Hi leswi a a tiva leswaku a a li kusuhi ni ku fa, Yesu a hambi malulamiselo ya leswaku a da Paxkwa kun’we ni vapostola vakwe a va a simeka xiyentxakalu lexi a xi ta yentxiwa lembe ni lembe: Xilalelo Xa Hosi. Xileswo, a zrume Petro na Yohane akuva va ya lulamisela mbangu lowu a va ta hambela ka wone Paxkwa. (Lk 22:7-13; vona xifaniso xa kapa.) Kutani leswi swi hi dzrimuxa ku va hi tilulamiselela ka Xidzrimuxo hi 27 ka Marsu. Ha tiyiseka ka leswaku mabandla kutani ma hlawulile xikaneli, ma hlawulile mbangu, ma bekisile swifanekiselo, va-indikadori kutani va kone ni swin’wana. Nambitanu, i yini leswi mun’wana ni mun’wana wezru a fanelaka ku swi yentxa akuva a tilulamisela xidzrimuxo?

Lulamisela mbilu yaku. Dondzra u tlhela u yanakanyisisa hi ku dondzra ka Bibele loku fambisanaka ni Xidzrimuxo. A xiyimiso u nga xi kuma ka xibukwana lexi liki Ku Kambisisa Matsralwa Siku Ni Siku. Akuva u kuma xiyimiso lexi nga ni wutsrhokotsrhoko byinyingi, u nga ya ka Xiyengetelo B12 xa Bibele-Matsalwa Yo Kwetsima (nwt-ts). (Vona ni Xibukwana Xa Ntlhanganu Wa Wutomi Ni Wutizreli Byezru Bya Wukriste xa Abrili Wa 2020.) Mindangu yi nga kuma dzrungula ledzri yengetelekiki ka Índice de Publicações de Torre de Vigia ni ka Nkongomiso Wo Endla Ndzavisiso, mayelanu ni lisima dzra xitizrulo ledzri yi nga dzri tizrisaka ka wugandzreli bya ndangu.

Zramba vambeni ku ya Xidzrimuxweni. Hlengela hi xitalu ka tsima dzra ku zrambela vhanu ku ta Xidzrimuxweni. Yanakanya hi lava u nga va zrambaka, va ku fana ni timpinda, lava u samiki u dondzra navu Bibele, vanghanu ni maxaka. Vakulu va fanela ku tiyiseka leswaku a va dzrivalanga ku zramba lava holiki. Loko lweyi u mu zrambaka a nga tsrhami mugangeni waku, u nga kuma mbangu ni nkama wa Xidzrimuxo lomu a tsrhamaka kone ka pajina dzra jw.org hi ku deketa lani ku liki MAYELANU NI TIMBONI TA YEHOVHA u gama u ya la ku liki “Xidzrimuxo”.

Hi swini swin’wana leswi hi nga swi yentxaka akuva hi tilulamiselela ku va kone a Xidzrimuxweni?