1, 2. Hi nga yentxa yini akuva hi tsrhama a lizrandzrwini dzra Xikwembu Nkulukumba?

HINKWEZRU hi djula ku tiya hi tlhela hi va ni lihanyu dzrinene. Xileswo hi lwela ku da swakuda swa swinene, hi tiwolola nkama ni nkama, hi tlhela hi hlayisa mizri wezru. Nambi leswi swi djulaka ku tikazrata, ha yi nyonxela mihandzru ya kone, xileswo a hi kazrali. Kambe hi fanela ku tiya hi tlhela hi va ni lihanyu dzrinene hi tlhelo dzrimbeni.

² Nambi leswi hi tekiki masungulo manene ya ku tiva Yehovha, hi fanela ku tama hi tiyisa wuxaka byezru na yene. Loko Yuda a kutxe vakriste leswaku va ‘tibekisa a lizrandzrwini la Xikwembu Nkulukumba’, a tlhamuxele a mayentxela ya kone. A va byele leswi: ‘Tiyakani a vupfumelini byenu lebya ku xwenga ngopfu.’ (Yuda 20, 21) Kutani ke, hi nga dzri yakisa kuyini a lipfumelo ledzri tiyiki?

3-5. a) Xana Sathana a navela kuva u titwisa kuyini hi milawu ya Yehovha? b) Xana u titwisa kuyini hi milawu ni minsinya ya milawu ya Yehovha?

³ Swi ni lisima dzrikulu kuva wene ha wuswaku u tikholwisa leswaku tindlela ta Yehovha i tinene ku tlula hinkwaswu. Sathana a djula kuva u pimisa leswaku a milawu ya  Yehovha yi kazrata ngopfu ku yi landzra ni leswaku u nga nyonxa ngopfu loko wo tilangela ha wuswaku leswi nga swinene ni leswi bihiki. Ku sukela a xizrambeni xa Edeni, Sathana a dzringisa ku yentxa vhanu va kholwa leswo. (Genesis 3:1-6) Ni namunhla a ha zama hi tindlela hinkwatu.

⁴ Xana Sathana a hlaya ntiyiso? Xana milawu ya Yehovha yi bekana djele? Im-him. Akuva hi kombisa, tivone na u li a xizrambeni xa ku xonga swinene. Loko u langusa, u vona fenisi dzra dzrikulu dzri ku sivelaka ku khaluta. Kumbexana wa tivutisa: ‘Ha yini fenisi ledzri dzri ni pfalela ndlela?’ Kambe kolanu, u yingela nghonyama yi nga hi tlhelo dzra hala na yi bonga. Xana swoswi u titwisa kuyini hi fenisi? Wa dzri khensa hi leswi dzri ku sizreleliki leswaku u nga ndzruluki xifihlulu xa nghonyama! Minsinya ya milawu ya Yehovha yi fana ni fenisi ledzro, kasi Diyavulosi a fana ni nghonyama leyo. Zritu dzra Xikwembu Nkulukumba dzri hi ba ndleve: ‘Tikhomani, n’wi hiteka; a nala wenu, a nga Diyavulosi, a zratela kumbe a famba-famba swanga hi ndzrawu kumbe nghonyama leyi dzrumaka, yi djula lweyi yi nga mu daka.’​—1 Petros 5:8.

⁵ Yehovha a hi navelela wutomi bya ku xonga swinene. A nga swi djuli kuva hi phuntisiwa ha Sathana. Hi leswi yentxiki a hi nyika milawu ni minsinya ya milawu leswaku a hi sizrelela ni ku hi yentxa hi nyonxa. (Ba-le-Efesa 6:11) Yakobe a tsrale leswi: ‘Kambe lweyi a khisamaka a lavisa nawini wa ku hetiseka, wa vuntsrhunxeki, a namazrela ku wone, . . . a ta tovoka a ku yentxeni kwakwe.’​—Yakob 1:25.

6. Xana hi nga kholwiseka hi ndlela yini leswaku a tindlela ta Yehovha i tinene ngopfu?

⁶ Loko hi landzra nkongomiso wa Yehovha, a wutomi byezru bya yapswa, ni wuxaka byezru na yene bya kula byi tiya. Hi xikombiso, ha pfuneka loko hi yamukela xizrambu  xakwe xa ku khongota kwakwe nkama ni nkama. (Mattheo 6:5-8; 1 Ba-le-Thesalonika 5:17) Ha nyonxa loko hi yingiseta nkongomiso wakwe wa ku hlengemela nkama ni nkama leswaku hi mu dzrumisa hi tlhela hi tiyisana, ni loko hi khinyela a ntizrweni wa ku zrezra ni wa ku dondzrisa. (Mattheo 28:19, 20; Ba-le-Galatia 6:2; Ba-Heberu 10:24, 25) Loko hi pimisa hi ndlela leyi mintxhumu leyo yi hi pfunaka ha yone ku tiyisa lipfumelo dzrezru, hi ya hi kholwiseka ka leswaku tindlela ta Yehovha i tinene ngopfu.

7, 8. I yini xi taka hi pfuna kuva hi nga hlatiyeli mayelanu ni leswi nga ha humelelaka a nkameni lowu taka?

⁷ Hi nga ha hlatiyela hi leswi hi taka langusana ni mindzringo ya lipfumelo leyi taka hi bindzrela ngopfu. Loko u sama u titwa hi ndlela leyo, dzrimuka mazritu ya Yehovha: ‘Hi mine Yehovha, Xikwembu Nkulukumba waku, lwa ku dondzrisaka ku ku pfuna, lwa ku fambisaka ndleleni leyi u fanelaka ku famba ha yone. Mawaku! Ingiki u nga yingiseta swileleto swanga! A ku zrula kwaku anha ku ta  va swanga hi nambu, a vululami byaku byi ta fana ni mavimbi ya likhulu.’​—Ezaya 48:17, 18.

⁸ Loko hi yingiseta Yehovha, a ku zrula kwezru ku ta fana ni nambu lowu nga womikiki, ni wululami byezru byi ta fana ni mavimbi ya lwandle lawa ma tsrhamelaka ku ya halaka a saveni. Nambi ku ngo yentxeka yini a wuton’wini byezru, hi nga va ni lipfumelo ledzri tiyiki. Bibele dzri hi dumbisa leswi: ‘Nyiketa Yehovha mahanyela kumbe ntsrhwalu waku, yene a ta ku seketela; a nga ka a nga pfumeli leswaku mululami a tsrekatsrekisiwa.’​—Amapsalma 55:22.

9, 10. Xana swi hlaya yini ku va lwa wupfiki?

⁹ Loko u ya u tiyisa wuxaka byaku na Yehovha, u ta ‘kongoma a ku hetisekeni [a ku wupfeni, NM Tradução do Novo Mundo]’. (Ba-Heberu 6:1) Swi tlhamuxela yini ku va lwa wupfiki?

¹⁰ A hi ndzruluki vakriste lava wupfiki ntsena hi ku kula ka malembe. Akuva hi wupfa, hi fanela ku va vanghanu lavakulu va Yehovha ni ku vona mintxhumu hi lani a yi vonaka ha kone. (Yohan 4:23) Pawulo a tsrale leswi: ‘Lava hanyaka hi nyama, va yanakanya swa nyama; kambe lava hanyaka hi moya va yanakanya swa moya.’ (Ba-le-Roma 8:5) Mhunu lwa wupfiki a nga zrangisi ku tinyonxisa kumbe mapfindla a wuton’wini byakwe. A matsrhan’wini ya leswo, a zrangisa ku tizrela Yehovha ni ku hamba swiboho swa wutlhazri a wuton’wini. (Amaproverbia 27:11; dondzra Yakob 1:2, 3.) A nga pfumeli ku kutxeteliwa ku yentxa leswi bihiki. Mhunu lwa wupfiki, awa swi tiva leswi lulamiki nakone a tiyimisela ku swi yentxa.

11, 12. a) Xana Pawulo a te yini mayelanu ni kuva mukriste a ‘tidondzrisa ku yavanyisa’? b) Xana ku wupfa ka mukriste ni ka xitsrutsrumi swi fana hi ndlela yini?

¹¹ Ku va lwa wupfiki swi djula ku tikazrata. Mupostola  Pawulo a tsrale leswi: ‘Swakuda leswi tiyiki swi fanekela lava hetisekiki [lava wupfiki, NM], lava nga ni timbilu leti toloveliki, leti tidondzrisiki ku yavanyisa swa ku xonga ni swa ku biha.’ (Ba-Heberu 5:14) Zritu ledzri liki ‘tidondzrisiki’ dzri hi dzrimuxa ku titoloveta ka xitsrutsrumi.

¹² Loko hi vona xitsrutsrumi ka mpalisanu, ha swi tiva leswaku swi djule nkama ni ku tidondzrisa leswaku xi wupfa. A xi pswaliwanga na xi li xitsrutsrumi. Loko n’wana a ha ku pswaliwa, a nga swi koti ha hombe ku tizrisa mavoko ni milenge yakwe. Kambe loko a ya a kula, a dondzra ku khoma mintxhumu ni ku famba. Loko a titoloveta a nga ha va xitsrutsrumi. Hi ku fanana, swi djula nkama ni ku tidondzrisa leswaku hi va vakriste lava wupfiki.

13. I yini lexi taka hi pfuna ku pimisa ku fana na Yehovha?

¹³ Ka buku ledzri, hi kambisise ndlela leyi hi nga yanakanyaka ni ku vona mintxhumu ha yone ku fana na Yehovha. Hi dondzre ku tlangela ni ku zrandzra milawu ya Yehovha. Loko hi teka swiboho, hi tivutisa leswi: ‘He yini milawu ni minsinya ya milawu leyi kongomisaka a mhakeni leyi? Xana ni nga yi tizrisa hi ndlela yini? Xana Yehovha a nga navela kuva ni swi yentxisa kuyini?’​—Dondzra Amaproverbia 3:5, 6; Yakob 1:5.

14. Xana hi fanela ku yentxa yini leswaku hi yaka lipfumelo dzrezru?

¹⁴ Ku yaka lipfumelo dzrezru ka Yehovha a swi gami. Ku fana ni leswi ku da swakuda leswinene swi hi pfunaka ku tiyisa mizri yezru, ku dondzra ha Yehovha swi hi pfuna ku yaka lipfumelo ledzri tiyiki. Loko hi sungule ku dondzra Bibele, hi dondzre tindondzro ta masungulo mayelanu na Yehovha ni tindlela takwe. Kambe loko nkama wu ya wu famba, hi fanela ku tiva leswi yentiki. Hi leswi Pawulo afaka a hlaya swone loko a ku: ‘Swakuda leswi tiyiki swi fanekela lava hetisekiki [lava wupfiki, NM].’ Loko hi tizrisa leswi  hi swi dondzriki, hi kuma wutlhazri. Bibele dzri hi byela leswi: ‘A ntxhumu lowu tlulaka hinkwaswu i vutlhazri.’​—Amaproverbia 4:5-7; 1 Petros 2:2.

15. Ha yini swi ni lisima ku zrandzra Yehovha ni vamakwezru na swi sukela mbilwini?

¹⁵ Mhunu a nga ha tiya a tlhela a va ni lihanyu dzrinene, kambe akuva a tama a va xitanu, awa swi tiva leswaku a fanela ku ya mahlweni a tibekisa. Hi ku fanana, mhunu lwa wupfiki awa swi tiva leswaku a fanela ku tikazrata leswaku a bekisa wuxaka byakwe na Yehovha na byi tiyile. Pawulo a hi dzrimuxa leswi: ‘Tiyanakanyani, n’wi vona loko nha n’we he ku pfumeleni; tikambani [leswi n’wine mi nga swone, NM].’ (2 Ba-le-Korinte 13:5) Nambitanu, hi djula leswi tlulaka lipfumelo ledzri tiyiki. Lizrandzru dzrezru ha Yehovha, ni vamakwezru dzri fanela ku tama dzri kula. Pawulo a te: ‘Nambi ndzri . . . ni ku tiva hinkwaku, nambi ndzri nga va ni ku pfumela hinkwaku lakakuva ndzri susa ni tinhava, loko ndzri nge na lizrandzru, a ndzri ntxhumu.’​—1 Ba-le-Korinte 13:1-3.

16. Xana Sathana a djula kuva hi titwisa kuyini?

¹⁶ Sathana a djula kuva hi pimisa leswaku hi nge ti za hi swi kotile ku nyonxisa Yehovha. A navela kuva hi hela ntamu ni kuva hi pimisa leswaku timhaka tezru a ti lulamiseki. A nga swi djuli kuva hi dumba vakriste-kulozri, mfuzri a nga djuli hi nyonxa. (Ba-le-Efesa 2:2) Sathana awa swi tiva leswaku ku titwa na u nga pfuni ntxhumu swi nga hona wene ni wuxaka byaku na Xikwembu Nkulukumba. Kambe Yehovha a hi nyike ntxhumu lowu nga hi pfunaka ku lwisana ni matitwela lawo. A hi nyike dumbo.

17. Xana a dumbo i dzra lisima hi ndlela yini?

¹⁷ Ka 1 Ba-le-Thesalonika 5:8, Bibele dzri fananisa  dumbo dzrezru ni xintlontlo kumbe xilembe lexi sizrelelaka nhloko ya musotxha a yimpini, dzri ku i ‘ku lavisela ka huluko’. Ku lavisela ka swidumbiso swa Yehovha swi nga sizrelela miyanakanyu yezru ni ku hi pfuna ku yalela miyanakanyu ya ku biha.

18, 19. Xana a dumbo dzri tiyise Yesu hi ndlela yini?

¹⁸ Yesu afa a tiyisiwa hi dumbo. A wusikwini byakwe bya wugamu la misaveni, a langusane ni swikazratu hi ku landzrelelana. A kanganyisiwe hi munghanu wakwe wa le kusuhi. Mumbeni a vheli a ku a nga mu tivi. A vambeni va tsrutsruma va mu siya. A pfukela hi vhanu va tiko dzrakwe, va londzra leswaku a dlayiwa hi ndlela ya ku vavisa. I yini swi mu pfuniki ku tiyisela mintxhumu hinkwayu leyi ya ku vavisa? “Hi nkonta ya ku nyonxa loku a ku bekeliwe yene a tiyiselela mhandzri ya nxanisa, a dzrela tingana, a ya tsrhamisa a vokweni dzra xinene dzra xiluvelo xa Xikwembu Nkulukumba, NM.”​—Ba-Heberu 12:2.

 ¹⁹ Yesu afa a swi tiva leswaku loko a dumbeka, afa a ta xwengisa Tatana wakwe ni ku kombisa leswaku Sathana i muhembi. Dumbo ledzro dzri mu yentxe a nyonxa swinene. Nakone afa a swi tiva leswaku ku nga li khale afa a ta tlhantukela matilweni ka Tatana wakwe. Dumbo ledzro dzri mu pfune ku tiyisela. Ku fana na Yesu, hi fanela ku womelela ka dumbo dzrezru. Swi ta hi pfuna ku tiyisela nambi ko ba lexi dumaka.

20. Xana i yini xi nga ku pfunaka ku va ni miyanakanyu leyinene?

²⁰ Yehovha awa ku vona ku tiyisela ni ku pfumela kwaku. (Ezaya 30:18; dondzra Malaki 3:10.) A dumbisa ku ‘ku nyika leswi djuliwaka hi mbilu yaku’. (Amapsalma 37:4) Xileswo, tsrhamela ku pimisa hi dumbo dzraku. Sathana a navela kuva u heleliwa hi dumbo ni ku pimisa leswaku a swidumbiso swa Yehovha swi nge ti za swi yentxekile. Kambe a wu fanelanga ku yi pfumelela mimpimiso leyo ya ku biha! Loko u vona leswaku a dumbo dzraku dzri ya dzri hela, kombela Yehovha  a ku pfuna. Dzrimuka mazritu lama nga ka Ba-le-Filipi 4:6, 7: ‘N’wi nga hlatiyeleleni ntxhumu, kambe a timhakeni hinkwatu a ku kombela kwenu a ku tibyiwe hi Xikwembu Nkulukumba, hi ku khongota, ni ku kombela ni ku tlangela. Kutani a ku zrula ka Xikwembu Nkulukumba, loku tlulaka ku yanakanya hinkwaku, ku ta bekisa timbilu tenu ni miyanakanyu yenu ku Kriste Yesu.’

21, 22. a) He wini nkongometo wa Xikwembu Nkulukumba hi misava? b) Xana u tiyimisele ku yentxa yini?

²¹ Vana ni xihena xa ku yanakanyisisa hi wumundzruku lebyi nyonxisaka lebyi byi hi yimeliki. Ku nga li khale, vhanu hinkwavu lava va hanyaka va ta gandzrela Yehovha. (Apfuletelo 7:9, 14) Yanakanya hi wutomi a misaveni leyimpshwa. Byi ta va byinene ngopfu ku tlula hinkwaswu leswi hi nga swi yanakanyaka! Sathana, mademona yakwe, ni hinkwaswu swa ku biha swi ta va swi susiwile. U nge he ti vabya, u nge he ti fa. A matsrhan’wini ya leswo, siku ni siku u ta pfuka na u tale hi nkhinkhi ni ntamu, u nyonxela wutomi. Vhanu hinkwavu va ta tizra hi wumun’we, va ndzruluta misava yi va paradeyisi. Hinkwavu va ta va ni swakuda leswinene va tlhela va hanya a mbangwini lowu sizrelelekiki. Vhanu va nge ti khomana hi tihanyi kumbe nsele, kambe va ta kombanana wunene. Hi nkama wolowo, vhanu hinkwavu a misaveni, va ta ‘tlhasa vuntsrhunxekeni bya ku phatima bya vana va Xikwembu Nkulukumba’.​—Ba-le-Roma 8:21.

²² Yehovha a djula kuva u mu yentxa munghanu waku lwenkulu. Xileswo yentxa hinkwaswu u nga swi kotaka akuva u yingiseta Yehovha ni ku tama u tsrhindzrekela kusuhi na yene siku ni siku. Ina, mawaku loko hinkwezru hi nga tama hi zrandzra Xikwembu Nkulukumba hi la ku nga gamikikiki!​—Yuda 21.