XANA wa swi xiya leswaku vhanu vanyingi va tivona na va faneliwa hi swiyavelo, kumbe ku djula ku khomiwa hi ndlela ya ku hlawuleka? Nambileswi va nga ni mintxhumu yinyingi, va ha djula leyi yengetelekiki. Vhanu lava nga ni mayanakanyela lawo va ni makwanga nakone a va khensi leswi va nga na swone. Hi leswi Bibele dzri swi hlayaka mayelanu ni leswi vhanu a va ta va xiswone a masikwini ya wugamu.—2 Tim. 3:2.

I ntiyiso leswaku ku va ni makwanga a hi swa namunhla. Hi xikombiso, Adamu na Evha va djule ku tihlawulela ha wuswavu leswi nga swinene ni leswi bihiki, swanga mihandzru, hinkwezru ha xaniseka hi kola ka xiboho xavu. Malembe manyingi lama landzreliki, Hosi Uziya wa le Yuda a a yanakanya leswaku a a ni mfanelo ya ku hisa muzri wa ku nun’hwela a tempeleni kambe a o tikanganyisa. (2 Makr. 26:18, 19) Hi lani ku fanaka, Vafarisi ni Vasaduki a va tivona na va faneleka ku khomiwa hi ndlela ya ku hlawuleka ha Xikwembu Nkulukumba hi leswi a va li va lixaka dzra Abrahamu.—Mat. 3:9.

Hi hanya ka misava leyi vhanu va nga ni makwanga, nakone hi nga ha tikuma na hi yetisela mahanyela yavu. (Gal. 5:26) Hi nga ha sungula ku yanakanya leswaku hi fanela ku yamukela xiyavelo xa kukazri hi ndlela ya ku hlawuleka. Hi nga yentxa yini akuva hi fambela kule ni mayanakanyela ya ku fana ni lawo? Xa ku sungula, hi fanela ku va ni vonela dzra Yehovha mayelanu ni mhaka leyi. Hi ta tlhela hi vona minsinya ya milawu yibidzri ya Bibele leyi taka hi pfuna ku fambela kule ni mayanakanyela lawo.

Yehovha hi yene a hlayaka leswi hi fanelaka ku swi yamukela. A hi voneni swin’we swa swikombiso.

• Ka lulamiselo dzra ndangu, Yehovha a djula leswaku nuna a titwa na a kombisiwa xitxhavu hi nsati wake, kasi nsati a djula ku titwa na a  kombisiwa lizrandzru hi nuna wake. (Efe. 5:33) Vatekani va fanela ku kombisana lizrandzru hi ndlela leyi yo ko fanela lava tekaniki ntsena. (1 Kor. 7:3) Vapswele va ni mfanelo ya ku yimela leswaku va yingisetiwa hi vanavu, nakone na vone vana va yimela ku kombisiwa lizrandzru ni ku seketeliwa hi vapswele vavu.—2 Kor. 12:14; Efe. 6:2.

• A bandleni, vakulu va tizra hi nkhinkhi xileswo hi fanela ku va hlonipha. (1 Tes. 5:12) Nambitanu, a va na yone mfanelo ya ku bindzrisela vamakwezru.—1 Pet. 5:2, 3.

• Xikwembu Nkulukumba a nyike tihosi ta misava mfanelo ya ku londzra tinemba ni ku yamukela xitxhavu ka lava va va fumaka.—Rom. 13:1, 6, 7.

Yehovha hi lizrandzru a hi nyika ni leswi kalaka swi nga hi faneli. Leswi hi nga vadohi, ho faneliwa ntsena hi lifu. (Rom. 6:23) Nambitanu, Yehovha a hi nyika matovoko manyingi hi kola ka lizrandzru dzrake dzra ku dumbeka. (Amaps. 103:10, 11) Tovoko dzrin’wana ni dzrin’wana kumbe xiyavelo xin’wana ni xin’wana lexi hi xi yamukelaka ka Yehovha hi swi yamukela hi kola ka timpswalu take letikulu kumbe leti kalaka ti nga hi faneli.—Rom. 12:6-8; Efe. 2:8.

Tivoneli akuva u nga sunguli ku yanakanya ku fana ni vhanu va misava leyi. Na hi nga swi xiyi, hi nga ha sungula ku yanakanya leswaku hi faneliwa hi swinyingi. Yesu a kombise ndlela leyi mayanakanyela lawa ma nga hi telaka ha yone hi ku nabyala hi ku tizrisa xifaniso xa vavanuna lava yamukeliki denari dzrin’we. Van’we va sungule ku tizra na ke he mixo nakone va tizre siku hinkwadzru, kasi van’wana ve tizra wora dzrin’we. Ntlawa wa ku sungula wu hlaye leswaku wu ni mfanelo ya ku yamukela muholo wa wunyingi hi kola na ntizro lowu wu wu yentxiki. (Mat. 20:1-16) Hi ku tizrisa xifaniso lexo, Yesu a kombe vadondzrisiwa vake leswaku va fanela ku nyonxa hi leswi Xikwembu Nkulukumba a va nyikaka swone.

Tlangela hi leswi u nga na swone. (1 Tes. 5:18) Yetisela mupostola Pawulo, lweyi a kalaka a nga kombelanga ka vamakwavu va le Korinte mintxhumu leyi a a yi vilela nambileswi a a ni mfanelo ya ku swi yentxa leswo. (1 Kor. 9:11-14) Hi fanela ku tlangela hinkwaswu leswi vhanu va hi nyikaka nakone hi nga londzri leswi yengetelekiki ka van’wana.

 Txutxela ku titsrongahata. Loko mhunu a yanakanya ngopfu hi yene n’winyi, hi ntolovelo mhunu lweyo a tivona na a ni mfanelo ya ku kuma leswi yengetelekiki. Ku titsrongahata swi ta hi pfuna kuva hi nga vi na wone mapimisela lawo ya ku biha.

Muprofeta Daniyele a hi siyele xikombiso lexinene xa ku titsrongahata. Ndangu lowu a a huma ka wone, ku xonga kwake, wutivi lebyi a a li na byone ni wuswikoti byake inaka a yanakanye leswaku hi swone swi mu yentxiki a khomiwa hi ndlela ya ku hlawuleka ku patsra ni ku yamukela swiyavelo leswi a swi kumiki. (Dan. 1:3, 4, 19, 20) Nambitanu, Daniyele a tame a titsrongahata nakone tsrhamela ledzro dzri mu yentxe a va wa lisima ka Yehovha.—Dan. 2:30; 10:11, 12.

A hi fambeleni kule ni moya wa ku tizrandzra ku tlula mpimu lowu yaka wu tinyika ntamu namunhla. A matsrhan’wini ya leswo, a hi tameni hi nyonxa hi swiyavelo hinkwaswu leswi Yehovha a hi nyikaka swone hi kola ka timpswalu take letikulu.