Maria na João a va tsrhama ka tiko ledzri vhanu vanyingi lava buyaka he Filipinas va yaka tsrhama ni ku tizrela kone, nakone va nyonxa ngopfu hi ku va zrezrela madzrungula lamanene. Hi nkama wa ntungu wa COVID-19, Maria a sungule ku fambisa swidondzro swa Bibele ku nge ntsena ka tiko ledzri a tsrhamaka ka dzrone kambe ni le ka mimbangu yin’wana ya misava. A swi kotise kuyini?

Maria a a vutisa swidondzro swake swa Bibele a ku: “Xana u tiva mhunu lweyi a a ta swi nyonxela ku dondzra Bibele?” Loko a li leswaku va li ina ka xivutiso xake, Maria a a ku: Nikombela u ni komba. Ku hamba xivutiso lexi xa ku nabyala makhambi manyingi swi tisa mabindzru lamanene. Ha yini? Hikusa vhanu lava nyonxelaka madzrungula lamanene swi tolovelekile kuva va byela maxaka yavu ni vanghanu vavu leswi va swi dondzriki. Xana ma ve wani mabindzru ya xivutiso lexi?

Xidondzro xa Bibele xa Maria lexi vitaniwaka Jasmin xi mu kombe mune wa swidondzro swa Bibele leswimpshwa. Mun’we wa vone ku nga Cristina, a a swi zrandzra ngopfu leswi a a swi dondzra lakakuva a kombele Maria leswaku va dondzra kabidzri hi vhiki. Loko Maria a vutise Cristina leswaku a a tiva mhunu lweyi a navelaka ku dondzra Bibele, Cristina a te: “Ina, ni ta ku komba vanghanu vanga.” Ntsrhaku ka mavhikinyana, Cristina a kombe Maria mune wa vanghanu vake lava a va nyonxela ku dondzra Bibele. Hi ku landzrela Cristina a mu kombe vanghanu vake van’wana, lani van’we kwavu va mu kombiki vanghanu vavu.

Cristina a a djula leswaku ni ndangu wake lowu nga Filipinas na wone wu dondzra Bibele. Xileswo, a bule ni n’wanake Andrea. A ku sunguleni, Andrea a pimise leswi: ‘A Timboni ta Yehovha a ti pfumelelani ni wukhongoti byimbeni, a ti kholwi ka Yesu nakone to tizrisa ntsena Testamento dzra khale.’ Ntsrhaku ka loko a fambiseliwe xidondzro xa ku sungula, a xiye leswaku leswi a a swi yanakanya mayelanu ni Timboni a a nga li swone. Loko a ya a dondzra mintxhumu leyimpshwa a Bibeleni a a ku: “Leswi hi leswi Bibele dzri swi dondzrisaka, xileswo i ntiyiso!”

Hi ku famba ka nkama, Andrea a kombe Maria vanghanu vake vabidzri ni mutizrikulobye lweyi va sunguliki ku dondzra Bibele. Handle ka leswo, na Maria a nga swi tivi, titiya wa Andrea lweyi a kalaka a nga voni lweyi a vitaniwaka Angela a a yingiseta loko Andrea a li ku dondzreni. Kutani, siku dzrin’wana, Angela a kombele Andrea leswaku a byela Maria leswaku na yene a djula ku dondzra Bibele. Angela a a swi zrandzra leswi a a swi dondzra, ntsena hi hweti yin’we Angela a bekise tindzrimana  tinyingi hi nhloko nakone a a djula ku dondzra ka mune hi vhiki. Angela hi ku pfuniwa hi Andrea a sungule ku kumeka a mintlhanganwini vhiki ni vhiki hi ku tizrisa video-conferência!

Loko Maria a xiye leswaku nuna wa Cristina ku nga Joshua a a sala ntsrhaku nkama lowu va nga ku dondzreni, Maria a mu vutise leswaku a nga swi nyonxeka ku dondzra na vone kumbe imhim. Joshua a te: “Ni to yingiseta ntsena, u nga ni vutise ntxhumu, loko wo ni vutisa ni to suka ni famba.” Ka ntlhanu wa maminutu na vo ho sungula ku dondzra, a hambe swivutiso swinyingi ku tlula Cristina nakone a a djula leswaku va tama va bulisana hi Bibele.

A xivutiso xa ku nabyala xa Maria xi yentxe leswaku va tama va bulisana hi Bibele. Ka swidondzro swinyingi leswi a a li na swone a hambe malulamiselo ya leswaku swi fambiseliwa hi vamakwezru van’wana. Maria a sungule ku fambisa 28 wa swidondzro swa Bibele ka matiko ya ku hambanahambana.

Jasmin xidondzro xa ku sungula lexi hi buliki ha xone ka mfambu lowu, a babatisiwe hi Abrili wa 2021. Cristina a babatisiwe hi Mayu wa 2022 nakone a tlhelele Filipinas akuva a ya va ni ndangu wake. Swidondzro swin’wana swibidzri leswi Cristina a swi kombiki Maria na swone swi babatisiwile. Ka tihweti leti landzreliki, Angela a babatisiwile nakone swoswi a tizra swanga phayona dzra nkama hinkwawu. A nuna wa Cristina, n’wanake wa xisati Andrea kun’we ni swidondzro swibidzri swa Bibele va yentxa nhluvuku lowukulu.

A dzaneni dzra ku sungula a madzrungula lamanene ma hangalake hi ku kahlula ka maxaka ni vanghanu. (Yoh. 1:41, 42a; Mint. 10:24, 27, 48; 16:25-33) Swi ngo yini u vutisa swidondzro swaku swa Bibele ni van’wana lava nyonxelaka leswaku, “Xana va nga va na a tiva mhunu lweyi a a ta swi nyonxela ku dondzra Bibele?” Loko wo hamba xivutiso lexi xa ku nabyala, swi nga yentxeka na wene u kuma vhanu vanyingi lava djulaka ku dondzra Bibele.