Vhanu lava va gingiritekaka a va wu txhavi ntizro. Va nyonxela ku tizra hi ntamu leswaku va kuma leswi va swi djulaka ni ku pfuna van’wana nambiloko van’wana va nga wu xiyi ntizro lowu va wu yentxaka.

Loko hi li kazri hi hanya, ku ni mintxhumu ya ku tala leyi hi fanelaka ku yi yentxa. Nambi leswi vhanu vanyingi namunhla va nga swi zrandzrikiki ku tizra hi ntamu, ku gingiriteka swi ta ku pfuna swinene.​—Eklesiasta 3:13.

“Ni dondzre leswaku loko u tizra hi ntamu, wa tikhuza u tlhela u titwa na u nyonxile. Ku titwa na ni nyonxile hi ndlela yoleyo swi ni yentxe leswaku ni zrandzra ku tizra. Ku gingiriteka swi ta yentxa leswaku u va ni ndhuma leyinene.”​—Reyon

NSINYA WA NAWU WA BIBELE: ‘A ntizro mun’wana ni mun’wana wu ni hakelo.’​—Amaproverbia 14:23.

Tikazratele ku va ni vonela ledzrinene hi ntizro hi ku landzra magwansu lama tlhamuxeliwiki lani hansi.

Nyonxa hi ntizro lowu u wu yentxaka: Nambi loko u yentxa ntizro wa le kaya, ntizro wa xikole kumbe u yentxa ntizro wa ku tihanyisa, tinyiketele ka leswi u swi yentxaka. Loko ku li ni ntizro lowu u kotaka ku wu yentxa, djula tindlela ta ku wu yampswisa ni ku wu yentxa hi ku kahlula. Loko u ya u wu tiva ha hombe, u ta nyonxa hi ntizro waku.

NSINYA WA NAWU WA BIBELE: ‘Xana ke u vona n’anga kumbe ntlhazri ya ku tizra? A ta yima mahlweni ka tihosi a nga ka a nga yimi mahlweni ka vhanu ntsena.’​—Amaproverbia 22:29.

Vona Leswi Swi Nga Swa Lisima. Minkama yinyingi, loko u yentxa mintizro yaku ha hombe, u pfuna van’wana. Hi xikombiso, loko u gingiriteka kaya, u pumbela swizro swin’wana swa ndangu ntizro.

NSINYA WA NAWU WA BIBELE: ‘A tovoko dzra ku hanana dzri tlula tovoko dzra ku hananiwa.’​—Amintiṛo 20:35.

Yentxa Leswi Yengetelekiki: A matsrhan’wini ya ku yentxa mintizro leyi u nyikiwiki yone ntsena, dzringisa ni ku yentxa ni leswi yengeselekiki. Loko u yentxa tanu, swi ta kombisa leswaku u ni wutihlamuleli, hikuva u yentxa tanu handle ka ku sindzrisiwa kambe hi kola ka leswi u swi zrandzraka.​—Matewu 5:41.

NSINYA WA NAWU WA BIBELE: ‘Suka a vunene byaku byi va hi ku sindzrisiwa, ku nga vi ha ku swi zrandzra.’​—Filemon 14.

Dzringanisela. Vhanu lava va gingiritekaka a va lolohi naswone a va tidlayi hi ntizro. Va dzringanisela, va tikholisa hi ku tizra hi ntamu va tlhela va wisa.

NSINYA WA NAWU WA BIBELE: ‘A voko dzin’we ledzri taliki hi ku wisa, dzri tlula mavoko mabidzri lama taliki hi ku kazrala ni ku landzra mheho.’​—Eklesiasta 4:6.