KA VATEKANI
1: Ku Tinyiketela
LESWI TLHAMUXELAKA SWONE
Loko nuna na nsati va tinyiketela kumbe ku tiyimisela a mutxhatwini wavu, va vona ku tlhangana kwavu swanga loku tsrhamaka hi la ku nga helikiki nakone leswo swi yentxa leswaku ku va ni ku dumbana makazri kwavu. Va ni ku dumba ka leswaku ha mun’we ka vone a ta hlonipha xiboho lexi va ti tsrimbeliki xone nambi hi minkama ya ku kazrata.
Vatekani vambeni vo hanya xikan’we hikola ka ku sindzrisiwa hi maxaka ni vanghanu. Kambe i swinene ku va nuna na nsati va hanya kun’we nava tiseketela hi xitxhavu ni lizrandzru.
NSINYA WA NAWU WA BIBELE: ‘Na ye wanuna a nga tsriki nsati wakwe.’—1 Ba-le-Korinte 7:11.
“Loko u tiyimiselile a wukatini byaku a wu nga ti kwata hi ku nabyala. U ta lulamela ku dzrivalela u tlhela u dzrivala hi mhaka ya kone. U nga ti vona swizralanganya swanga mukhandlu wa ku dlaya wukati, kambe u ta swi vona swanga swikazratu leswi nga lulamisiwaka.”—Mika.
HA YINI SWI LI SWA LISIMA
Loko ku nge na ku tiyimisela wukatini, loko ku humelela swikazratu vatekani va ta hantla va tibyela leswi, ‘A hi hambeliwanga ku va hi hanya xikan’we’ nakone va ta djula tindlela ta ku helisa wukati byavu.
“Vanyingi va txhata na va pimisa hi ku dlaya wukati. Loko mhunu a txhata na a ni miyanakanyu ya ku helisa wukati, mutxhatu wavu wu vhela wu sungula na wu nge na ku tiyimisela.”—Jean.
U NGA YENTXA YINI?
TIKAMBELE
Loko ku pfuka mholova . . .
U sungula ku tisola hi leswi u nga txhata ni nuna waku kumbe nsati waku?
U tiyanakanya na u txhate ni mhunu mumbeni?
U hlaya mintxhumu ya ku fana ni leyi: ‘Swa mine na wene swi helile’ kumbe ‘ni ta djula mumbeni lweyi a taka ni nyika lisima’?
Loko nhlamulu yaku ka xin’we xa swivutiso leswi kumbe ku tlula a li ina, swi djula u tiyimisela kumbe u tinyiketela a mutxhatwini waku.
BULANI HI LESWI
Xana ndlela leyi a hi tiyimisele ha yone a wukatini byezru yi pumbekile? Loko nhlamulu a li ina, swi yentxiwe ha yini?
Hi fanela ku yentxa yini akuva hi tinyiketela a mutxhatwini wezru?
YENTXA LESWI
Pima nkama u tsralela nkataku mazritu ya lizrandzru
Kombisa ku tinyiketela kwaku hi ku beka mafoto ya nkataku ka meza waku wa le ntizrweni.
Fonela nkataku loko u li ntizrweni kumbe loko u le kule naye.
NSINYA WA NAWU WA BIBELE: “Leswi Xikwembu Nkulukumba a swi patsriki, ku nga vi na mhunu lweyi a swi tsravukanisaka.”—Matewu 19:6.
