KA VAMPSHWA
12: Makungu
LESWI TLHAMUXELAKA SWONE
Kungu a hi ntsena ntxhumu lowu wo ko wu lozra kumbe ntxhumu lowu u navelaka kuva wu yentxeka. Ku hetisisa makungu swi djula leswaku u hlela ha hombe, u tinyika nkama u tlhela u tizra hi ntamu.
Ku hetisisa makungu swi nga ha teka masiku kumbe mavhiki ma nga li mangani, tihweti, lembe kumbe ku tlula. Swi ya hi leswaku u tibekele makungu ya ku tlhasa kwini. Akuva u kota a ku hetisisa makungu lawa swi nga ku tekelaka nkama wa ku leha ku ma hetisisa, swi djula u sungula hi ku tibekela makungu lawa u nga kotaka ku ma hetisisa hi ku kahlula.
HA YINI SWI LI SWA LISIMA
Ku hetisisa makungu yaku swi nga yentxa u ya u tidumba, u va u nyonxa ni kuva u tiyisa wuxaka byaku ni vanghanu vaku.
Ku tidumba: Loko u tibekela makungu u tlhela u kota ku ma hetisisa, swi ta ku nyika ntamu wa ku kota ku tibekela makungu lawa swi nga tekaka nkama wa ku leha ku ma hetisisa. U ta tlhela u kota ku langutana ni mintlhontlho ya siku ni siku ya ku fana ni ku kamiwa hi tintanga kuloni.
Ku yentxa vanghanu: Vanyingi va zrandzra ku tsrhama ni vhanu lava va nga ni makungu ya kukazri naswone va tikazratelaka ku ma hetisisa. Ku tlula kolanu a wunghanu bya tiya loko wene ni munghanu waku mi li ni makungu lama fanaka naswone mi tikazratela ku ma hetisisa.
Ku nyonxa: Loko u tibekela makungu u tlhela u ma hetisisa, swi ta ku yentxa u nyonxa.
“Ni zrandzra ku tibekela makungu. Ma yentxa leswaku ni swi tiva leswi ni swi djulaka ni kuva ni tikazratela ku ma hetisisa. A ntsrhaku ka loko u hetisisile kungu dzraku, swa nyonxisa ku yanakanyisisa hi leswi u swi hetisisiki kutani u ku: ‘Hi mine lweyi! Ni swi kotile ku hetisisa leswi a ni djula ku swi yentxa.’”—Christopher.
NSINYA WA NAWU WA BIBELE: ‘Lwa langusaka mheho a nga ka a nga byali; ni lwa langusaka matlavi a nga ka a nga tsrhoveli.’—Eklesiasta 11:4.
LESWI U NGA SWI YENTXAKA
Hi leswi swin’wana swa leswi u nga swi yentxaka akuva u kota ku hetisisa makungu yaku.
Tiva makungu yaku: Tsrala makungu lawa u djulaka ku ma hetisisa hi ku ya hi lisima dzra wone, u va u hlawula lawa u djulaka ku zranga ha wone ku ko u hetisa hinkwawu.
Hlela. Ka kungu dzrin’wana ni dzrin’wana ni dzrin’wana, yentxa leswi landzrelaka:
Tibekele nkama lowu u djulaka ku hetisisa kungu dzraku ha wone.
Hlela hinkwaswu leswi u fanelaka ku swi yentxa.
Yanakanya hi swikazratu leswi nga ha vaka kone ni ndlela leyi u nga swi hlulaka ha yone.
Teka gwansu. U nga yimeli ku hlengeleta mintxhumu hinkwayu ku li kone u ta ka sungula. Tivutise: ‘I yini lexi ni fanelaka ku xi yentxa ku sungula akuva ni ta kota ku hetisisa a kungu dzranga?’ Kutani xi yentxe. Loko u heta gwansu ha dzrin’wedzrin’we, tsrala hansi.
NSINYA WA NAWU WA BIBELE: ‘A makungu ya lwa khinyelaka ma yisa ndzralwini.’—Amaproverbia 21:5.
