KA VAPSWALI
6: Xilayu
LESWI TLHAMUXELAKA SWONE
Zritu ku laya dzri nga ha tlhamuxela ku kongomisa kumbe ku dondzrisa. Minkama yimbeni leswo swi patsra ku lulamisa n’wana loko a yentxe xihoxo. Hakanyingi swi patsra ku dondzrisa n’wana mahanyelo lawa ma ta ka mu pfuna kuva a yentxa swiboho leswinene.
HA YINI SWI LI SWA LISIMA
Masiku lawa ka mindangu yimbeni, vana a va layiwi swanga hi leswi vapswali va txhavaka leswaku ku yentxa leswo swi nga yentxa vana va nga tidumbi. Kambe vapswali lava tlhazrihiki, va beka milawu leyi fanelaka ku dondzrisa vanavu leswaku va hanya ha yone.
“Vana va fanela ku byeliwa leswi va fanelaka ku swi yentxa ni leswi va nga fanelangakiki ku swi yentxa akuva va kula hi ndlela leyinene. Loko vana va nga layiwi, va ta yentxa swiboho leswi hoxekiki, leswi taka yentxa leswaku swi nga va fambeli ha hombe a wuton’wini.”—Pamela.
LESWI U NGA SWI YENTXAKA
U nga txintxatxintxi. Loko n’wana a nga yingiseti milawu leyi u nga mu bekela yone, u nga ganaganeki ku mu laya kambe loko a yingiseta mu kulungele.
“Ni tsrhamela ku kulungela vananga loko va yingiseta hikusa a misaveni leyi vana a va ha yingiseti. Loko u va kulungela, swi ta va nabyalela ku yamukela xilayu lexi u va nyikaka xone.”—Christine.
NSINYA WA NAWU WA BIBELE: ‘Leswi mhunu a swi byaliki, a ta swi tsrhovela.’—Ba-le-Galatiya 6:7.
Yanakanyela. Loko u laya n’wana mu laye hi ku ya hi malembe yake ni hi kuya hi wukulu bya xidoho xake. Mihandzru ya kone yi fanela ku fambisana ni xidoho xake. Hi xikombiso, loko a tizrisa telefone hi ndlela yaku biha u nga ha dzri teka ku dzringana nkama wa kukazri. U nga hlundzrukisiwi hi mhaka yitsrongo hi kuva u nga swi zrandzranga leswi a swi yentxiki.
“Ni sungula ni kambisisa leswaku n’wananga a dohe ha vomu kumbe e phazama. Ku ni ku hambana ka xihena lexi nga ha djulaka n’wana a khatisiwa ni xihoxo lexi xo ko djula ku va a biwa ndleve ntsena.”—Wendell.
NSINYA WA NAWU WA BIBELE: ‘N’wi nga hlundzrukeleni vana venu, va nga ti hela timbilu.’—Ba-le-Kolosa 3:21.
Kombisa lizrandzru. Vana swi nga ha va nabyalela ku yamukela xilayu loko va tiva leswaku vapswali vavu va va laya hi leswi va va zrandzraka.
“Loko n’wanezru a yentxe xihoxo, hi sungula hi ku mu kulungela hikola ka leswinene a swi yentxiki a nkameni lowu khalutiki. Hi mu tlhamuxela leswaku xihono xin’we a xi mu yentxi mhunu wa ku biha, ntsena loko a tiyimisele ku xi lulamisa ni leswaku hi ta mu pfuna ku yentxa leswo.”—Daniel.
NSINYA WA NAWU WA BIBELE: “A lizrandzru li lehe mbilu; li ni wumbilu.”—1 Ba-le-Korinte 13:4.
