1-2. I yini xitizrulo nakone ha yini hi xi vilela?

LOKO Adamu a dohile, a lahle ndjombo ya ku hanya wutomi lebyi nga helikiki, ku nga li ka yene ntsena, kambe ni ka vana vakwe lava a va ha ta pswaliwa. Adamu a a nga na ku tiyimelela ka leswi a swi yentxiki. A hlawule ku doha kutani a a faneliwa hi ku fa. Hi nga hlaya yini hi vana vakwe? Vone a va nga na nandzru hi leswi Adamu a dohiki. (Ro 5:12, 14) Xana a ku ta yentxiwa xa kukazri akuva va huluxiwa ka lifu? Ina! Ntsrhakunyana ka loko Adamu a dohile, Yehovha a kombise ha katsrongokatsrongo leswi a a ta swi yentxa akuva ku huluxiwa vana vanyingi va Adamu ka xidoho ni lifu. (Gn 3:15) Hi nkama lowu fanelekaka, Yehovha a a ta zrumela n’wanakwe akuva a nyikela wutomi byakwe byi va ‘xitizrulo xa lava ku tala’.—Mr 10:45; Yh 6:51.

² I yini xitizrulo? Ka matsralwa ya Xigriki, xitizrulo i hakelo ledzri Yesu a dzri nyikeliki akuva a xava leswi Adamu a swi luziki. (1Ko 15:22) Ha yini hi vilela xitizrulo? Hi mhaka ya milawu ya Yehovha ya ku lulama. Ka nawu lowu Yehovha a wu nyikiki Vaisrayele a hlaye leswaku a va fanela ku hakela wutomi hi wutomi. (Eks 21:23, 24) Adamu a lahlekeliwe hi wutomi lebyi hetisekiki. Akuva a hetisisa milawu leyi hetisekiki leyi lulamiki ya Xikwembu Nkulukumba, Yesu a nyikeli wutomi byakwe lebyi hetisekiki. (Ro 5:17) Hi ndlela leyo a ndzruluki Papayi wa hi lani ku nga helikiki wa hinkwavu lava kombisaka lipfumelo ka xitizrulo.—Eza 9:6; Ro 3:23, 24.

3. Hi ku ya hi Yohan 14:31 na 15:13, ha yini Yesu a a tiyimisele ku nyikela wutomi byakwe lebyi hetisekiki akuva byi va xitizrulo?

³ Yesu a mu zrandzra swinene Papayi wakwe wa le matilweni nakone a zrandzra mun’wana ni mun’wana wezru. Xileswo, a a tiyimisele ku nyikela wutomi byakwe akuva byi va xitizrulo. (Dondzra Yohan 14:31; 15:13.) Hi ku susumetiwa hi lizrandzru Yesu a a tiyimisele ku dumbeka ku ya tlhasa wugamu bya wutomi byakwe ni ku yentxa ku zrandzra ka Papayi wakwe. Hi ndlela  leyo, nkongometo wa Yehovha hi vhanu ni misava a wu ta hetiseka. Ka xidondzro lexi, hi ta vona leswaku ha yini Yehovha a pfumelele leswaku Yesu a fa hi ndlela ya ku vavisa. Ntsrhaku, hi ta bula hi mun’we ka vatsrali va Bibele lweyi a a nyika lisima xitizrulo. Hi wugamu, hi ta bula hi ndlela leyi hi nga kombisaka ha yone ku tlangela xitizrulo lexi Yehovha na Yesu va hi nyikiki xone.

4. Tlhamuxela ndlela leyi Yesu a fiki ha yone.

⁴ Yanakanya hi leswi humeleliki ka siku dzra wugamu dzra wutomi bya Yesu la misaveni. A a ta va a vitane makhandzra ya tintsrumi akuva ti mu sizrelela. Kambe a tsrhike masotxha ya Varoma ma mu khoma ma tlhela ma mu ba. (Mt 26:52-54; Yh 18:3; 19:1) Masotxha a ma tizrisa ntsilana wa kukazri lowu loko va ba Yesu nhlanini a wu susa ni nyama. Nambi leswi Yesu a a tale hi swilondzra a nhlanini, masotxha ma mu sindzrise ku tlakula mhandzri ya ku bindzra swinene, kutani Yesu a sungule ku kokovisa mhandzri a famba na yone lomu a a ta dlayiwa kone. Kambe ntsrhaku masotxha ma zrume wanuna wa kukazri akuva a mu tlakulela mhandzri. (Mt 27:32) Kutani loko Yesu a tlhasa lani a a ta dlayiwa kone, masotxha ma gongondzrela mavoko wakwe ni milenge yakwe a mhandzrini. A ku bindzra ka mizri wa Yesu ku yentxa leswaku swipikizri swi mu vangela swilondzra leswikulu. A vanghanu vakwe va vaviseka, nakone mamana wakwe wa dzrila, kambe a Vayuda vo mu hleka Yesu. (Lk 23:32-38; Yh 19:25) Loko nkama wu ya wu khaluta a ya a twa ku vavisa ngopfu swinene. Mbilu ni maphaphu ya Yesu swi ya swi kazrala, leswi yentxaka leswaku swi mu kazratela ngopfu ku hefemula. Yesu a khongote hi khambi dzra wugamu a va a kozramisa nhloko a nyiketa wutomi byakwe ka Yehovha. (Mr 15:37; Lk 23:46; Yh 10:17, 18; 19:30) Handle ka ku ganaganeka, Yesu a fe hakatsrongokatsrongo hi ndlela ya ku vavisa ni ya tingana.

5. Ka Yesu i yini lexi xi vavisiki ngopfu ku tlula ndlela leyi a dlayiwiki ha yone?

⁵ A xa ku vavisa ngopfu ka Yesu, a ku vanga ndlela leyi a nga dlayiwa ha yone. A a vaviseka ngopfu hi leswi a va mu lumbeta ha swone akuva va mu dlaya, va mu lumbete va ku i musandzri—ku nga mhunu lweyi a kalaka a nga na xitxhavu ha Xikwembu Nkulukumba ni vito dzrakwe. (Mt 26:64-66) Ntsena hi ku byeliwa leswo, swi mu kazrate ngopfu Yesu lakakuva a kombele kuva Papayi wakwe a mu tsretsrelela ka tingana leto. (Mt 26:38, 39, 42) Ha yini Yehovha a pfumelele ku va n’wanakwe wa ku zrandzreka a xaniseka a tlhela a fa? A hi voneni swivangelo swizrazru.

6. Ha yini Yesu a a fanela ku hayekiwa a mhandzrini ya nxanisa?

⁶ Xa ku sungula, Yesu a a fanela ku hayekiwa a mhandzrini ya nxanisa, leswaku a ntsrhunxa Vayuda ka xizruku xa kukazri. (Ga 3:10, 13) A va pfumelile ku hanya hi nawu wa Xikwembu Nkulukumba kambe a va zanga va wu hetisisa nikutsrongo. Swanga mihandzru, handle ka kuva va faneliwa hi ku fa hi leswi va nga vana va Adamu, a va ni xizruku lexo. (Ro 5:12) Nawu wa Xikwembu Nkulukumba ka Vaisrayele a wu hlaya leswaku loko mhunu a yentxa xidoho lexi faneliwaka hi ku fa, a a fanela ku dlayiwa. Ntsrhaku ka leswo, ntsrumbu wakwe a wu fanela ku hayekiwa a mhandzrini. * (Dt 21:22, 23; 27:26) Xileswo, hi ku hayekiwa a mhandzrini, Yesu a yentxe leswaku Vayuda volavo va mu yaliki va pfuneka hi xitizrulo xakwe.

7. He xini xivangelo xa wubidzri lexi yentxiki leswaku Yehovha a pfumelela kuva n’wanakwe a xaniseka?

⁷ A hi kambisiseni xivangelo xa wubidzri lexi  yentxiki kuva Yehovha a pfumelela n’wanakwe kuva a xaniseka. A a li ku wupfiseni ka Yesu akuva a kota ku tizra swanga Muprista Lwenkulu a nkameni lowu taka. Yesu a yi vonile ndlela leyi swi kazrataka ha yone ku yingiseta Xikwembu Nkulukumba loko u li ndzringweni lowukulu. A a kazrateke ngopfu swinene lakakuva a khongote a kombela mpfunu hi ‘swidzrilo leswikulu ni minyembeti’. Nakunene, leswi a khalutiki hi ka swikazratu leswikulu, Yesu ha byakwe awa swi twisisa leswi hi swi vilelaka nakone awa swi kota ku ‘pfunisa lava dzringiwaka’. Hi tlangela swinene leswi Yehovha a hi nyikiki Muprista Lwenkulu lwa nga ni timpswalu ni ‘lweyi a swi kotaka ku tsretsrelela gome dzrezru’!—Hb 2:17, 18; 4:14-16; 5:7-10.

8. He xini xivangelo xa wuzrazru lexi yentxiki kuva Xikwembu Nkulukumba a pfumelela leswaku Yesu a dzringiwa hi ndlela leyikulu?

⁸ Xa wuzrazru, Yehovha a pfumelele leswaku Yesu a xaniseka ku tlula mpimu akuva ku hlamuliwa xivutiso xin’wana xa lisima: Xana mhunu wini na wini a nga swi kota ku tsrhama na a dumbekile ka Yehovha nambi loko a dzringiwa hi ndlela leyikulu? Sathana a li im-him! A li vhanu vo tizrela Xikwembu Nkulukumba hi swivangelo swa wutiyanakanyi. Nakone a kholwa leswaku, ku fana ni papayi wavu wa ku sungula, Adamu, a va mu zrandzri Yehovha. (Yb 1:9-11; 2:4, 5) Leswi Yehovha a a tiyiseka leswaku n’wanakwe awa dumbeka, a pfumelele leswaku Yesu a dzringiwa hi tindlela hinkwatu letikulu leti mhunu a nga kotaka ku ti tiyiselela. Yesu a tsrhame a dumbekile a va a kombisa leswaku Sathana i muhembi.

9. Xana mupostola Yohane a hi bekele xikombiso xini?

⁹ Vakriste vanyingi va tiyisiwe lipfumelo hi ndondzro ya xitizrulo. Va tama va zrezra nambi loko va kanetiwa nakone va tiyisela mindzringo ya minxaka hinkwayu va za va duhwala. Vona xikombiso xa mupostola Yohane. A zrezre ntiyiso mayelanu na Kriste ni xitizrulo hi ku dumbeka ku dzringana kolomu ka 60 wa malembe. Loko a li kusuhi ni ku pfala 100 wa malembe, swi tikomba na mfumu wa le Roma a wu mu vona swanga mhunu lwa nga honaka tiko, wu va wu mu pfalela a xihlaleni xa Patmosi. A ve xini xidoho xakwe? A a dlawela ku vulavula hi ‘Zritu dzra Xikwembu Nkulukumba ni hi wumboni bya Yesu’. (Mpf 1:9) Mawaku xikombiso lexikulu xa lipfumelo ni ku tiyisela!

10. Xana mazritu ya Yohane ma swi kombisa hi ndlela yini leswaku a a xi tlangela xitizrulo?

¹⁰ Ka mazritu yakwe lama huhutiwiki, Yohane a phofule lizrandzru dzrikulu ha Yesu a tlhela a tlangela xitizrulo. A khanele hi xitizrulo kumbe mabindzru lama tisiwaka ha xone ku tlula 100 wa makhambi. Hi xikombiso, Yohane a tsrale leswi: ‘Loko mhunu a dohile, hi ni muyimeli ku [Papayi], a nga Yesu Kriste, lweyi wa ku lulama.’ (1Yh 2:1, 2) Mazritu ya Yohane ma tlhele ma kandzrakanya lisima dzra ku nyikela ‘wumboni bya Yesu’. (Mpf 19:10) Swi le livaleni leswaku Yohane a a xi tlangela ngopfu swinene xitizrulo. Hine ke, hi nga xi tlangelisa kuyini hi ndlela leyi fanaka?

11. I yini xi nga hi pfunaka ku yala loko hi dzringiwa ku wela xidohweni?

¹¹ Yala loko u dzringiwa ku wela xidohweni. Loko hi xi tlangela ha kakunene xitizrulo, a hi nge ti pimisa hi ndlela leyi: ‘A swi vileli ni tikazrata ngopfu leswaku ni nga dohi loko ni dzringiwa. Ni nga doha, ni ta gama ni kombela ku dzrivaleliwa.’ A matsrhan’wini ya leswo, loko hi dzringiwa ku yentxa leswi bihiki, hi ta ku: ‘Mine, ni nge txhuki! Ni nga wu yentxisa kuyini ntxhumu wa ku fana ni lowu, ntsrhaku ka hinkwaswu leswi Yehovha na Yesu va ni  yentxeliki swone?’ Hi nga kombela Yehovha a hi nyika ntamu wa ku yima ka xiboho lexo hi ku: “U nga hi tsrhiki hi nghena ndzringweni.”—Mt 6:13.

12. Hi nga xi tizrisa hi ndlela yini xipfunu lexi kumekaka ka 1 Yohan 3:16-18?

¹² Zrandzra vamakwezru. Hi nga tlhela hi kombisa leswaku ha xi tlangela xitizrulo hi ku zrandzra vamakwezru. Ha yini? Hikusa Yesu a nga nyikelanga wutomi byakwe hi mhaka ya hine ntsena, kambe ni hi nkonta ya vamakwezru. Loko ku li leswaku a a tiyimisele ku va fela swi le livaleni leswaku va ni lisima dzrikulu ku yene. (Dondzra 1 Yohan 3:16-18.) Hi kombisa lizrandzru ka vamakwezru hi ndlela leyi hi va khomaka ha yone. (Ef 4:29, 31–5:2) Hi xikombiso, ha va pfuna loko va vabya kumbe loko va tiyiselela mindzringo leyikulu ku patsra ni timhangu ta ntumbuluku. Kambe xana hi fanela ku yentxa yini loko mupfumeli kulozri a hlaya kumbe a yentxa ntxhumu lexi hi khunguvanyisaka?

13. Ha yini hi fanela ku dzrivalela?

¹³ Xana swa ku kazratela ku dzrivalela vamakwezru loko va ku dohela? (Lv 19:18) Loko swi li tanu, landzra xilayu lexi: ‘N’wi byatsrhana ni ku dzrivalelana milandzru, loko mun’we e ni mhaka leyi a holovelaka mun’wana ha yone; swanga heswi Kriste a n’wi dzrivaleliki, na n’wine yentxisani xiswoswo.’ (Kl 3:13) Minkama hinkwayu loko hi dzrivalela vamakwezru va xinuna ni va xisati hi komba vamakwezru leswaku hi xi tlangela hi mbilu hinkwayu xitizrulo. Xana hi nga yengeselisa kuyini ku tlangela kwezru hi nyiko leyi ya Xikwembu Nkulukumba?

14. He yini ndlela yin’wana leyi hi nga yengeselaka a yone ku tlangela kwezru hi xitizrulo?

¹⁴ Khensa Yehovha hi kola ka xitizrulo. Joanna, makwezru wa xisati lweyi a nga ni 83 wa malembe, lweyi a tsrhamaka a Índia, a li: “Ni yanakanya leswaku i swa lisima kuva siku ni siku ni vulavula hi xitizrulo loko ni khongota ni tlhela ni tlangela Yehovha hi kola ka xone.” Loko u tihambela xikhongoto, pimisa hi mimphazamu ya kukazri leyi u yi yentxeki a ndzreni ka siku u va u kombela Yehovha akuva a ku dzrivalela. I ntiyiso leswaku loko u yentxe swidoho leswikulu u ta tlhela u vilela mpfunu wa vakulu. Va ta ku yingiseta va tlhela va ku nyika swilayu leswi humaka Zritwini dzra Xikwembu Nkulukumba hi ndlela ya lizrandzru. Va ta khongota kun’we na wene, va kombela Yehovha akuva a ya mahlweni a tizrisa gandzrelo dzra Yesu akuva u “holisiwa” hi tlhelo dzra moya.—Yk 5:14-16.

15. Ha yini hi fanela ku tinyika nkama wa ku dondzra ni ku yanakanyisisa hi xitizrulo?

 ¹⁵ Yanakanyisisa hi xitizrulo. Makwezru wa xisati, lweyi a vitaniwaka Rajamani, lweyi a nga ni 73 wa malembe, a li: “Loko ni dondzra hi ta ndlela leyi Yesu a fiki ha yone, matihlo yanga ma tala hi minyembeti.” Na wene u nga ha vaviseka loko u yanakanya hi ku xaniseka lokukulu loko n’wana wa Xikwembu Nkulukumba a langusaniki na kone. Kambe loko u ya u yanakanyisisa hi gandzrelo ledzri Yesu a dzri yentxiki, lizrandzru dzraku ha yene ni Papayi wakwe dzri ta ya dzri kula. Akuva u kota ku yanakanyisisa hi xitizrulo, ha yini u nga dondzri hi mhaka leyi ka xidondzro xaku xa ximhunu?

16. Xana ku dondzrisa vambeni hi xitizrulo swi hi pfunisa kuyini? (Vona xifaniso lexi nga ka kapa.)

¹⁶ Dondzrisa vambeni hi xitizrulo. Minkama hinkwayu loko hi byela vambeni hi xitizrulo, ndlela leyi hi xi tlangelaka ha yone yi ya yi kula. Hi ni switizro swa kukazri swa swinene leswi hi nga swi tizrisaka akuva hi dondzrisa vambeni leswaku ha yini Yesu a hi felile. Hi xikombiso, hi nga ha tizrisa dondzro 4 ya broxura ledzri liki Madzrungula Lamanene Ya Xikwembu Nkulukumba! Dondzro leyo yi ni nhlokomhaka leyi liki: “I Mani Yesu Kriste?” Kumbe hi nga ha tizrisa ndzrima 5 ya buku ledzri liki I Yini Leswi Hi Nga Swi Dondzraka A Bibeleni? Ndzrima leyo yi ni nhlokomhaka leyi liki: “Xitizrulo—Nyiko Leyikulu Leyi Pfaka Ka Xikwembu Nkulukumba.” Hi nga tlhela hi yengesela ku tlangela kwezru xitizrulo hi ku va lembe ni lembe hi va kone ka xidzrimuxo xa lifu dzra Yesu Kriste hi tlhela hi zramba vambeni hi nkhinkhi akuva va va na hine. Awee ndjombo leyo leyikulu leyi Yehovha a hi nyikiki yone, ya ku dondzrisa vambeni hi n’wanakwe.

17. Ha yini xitizrulo xi li nyiko leyikulu ya Xikwembu Nkulukumba ka vhanu?

¹⁷ Handle ka ku ganaganeka hi ni swivangelo leswi twalaka swa ku txutxela ni ku tama hi kombisa ku tlangela lokukulu hi xitizrulo. Hi kola ka xitizrulo hi nga kota ku va ni wuxaka bya le kusuhi na Yehovha nambi leswi hi kalaka hi nga hetisekanga. Hi kola ka xitizrulo, a mintizro ya Diyavulosi yi ta susiwa hi ku helela. (1Yh 3:8) Hi kola ka xitizrulo, a nkongometo wa Yehovha hi misava wu ta hetiseka. Misava hinkwayu yi ta ndzruluka paradeyisi. Hinkwavu lava u kumanaka navu va ta va vhanu lava zrandzraka Yehovha va tlhela va mu tizrela. Ingiki siku ni siku hi nga djuletela tindlela ta ku kombisa ku tlangela kwezru hi xitizrulo, ku nga nyiko leyikulu ngopfu ya Xikwembu Nkulukumba ka vhanu.