1. I yini leswi Davhida a swi hlayiki mayelanu ni ku titsrongahata ka Yehovha?

XANA hi nga hlaya leswaku Yehovha awa titsrongahata? Ina, hi nga hlaya. Vona leswi Davhida a swi hlayiki khambi dzrin’wana, a te: ‘U ndzri nyiki xitlhangu xa ku huluxa kwaku. A lizrezre laku [ku titsrongahata kwaku, Tradução do Novo Mundo] li ndzri kulisile.’ (2Sa 22:36; Ps 18:35) Loko a hlaya mazritu lawo, swi nga yentxeka Davhida a a yanakanya hi nkama lowu muprofeta Samuwele a yiki kaya ka tatana wakwe akuva a ya mu tota swanga hosi leyimpswha ya Israyele. Davhida a a li yene wa mutsrongo ka 8 wa vamakwavu, kambe Yehovha a mu lange akuva a pfaleta Sawulu swanga hosi.​—1Sa 16:1, 10-13.

2. Hi ta vona yini ka xidondzro lexi?

² Handle ka ku ganaganeka, Davhida a a ni matitwela lama fanaka ni ya mutsrali wa Psalma 113, lweyi a hlayiki leswi mayelanu na Yehovha: ‘Lweyi a kazramaka a hlomela leswi nga tilwini ni le misaveni. A pfuxa xisiwana a ntsrhuzrini akuva a xi tsrhamisisa ni tihosana.’ (Ps 113:6-8) Ka xidondzro lexi, hi ta vona swiyimu swin’wana leswi Yehovha a kombisiki ku titsrongahata ka swone hi tlhela hi vona leswaku hi nga dondzra yini ka xikombiso xakwe. Ntsrhaku, hi ta dondzra kutsrongo mayelanu ni ku titsrongahata ka xikombiso lexi hi siyeliwiki xone hi hosi Sawulu, muprofeta Daniyele na Yesu.

3. Xana Yehovha a hi khoma hi ndlela yini, nakone leswo swi hi tiyisekisa yini?

³ Hi nga dondzra swinyingi ha Yehovha hi ku lavisa ndlela leyi yene a va khomaka ha yone vhanu vakwe va ku kala ku hetiseka. Yehovha a nga hi voni ntsena swanga vagandzreli vakwe, kambe a tlhela a hi vona swanga vanghanu vakwe. (Ps 25:14) Nakone akuva swi koteka leswaku hi va vanghanu vakwe, Yehovha a nyikele  N’wanakwe swanga xitlhavelo akuva a hi huluxa ka xidoho. Awe timpswalu ni ntwelawusiwana lowu Yehovha a hi kombisiki wone! Hinkwaswu leswo swi hi tiyisekisa leswaku Yehovha i Xikwembu Nkulukumba wa ku titsrongahata.

4. I yini leswi Yehovha a nga hi nyika swone, nakone ha yini?

⁴ Vona ndlela yin’wana leyi Yehovha a kombisaka ku titsrongahata ha yone. Leswi Yehovha a nga Muvumbi, a swi ta mu fanela ku langa leswi mun’wana ni mun’wana wezru a fanelaka ku swi yentxa a wuton’wini byakwe. Kambe yene a nga swi yentxanga leswo. Yehovha a hi hambe a xifanisweni xakwe, nakone a hi nyike ntsrhunxeko wa ku tilangela leswi hi swi djulaka, nambi leswi a tivaka leswaku loko hi fanisiwa na yene hi vatsrongo nakone a hi na ntamu. Yene a nga swi djuli leswaku hi mu tizrela hi ku sindzrisiwa kambe a djula hi mu tizrela hi lizrandzru ni hi ku tiva mabindzru ya ku mu yingiseta. (Dt 10:12; Eza 48:17, 18) A hi ku nyonxisa ka swone ku tizrela Yehovha Xikwembu lexi titsrongahataka!

5. Yehovha a hi dondzrisa hi ndlela yini ku va lava titsrongahataka? (Vona xifaniso lexi nga ka kapa.)

⁵ Yehovha a hi dondzrisa ku titsrongahata hi ndlela leyi a hi khomaka ha yone. A wuyakwini hinkwabyu a nga kone lweyi a nga ni wutlhazri ku tlula Yehovha. Nambi swi li tanu yene a tiyimiseli ku yingiseta mavonela yezru. Hi xikombiso, Yehovha a pfumelele leswaku N’wanakwe a mu pfuna ku vumba mintxhumu hinkwayu. (Pr 8:27-30; Kl 1:15, 16) Nakone nambi leswi a nga wa Ntamu Hinkwawu, Yehovha awa va nyika vambeni wutiyanguleli. Yene a beke Yesu leswaku a ta va Hosi ya Mfumu wakwe, nakone a nyike wulawuli bya kukazri lava va 144.000 va taka fuma na Yesu. (Lk 12:32) Handle ka ku ganaganeka, Yehovha a dondzrise Yesu leswaku a ta va Hosi ni Muprista Lwenkulu. (Hb 5:8, 9) A tlhele a dondzrisa ni lava taka fuma na Yesu. Kambe Yehovha a nga dzringisi ku vonelela ntxhumu wun’wana ni wun’wana lowu va wu yentxaka akuva va hetisisa xiyavelo xavu. A matsrhan’wini ya leswo, awa dumba leswaku va ta ku yentxa ku zrandzra kwakwe.​—Mpf 5:10.

6-7. Hi xini xikombiso lexi Tatana wezru wa le matilweni a hi nyikaka xone mayelanu ni ku yavela ntizro vambeni?

 ⁶ Leswi Yehovha, lweyi a nga vileliki mpfunu, a nyikaka ntizro vambeni, hi nga hlaya yini ha hine? Xana wene u nhloko ya ndangu kumbe u nkulu a bandleni? Ku fana na Yehovha, yavela vambeni mintizro kambe u nga dzringisi ku va landzrelela ka ntxhumu wun’wana ni wun’wana lowu va wu yentxaka. Loko u tekelela xikombiso xa Yehovha, u ta va ni ku nyonxa hi ku vona ntizro wu hetiseka nakone u ta dondzrisa vambeni u tlhela u va pfuna ku vona leswaku navone va nga swi kota. (Eza 41:10) I yini leswi lava nga ni wutiyanguleli va nga swi dondzraka ka Yehovha?

⁷ A Bibele dzri kombisa leswaku Yehovha awa ma nyika lisima mavonela ya tintsrumi. (1Th 22:19-22) Vapswele, xana n’wi nga mu yetiselisa kuyini Yehovha? Loko swi koteka, n’wi nga vutisa mavonela ya vanenu loko n’wi djula ku yentxa ntxhumu wa kukazri. Loko mavonela yavu ma li manene mi nga yentxa hi lani va hlayiki ha kone.

8. Xana Yehovha a va lehiselise kuyini mbilu Abrahamu na Sara?

⁸ Yehovha a tlhela a kombisa ku titsrongahata hi ku lehisa mbilu. Hi xikombiso, loko Yehovha a teka xiboho lexi malandzra yakwe ma nga xi twisisiki ha hombe, a ma lehisela mbilu. Mayelanu ni xiboho xa Yehovha xa ku helisa muti wa Sodoma na Gomora, Abrahamu a ve ni ku ganaganeka a va a byela Yehovha ku kazrateka kwakwe. Yehovha a mu yingisetile. (Gn 18:22-33) Sara, nkata Abrahamu, a hleke xidumbiso xa Yehovha xa leswaku a a ta va ni khuzri nambi leswi a a duhwalile. Kambe a swi mu khunguvanyisanga Yehovha nambi ku mu hlundzrukisa. (Gn 18:10-14) A matsrhan’wini ya leswo, Yehovha a tame a vona Sara hi ndlela leyinene.

9. Xana vatatana ni vakulu a mabandleni va ga mu yetiselisa kuyini Yehovha?

⁹ Xana u tatana wa muti kumbe nkulu bandleni? U nga mu yetiselisa kuyini Yehovha? Pimisa hi leswi: U yangulisa kuyini loko vanaku kumbe vamakwezru a bandleni va ganagana xiboho lexi u xi tekiki? Xana u tekela ku tiyimelela ka xiboho xaku? Kumbe u dzringisa ku twisisa mavonela yavu? Loko vatatana ni vakulu a mabandleni va titsrongahata ku fana na Yehovha, ku pfuneka mindangu ni mabandla. Ku ta tlhasa lani, hi dondzre ndlela leyi hi nga yetiselaka ku titsrongahata ka Yehovha ha yone. Swoswi hi ta dondzra ndlela ya ku titsrongahata hi ku kambisisa swikombiso swi ge swingani swa vhanu lava ku khaneliwaka ha vone a Bibeleni.

10. Yehovha a hi dondzrisisa kuyini?

¹⁰ A Bibeleni, Yehovha, “Mudondzrisi wezru Lwenkulu”, a hi siyele swikombiso leswi hi nga dondzraka ha swone. (Eza 30:20, 21, TNM) Ka dzrone, hi kuma swikombiso swa vhanu lava kombisiki wumhunu lebyi Yehovha a byi nyonxelaka, bya ku fana ni ku titsrongahata ni ku pfumela leswaku a hi koti ku yentxa hinkwaswu. Ni swa vambeni lava kalaka va nga byi kombisanga wumhunu lebyo ni mihandzru leyi va yi tsrhoveliki. Loko hi kambisisa swikombiso leswo hi tlhela hi yanakanyisisa ha swone hi dondzra swinyingi.​—Ps 37:37; 1Ko 10:11.

11. I yini leswi hi nga swi dondzraka ka xikombiso xa ku biha xa Sawulu?

¹¹ Yanakanya hi leswi yentxekeliki hosi Sawulu. A ku sunguleni, ne he mumpswha a a titsrongahata. A a pfumela leswaku a a nga koti ku yentxa hinkwaswu. A ve a ganaganeka ku yamukela swiyavelo leswi yengetelekiki. (1Sa 9:21; 10:20-22) Kambe hi ku famba ka nkama, Sawulu a sungule ku tikulisa. A kombise wumhunu lebyo ntsrhaku ka loko a sungule ku fuma. Siku dzrimbeni, Sawulu a heleliwe hi mbilu lakakuva a vona muprofeta Samuwele na a hlwela. A matsrhan’wini ya ku titsrongahata a dumba leswaku Yehovha a ta pfuna vhanu vakwe, Sawulu a yentxe leswi a a nga pfumeleliwanga ku swi yentxa. A nyikele magandzrelo ya ku hisiwa ka Yehovha. Yi ve yini mihandzru ya kone? Sawulu a nga ha seketeliwanga ha Yehovha, xileswo a luzekeliwe hi wuhosi. (1Sa 13:8-14)  Nakunene, hi fanela ku dondzra swa kukazri ka xikombiso lexi. Hi nga txhuki hi tikulisa ku fana na Sawulu.

12. Xana Daniyele a swi kombise hi ndlela yini leswaku a a pfumela leswaku a a nge na ku kota ku yentxa hinkwaswu?

¹² Ku hambana ni xikombiso xa ku biha xa hosi Sawulu, vona xikombiso lexinene xa muprofeta Daniyele. A wuton’wini byakwe hinkwabyu, Daniyele a a li nandzra wa Xikwembu Nkulukumba lweyi a a titsrongahata ni lweyi a a swi tiva leswaku a a nge na ku kota ku yentxa hinkwaswu. A a djuletela nkongomiso wa Yehovha minkama hinkwayu. Hi xikombiso, loko Yehovha a tizrise Daniyele akuva a tlhamuxela nozro wa Nebukadnetsari, Daniyele a nga zanga a djula leswaku ku dzrumisiwa yene. (Dn 2:26-28) Hi dondzra yini? Loko hi kulungeliwa hi kuva hi beki wukaneli ha hombe kumbe hi kuva hi humelela a nsin’wini, hi fanela ku dzrumisa Yehovha ntsena. Hi fanela ku pfumela leswaku a hi nge na ku yentxa ntxhumu handle ka ku pfuniwa hi Yehovha. (Flp 4:13) Loko hi yentxa leswo, hi ta va na hi nga yetisele xikombiso xa Daniyele ntsena kambe ni xikombiso lexinene xa Yesu. Hi ndlela yini?

13. I yini leswi hi swi dondzraka mayelanu na Yesu ka Yohan 5:19, 30?

¹³ Nambi leswi a nga N’wana lweyi a hetisekiki wa Xikwembu Nkulukumba, Yesu a a kombisa leswaku a a tiseketela ka Yehovha. (Dondzra Yohan 5:19, 30.) Yene a ngi ngi sama a dzringisa ku wutla wuhosi bya Tatana wakwe. Ba-le-Filipi 2:6 yi li Yesu ‘a nga pimisanga leswaku a fanela ku xi felela kumbe a lwela ku dzringana na Xikwembu Nkulukumba’. Swanga N’wana lweyi a tibekaka hansi, Yesu a a swi twisisa leswaku a a nge na ku yentxa hinkwaswu nakone a a bekela xitxhavu wuhosi bya Tatana wakwe.

14. Xana Yesu a yangulise kuyini loko va mu kombeli ku yentxa leswi a swi nga li hansi ka wulawuli byakwe?

¹⁴ Dzrimuka ndlela leyi Yesu a yanguliki ha yone loko vadondzrisiwa vakwe, Yohani na Yakobe, xikan’we ni mamana wavu va kombeli leswaku a yentxa leswi a swi nga li hansi ka wulawuli byakwe. Na a nga ganaganeki, Yesu a swi beki livaleli leswaku a ko va Tatana wakwe ntsena lweyi a a fanela ku hlaya leswaku i mani lweyi a a ta tsrhama a xineneni xakwe ni le ximatsrini xakwe a Mfun’wini wakwe. (Mt 20:20-23) Yesu a a pfumela leswaku a a nga koti ku yentxa hinkwaswu. Yene a ngi ngi sama a tlula nkongomiso lowu Yehovha a mu nyikiki wone. (Yh 12:49) Hi nga xi yetisela hi ndlela yini xikombiso xa ku xonga xa Yesu?

15-16. Xana hi nga xi tizrisa hi ndlela yini xilayu lexi hi xi kumaka ka 1 Ba-le-Korinte 4:6?

¹⁵ Hi nga yetisela xikombiso xa Yesu hi ku landzra xilayu lexi nga ka 1 Ba-le-Korinte 4:6,  lexi liki: ‘N’wi nga ti tlula mpimo wa leswi tsraliwiki.’ Kutani loko mhunu a kombela mpfunu wa kukazri, a hi fanelanga ku zrangisa mavonela yezru, kumbe ku tekela ku hlaya ntxhumu lexi hi telaka a miyanakanywini. A matsrhan’wini ya leswo, hi ta mu kongomisa ka leswi Bibele ni mabuku yezru ma swi hlayaka. Loko hi yentxa leswo hi kombisa leswaku ha pfumela leswaku a hi koti ku yentxa hinkwaswu. Ku titsrongahata ku hi yentxa hi dumba leswaku a ku ‘tsrema’ ka ku lulama ka lweyi wa Ntamu Hinkwawu minkama hinkwayu ka yampswa ku tlula xilayu xin’wana ni xin’wana lexi hi nga xi nyikelaka.​—Mpf 15:3, 4. 

¹⁶ Loko hi pfumela leswaku a hi koti ku yentxa hinkwaswu hi kombisa leswaku ha mu bekela xitxhavu Yehovha. Kambe hi ni swivangelo swin’wana leswinene swa ku va hi kombisa tsrhamela ledzro. Swoswi hi ta vona ndlela leyi ku titsrongahata ni ku pfumela leswaku a hi koti ku yentxa hinkwaswu swi nga hi pfunaka ha yone leswaku hi va ni ku nyonxa hi tlhela hi va ni wuxaka lebyinene ni vhanu vambeni.

17. Ha yini vhanu lava titsrongahataka ni lava pfumelaka leswaku a va koti ku yentxa hinkwaswu va tsrhama na va nyonxile?

¹⁷ Loko hi titsrongahata hi va hi pfumela leswaku a hi koti ku yentxa hinkwaswu ha nyonxa swinene. Ha yini? Hikusa loko hi tiva leswaku a hi koti ku yentxa hinkwaswu, hi kota ku tlangela ni ku tsrhava hi mpfunu wini na wini lowu van’wana va hi nyikaka wone. Hi xikombiso, wa dzrimuka leswi yentxekiki loko Yesu a dahe vavanuna va khume lava a va ni nhlokonho? Ke va na mun’we ntsena lweyi a tlheliki a ya tlangela Yesu hi leswi a mu dahiki mavabyi lawaya ya ku txhavisa. Yene a a nge ti swi kota ku tidaha ha byakwe. Ku titsrongahata ni ku pfumela leswaku a a nge na ku kota ku yentxa hinkwaswu, swi yentxi wanuna lwiyani a kombisa ku tlangela ni ku tlhela a dzrumisa Xikwembu Nkulukumba hi mpfunu lowu a mu nyikiki wone.​—Lk 17:11-19.

18. Xana ku titsrongahata ni ku pfumela leswaku a hi koti ku yentxa hinkwaswu swi hi pfuna hi ndlela yini ku hanyisana ni vambeni? (Ba-le-Roma 12:10)

 ¹⁸ Mhunu lweyi a titsrongahataka ni lweyi a pfumelaka leswaku a nga koti ku yentxa hinkwaswu, swa mu nabyalela ku hanyisana ha hombe ni vambeni ni ku yentxa wunghanu lebyikulu. Ha yini? Hikusa vhanu va ku tanu swa va nabyalela ku xiya matsrhamela lamanene ya vambeni ni ku tlhela va va dumba. Vhanu lava titsrongahataka ni lava pfumelaka leswaku a va koti ku yentxa hinkwaswu va nyonxa loko va vona vambeni na va humelela ka swiyavelo swavu swi nge na mhaka leswaku hi swini swa kone. Vone a va tsrhiki ku kulungela vambeni kumbe ku va yentxela xihluwa.​—Dondzra Ba-le-Roma 12:10.

19. Ha yini hi fanela ku tingawula ku tikulisa?

¹⁹ Vhanu lava tikulisaka swa va kazratela ku kulungela vambeni. Va zrandzra leswaku ku kulungeliwa vone ntsena. Va talisa ku tipimanisa ni vambeni, va tlhela va kombisa moya wa ku palisana. A matsrhan’wini ya ku wupfisa vambeni ni ku va nyika mintizro, vone va talisa ku pimisa leswi: “Akuva ntxhumu wu huma ha hombe, tiyentxeli ha byaku.” A mhaka hi leswaku, ka vhanu lavo akuva mintxhumu yi famba ha hombe yi fanela ku yentxiwa hi ndlela leyi vone va yi djulaka. Handle ka leswo, vhanu lava tikulisaka hakanyingi va djula ku va va lisima ku tlula vambeni nakone va tsrhohoka lava yentxaka mintxhumu ku va tlula. (Ga 5:26) Swa va kazratela ku tsrhama na va ni vanghanu. Loko hi titwa leswaku hi talisa ku tikulisa hi fanela ku pfulela Yehovha mbilu yezru hi kombela leswaku a hi pfuna ku txintxa mayanakanyela yezru. Hi ndlela leyo, a mbewu ya ku tikulisa a yi nge ti dzima mitsru a mbilwini yezru.​—Ro 12:2.

20. Ha yini hi fanela ku titsrongahataka hi tlhela hi pfumela leswaku a hi koti ku yentxa hinkwaswu?

²⁰ Hi xi tlangela ngopfu xikombiso xa Yehovha! Hi vona leswaku yene awa titsrongahata ka ndlela leyi a tizrisanaka ha yone ni malandzra yakwe, nakone hine hi djula ku mu yetisela. Handle ka leswo, hi djula landzra swikombiso swa vhanu lava ku khaneliwaka ha vone a Bibeleni lava a va famba na Yehovha ni lava a va pfumela leswaku a va nga koti ku yentxa hinkwaswu. Loko hi yentxa leswo, hi ta nyika Yehovha ku phatima ni xitxhavu leswi fanelaka yene ntsena. (Mpf 4:11) Nakone minkama hinkwayu hi ta kota ku famba ni Tatana wezru wa le matilweni lweyi a zrandzraka vhanu lava titsrongahataka ni lava pfumelaka leswaku a va koti ku yentxa hinkwaswu.