1. Yehovha a tamelisa vapswele ntizro wini?

YEHOVHA a tumbuluxe vatekani va ku sungula na va ni ku navela ka ku va ni vana. Bibele dzri hlaya ha kone leswaku: ‘A vana i pfindla ledzri pfaka ku Yehovha.’ (Ps 127:3) Xana leswo swi djula ku hlaya yini? A hi nge munghanu waku lwenkulu a ku kombela ku mu bekisela saka dzra ku tala hi mali. Xana a wu ta titwa hi ndlela yini? Kumbexana a wu ta tivona lisima hi leswi munghanu waku a ku dumbaka. Kambe n’waninkama a wu ta txhava leswaku u ta swi kotisa kuyini ku bekisa mali leyo leswaku yi nga txhuki yi yiviwa. Yehovha, Munghanu wezru lwenkulu, a nyika vapswele ntxhumu wa kukazri akuva va wu bekisa lowu nga ni lisima dzrikulu swinene ku tlula mali. A va tamelise ntizro wa ku bekisa vanavu leswaku va hanya ha hombe va tlhela va nyonxa.

2. Hi swini swivutiso leswi hi taka swi kambisisa?

² I mani lwa fanelaka ku hlawula leswaku vatekani va fanela ku va ni vana kumbe a va fanelanga, ni nkama wa kone? Nakone, xana vapswele va nga yentxa yini akuva va pfuna vanavu ku va ni wutomi bya ku nyonxisa? Kambisisa minsinya ya milawu yi nge yingani ntsena leyi kumiwaka a Zritwini dzra Xikwembu Nkulukumba, leyi nga pfunaka vatekani lava nga vakriste ku yentxa swiboho swa wutlhazri.

3. a) I mani lwa fanelaka ku hlawula leswaku vatekani va fanela ku va ni vana kumbe im-him? b) Hi wini nsinya wa nawu wa Bibele lowu vanghanu ni maxaka ya vatekani va fanelaka ku wu dzrimuka?

³ A matikweni man’wana, vhanu vanyingi va pimisa leswaku vhanu lava ha ka ku tekana va fanela ku pswala vana hi ku hatlisa.  Maxaka ni van’wana va nga ha kutxa vatekani leswaku va kahlula ku kuma vana. Makwezru mun’we wa le Ásia lwa vitaniwaka Jethro, a li: “A bandleni, van’we va lava nga ni vana va tsrhamela ku byela vatekani lava ngeke na vana leswaku ku djuleka va pswala vana.” Jeffrey, makwezru mun’wana wa le Ásia, a li: “Van’we va byela vatekani lava ngeke na vana leswaku va ta pfumala wa ku va hlayisa loko va gugile.” Nambitanu, vatekani hi vone lava fanelaka ku tihlawulela ku va ni vana kumbe im-him. Swi lumba vone; i ntsrhwalu wavu wa mfanelo. (Ga 6:5) Ina, swa twisiseka leswaku vanghanu ni maxaka va djula akuva vhanu lava ha ka ku tekana va nyonxa. Kambe hinkwavu va fanela ku dzrimuka leswaku mfanelo ya ku hlawula ku va ni vana kumbe im-him i ya vatekani.​—1Te 4:11.

4-5. Hi tini timhaka tibidzri leti vatekani va fanelaka ku ti kambisisa, nakone hi wini nkama lowunene wa ku bula hi leswo? Tlhamuxela.

⁴ Vatekani lava hlawulaka ku va ni vana va yentxa swone loko va bula hi swivutiso leswibidzri swa lisima: Xa ku sungula, hi wini nkama lowu va djulaka ku va ni vana ha wone? Xa wubidzri, va djula ku va ni vana vangani? Hi wini nkama lowunene wa kuva vatekani va bula hi timhaka leto? Nakone ha yini timhaka leto ti li ta lisima swinene?

⁵ Ngopfu-ngopfu, nkama lowunene wa ku bula hi mhaka ya ku pswala vana kumbe im-him hi loko vhanu va nga si tekana. Ha yini? Xin’we xa swivangelo hi leswaku i swa lisima kuva vatekani va va ni mavonela man’we a mhakeni leyi. Nangweso, ku ta djuleka kuva va kambisisa leswaku va lulamele ku zrwala ntsrhwalu lowo kumbe im-him. Vatekani van’wana va vone swi yampswa ku yima ku khaluta lembe kumbe mabidzri a ntsrhaku ka mutxhatu na va nga si pswala vana hikusa ku va vapswele swi ta djula nkama ni ntamu wunyingi. Kutani va pimisa leswaku ku yimanyana swi ta va nyika nkama wa ku tolovelana ha hombe swanga nuna na nsati ni ku ndzruluka tampa ni xikandarinya.​—Ef 5:33.

6. Leswi hi hanyaka minkameni ya ku kazrata, xana vatekani van’wana va hlawule ku yentxa yini?

⁶ Vakriste van’wana va hlawule ku tekelela xikombiso xa vana lavazrazru va Nowa ni vakatavu. Madjaha lawo ni vakatavu a va tekelanga ku va ni vana. (Gn 6:18; 9:18, 19; 10:1; 2Pe 2:5) Yesu a fanise nkama wezru ni ‘masiku ya Nowa’, nakone a ku na ku ganaganeka leswaku hi hanya ka ‘minkama lemimfani’. (Mt 24:37; 2Tm 3:1) Na va dzrimuka leswo, vatekani van’wana va vone swi yampswa ku tsrhama na va nge na vana akuva va tinyiketela ngopfu wutizrelini bya wukriste.

7. Xana minsinya ya milawu leyi kumiwaka ka Luka 14:28, 29 na Amaproverbia 21:5 yi nga va pfunisa kuyini vatekani?

 ⁷ Loko va djula ku boha leswaku va ta va ni vana kumbe im-him, ni nhlayu ya kone, vatekani lava tlhazrihiki va ‘nkonta leswi fanelaka ku humexiwa’. (Dondzra Luka 14:28, 29.) Vapswele lava wupfiki va tiyisa leswaku ku wundla vana a swi djuli u humexa mali ntsena kambe swi djula u tlhela u heta nkama ni ntamu waku. Xiswoswo, i swa lisima kuva vatekani va kambisisa swivutiso swa ku fana ni leswi: ‘Xana swi ta djula kuva hi wubidzri byezru hi tizra akuva hi kota ku wundla ndangu? Xana hi ni mavonela man’we ka leswaku ‘swivileleko swa lisima’ hi swini a kaya kwezru? Loko swi djula kuva hi wubidzri byezru hi tizra, i mani a taka hlayisa vana? I mani a taka va bekela xikombiso xa mapimisela ni mahanyela lawa va fanelaka ku ma landzra?’ Vatekani lava bulaka hi swivutiso leswo ha hombe va landzra mazritu ya Amaproverbia 21:5.​—Dondzra.

8. Hi swini swikazratu leswi vatekani lava nga vakriste va fanelaka ku pimisa ha swone, nakone xana nuna lwa nga ni lizrandzru a yentxa yini?

⁸ N’wana a djula kuva tatana na mamana ha mun’we va heta nkama ni ntamu wa ku tala na va mu hlayisa. Mfuzri leswo swa mu fanela n’wana. Xileswo, loko vatekani va va ni vana va ku hlawa kusuhi na kusuhi, vapswele swi nga ha va bindzrela ku nyika n’wana mun’wana ni mun’wana lizrandzru ledzri a djulaka ku kombiwa dzrone. Vatekani van’wana lava viki ni swivanana swa ku hlawa va pfumelile leswaku a va titwa na va bindzreliwa. Mamana muni a nga ha tsrhama na a kazralile he nyameni ne mbilwini. Xana swoswo swi nga tlhela swi mu tsrona nkama wa ku dondzra ni ku khongota, ni ku huma nsimu nkama ni nkama? Xihinga xin’wana hi leswaku swi nga mu kazratela ku yingiseta ni ku pfuneka hi leswi dondzriwaka a mintlhanganwini ya wukriste. Swi le livaleni leswaku nuna lwa nga ni lizrandzru a ta yentxa leswi a nga swi kotaka akuva a pfuna nsati loko vana va vilela xa kukazri, a nga va a mintlhanganwini kumbe a kaya. Hi xikombiso, a nga pfuna nsati hi ku kukula kumbe ku hlampswa. A ta tikazrata akuva hinkwavu va pfuneka hi xiyimiso xa Wugandzreli Bya Ndangu nkama ni nkama. Handle ka leswo, tatana lwa nga mukriste a huma nsimu ni ndangu wakwe nkama ni nkama.

9-10. Hi wini ntxhumu wa lisima lowu vapswele lava djulaka ku pfuna vanavu va fanelaka ku wu yentxa?

⁹ Hi yini yin’we ya mintxhumu leyi vapswele va nga yi yentxaka akuva va pfuna vanavu ku dondzra ku zrandzra Yehovha? Xana va nga swi kotisa kuyini ku sizrelela vanavu ka mahanyela ya ku biha? Vona swin’we swa leswi vapswele va nga swi yentxaka.

 ¹⁰ Khongota u kombela Yehovha a ku pfuna. Xiya xikombiso lexi bekiwiki hi Manowa ni nsati wakwe, lava viki vapswele va Samsoni. Loko Manowa a tive leswaku yene ni nsati a va ta pswala djaha, a kombele Yehovha akuva a mu kongomisa a mawundleleni ya n’wana.

11. Xana vapswele va nga xi tekelelisa kuyini xikombiso xa Manowa lexi tlhamuxeliwiki ka Abaṭemi 13:8?

¹¹ Nihad na Alma, va le Bósnia na Herzegovina, va dondzre xa kukazri ka xikombiso xa Manowa. Va tlhamuxela leswi: “Ku fana na Manowa, hi kombele Yehovha a hi dondzrisa ku va vapswele lavanene. Nakone Yehovha a hlamule xikhongoto xezru hi tindlela tinyingi​—hi ku tizrisa Matsralwa, mabuku ya ku dondzra Bibele ha wone, mintlhanganu ya bandla ni tinhlengeletanu ta swifundzra.”​—Dondzra Abaṭemi 13:8.

12. Hi xini xikombiso lexi Yosefa na Mariya va xi bekeliki vanavu?

¹² Dondzrisa hi xikombiso. Leswi u swi hlayaka swi ni lisima. Nambitanu, leswi ngopfu swi nga ha khumbaka n’wanaku hi leswi u swi yentxaka. Hi nga tiyiseka leswaku Yosefa na Mariya va bekele vanavu xikombiso lexinene, ku patsra na Yesu. Yosefa a a tizra na a nga tifeleli akuva a disa ndangu. Handle ka leswo, Yosefa a a kutxa ndangu ku tlangela mintxhumu ya moya. (Dt 4:9, 10) Yosefa a a tolovela ku famba ni ndangu a Yerusalema ‘lembe ni lembe’ ku ya da Paxkwa, nambi leswi Nawu a wu nga mu sindzrisi ku yentxa tanu. (Lk 2:41, 42) Vatatana van’wana a masikwini ya Yosefa va nga ha va va pimise leswaku ku yentxa liyendzro ledzro ni ndangu swi ni pozre nakone swi delana nkama ni mali. Kambe, swi le livaleni leswaku Yosefa a a tlangela mintxhumu ya moya nakone a a dondzrisa vanakwe ku yentxa tanu. Handle ka leswo, Mariya a a ma tiva ha hombe Matsralwa. Handle ka ku ganaganeka, a dondzrise vanakwe ku zrandzra Zritu dzra Xikwembu Nkulukumba hi mazritu ni swiyentxo swakwe.

13. Xana vatekani van’we va landzre xikombiso xa Yosefa na Mariya hi ndlela yini?

¹³ Nihad na Alma, lava hi zrangiki hi bula ha vone, a va djula ku landzra xikombiso xa Yosefa na Mariya. Xana leswo swi va pfunise kuyini ku dondzrisa n’wanavu ku zrandzra ni ku tizrela Xikwembu Nkulukumba? Va li: “Hi ndlela leyi hi hanyaka ha yone, hi dzringise ku komba n’wanezru leswi swi nyonxisaka xiswone ku hanya hi minsinya ya milawu ya Yehovha.” Nihad a yengetela leswi: “Vana muxaka wa mhunu lweyi u djulaka leswaku n’wanaku a va yene.”

14. Ha yini vapswele va fanela ku tiva leswaku vanavu va tlanga na mani?

¹⁴ Pfuna n’wanaku ku langa vanghanu lavanene. Tatana na mamana va fanela ku tiva vhanu lava vanavu va tlangaka navu ni leswi va swi yentxaka loko va li navu. Leswo swi patsra kuva vapswele va tiva leswaku vanavu va khanelisana na mani hi maredi sosiyali ni hi selulari. Vanghanu lavo va nga kutxetela ndlela leyi vana va pimisaka ha yone ni swiyentxo swavu.​—1Ko 15:33.

15. Xana vapswele va nga dondzra yini ka xikombiso xa Jessie?

¹⁵ Xana vapswele va nga yentxa yini loko va nga tolovelanga ku tizrisa komputadori kumbe selulari? Tatana mun’we wa le Filipinas, lwa vitaniwaka Jessie, a li: “A hi nga tivi swinyingi hi swidekedeketana. Kambe leswo a swi hi sivelanga ku basopisa vanezru ka makhombo lama nga vaka kone ka mitxhini ya ku deketela.” Ku kala a nga tivisisi matizrisela ya mitxhini leyi a ku yentxanga Jessie a tsimba vanakwe ku yi tizrisa. A tlhamuxela leswi: “Ni tsratsriye vananga ku tizrisa mitxhini yavu ya ku deketela akuva va dondzra lidzrimi dzrimpswha, va lulamisela mintlhanganu ni ku dondzra Bibele siku ni siku.” Vapswele, xana mi sama mi dondzra mi tlhela mi bula ni vanenu hi swilayu leswinene mayelanu ni ku zrumelana madzrungula ni mifoto leswi kumekaka ka xiyenge xa “Vantshwa” ka jw.org^®? Xana mi pfuxetile navu ma-vídeo  lama liki Wene Ni Telefoni Hi Mani A Lawulaka Munghanu? na Ti tirhise Hi Vutlhari Tiwebsite To Endla Vanghana Eka Tona? * Swilayu leswo swi nga pfuna ngopfu loko mi dondzrisa vanenu ku tizrisa mitxhini ya ku deketela hi wutlhazri.​—Pr 13:20.

16. Xana vapswele vanyingi va yentxe yini, nakone dzri ve dzrini bindzru dzra kone?

¹⁶ Vapswele vanyingi va tikazrata akuva va djulela vanavu mikhandlu ya ku heta nkama ni lava va bekaka xikombiso lexinene a ntizrweni wa Xikwembu Nkulukumba. Hi xikombiso, N’Déni na Bomine, vatekani va le Costa do Marfim, a va talisa ku zramba mudjikelezi akuva a tsrhama kaya kwavu. N’Déni a dzrungula leswi: “Leswi swi tisele djaha dzrezru mabindzru lamakulu. A teke wuphayona nakone swoswi a tizra swanga mupfaleti wa mudjikelezi.” Vapswele, xana mi nga swi kota ku djulela vanenu vhanu lava nga ni xikombiso lexinene xa ku tizrela Yehovha?

17-18. Xana vapswele va fanela ku sungula nkama muni ku dondzrisa vana?

¹⁷ Sungula ku dondzrisa vana na ve he vatsrongo. Vapswele va ta yentxa swone loko va sungula ku dondzrisa vanavu na ve he vatsrongo. (Pr 22:6) Vona leswi yentxekeliki Timotewu, lweyi hi ku famba ka nkama a famba-fambiki na mupostola Pawulo. Mamana wa Timotewu, Ewunise, ni kokwana wakwe Loyisi va dondzrise Timotewu ‘na e he ntsrongo’.​—2Tm 1:5; 3:15.

¹⁸ Vatekani van’wana va le Costa do Marfim, Jean-Claude na Peace, va kote ku dondzrisa vanavu hinkwavu va ntlhanu na mun’we ku zrandzra Yehovha ni ku mu tizrela. I yini swi va pfuniki ku humelela? Va landzre xikombiso xa Ewunise na Loyisi. Va li: “Hi dondzrise vanezru Zritu dzra Xikwembu Nkulukumba hi ku phindha-phindha na ve he vatsrongo, masikunyana a ntsrhaku ka loko va pswaliwile.”​—Dt 6:6, 7.

19. Xana swi tlhamuxela yini ku dondzrisa vana Zritu dzra Xikwembu Nkulukumba?

¹⁹ Swi hlaya yini ‘ku dondzrisa’ n’wanaku Zritu dzra Yehovha? Zritu ledzri ndzruluteliwiki hi xizronga dzri ku ‘dondzrisa’ hi xiheberu dzri tlhamuxela ku ‘dondzrisa ni ku nhingenisa miyanakanywini hi ku phindha-phindha’. Akuva va yentxa tanu, vapswele ku djuleka va tekisa ku heta nkama ni vatsrongwana. Minkama yin’wana swi nga voneka ingiki swi hetana  ntamu ku tsrhamela ku phindha-phindha tindondzro ka vana. Nambitanu, vapswele va fanela ku swi vona na yi li ndlela ya ku pfuna vanavu ku twisisa Zritu dzra Xikwembu Nkulukumba ni ku dzri tizrisa.

20. Tlhamuxela ndlela leyi Amapsalma 127:4 yi nga tizrisiwaka ha yone ku wundleni ka vana.

²⁰ Twisisa. Amapsalma 127 yi fanisa vana ni minseve. (Dondzra Amapsalma 127:4.) Swanga heswi minseve yi nga hambiwaka hi switizro swa ku hambana-hambana swi va swi siyana hi ku kula ka swone, a wu nge va kumi vana vabidzri va ku huma na va fana hi ku helela. Xileswo, ku djuleka vapswele va vona leswaku va fanela ku dondzrisa n’wana mun’wana ni mun’wana hi ndlela yini. Vatekani lava humaka a Israyele wa swoswi lava kotiki ku dondzrisa vanavu vabidzri ku zrandzra Yehovha va dzrungula leswi va pfuniki. Va li: “A hi fambisela n’wana mun’wana ni mun’wana xidondzro xakwe xa Bibele hi tlhelo.” Swi le livaleni leswaku nhloko ya ndangu wun’wana ni wun’wana yi fanela ku boha leswaku swa djuleka kumbe swa koteka ku dondzrisa vana hi ndlela leyo.

21. Xana vapswele va nga yimela yini ka Yehovha?

²¹ Vapswele minkama yin’wana va nga ha titwa na va zrwale swidjumba hi mhaka ya swikazratu leswi va tlhanganaka naswu, kambe vana i nyiko leyi humaka ka Yehovha. Minkama hinkwayu a lulamele ku pfuna vapswele. A yingiseta swikhongoto swavu hi ku swi zrandzra. Nakone a hlamula swikhongoto leswo hi ku tizrisa Bibele, mabuku yezru ni xikombiso ni swilayu swa vapswele van’wana lava wupfiki a bandleni.

22. Hi yini yin’we ya mintxhumu ya lisima leyi vapswele va nga yi nyikaka vanavu?

²² Van’we va li ku wundla n’wana i ntizro lowu tekaka 20 wa malembe, kambe ku va mupswali a swi heli. Yin’we ya mintxhumu ya lisima leyi vapswele va nga nyikaka vanavu i lizrandzru, nkama ni ndondzro leyi seketeliwiki Bibeleni. N’wana mun’wana ni mun’wana a ni ndlela yakwe ya ku yangula ka leswi a dondzrisiwaka swone. Nambitanu, ku tala ka vana lava va khensa hi leswi va kulisiwiki hi vapswele lava zrandzraka Yehovha, nakone va titwa ku fana na Joanna Mae, makwezru wa xisati lwa humaka a Ásia, lwa tiki: “Loko ni dzrimukela leswi ni nga dondzrisisiwa xiswone hi vapswele vanga, ni khensa swinene hi leswi va ni tshinyiki va va va ni dondzrisa ku zrandzra Yehovha. A va ni nyikanga wutomi ntsena, kambe va ni yentxe ni xi tiva lexi ni hanyelaka xone.” (Pr 23:24, 25) Magidigidi ya vakriste va nga hlaya leswi fanaka.