Xana u nga hlamula swivutiso leswi nga ka Xihondzro Xa Ku Zrindzra xa 2019?

Xi tlhamuxela yini xidumbiso xa Xikwembu Nkulukumba lexi liki: ‘A tlhazri dzrin’wana ni dzrin’wana ledzri fuliwaka akuva dzri ta hona wene, dzri nga ka dzri nga koti ntxhumu’? (Eza 54:17)

Hi nga dumba leswaku Xikwembu Nkulukumba a ta hi sizrelela ka mintamu leyi honaka ya ku fana ni ‘hefemulo dzra lava txhavisaka’. (Eza 25:4, 5) Valala vezru va nga ka va nga swi koti ku hi vangela swilondzra leswi ngeke na ku dahiwa.​—w19.01, matluka 6-7.

Xana Yehovha a byi kombisise kuyini wululami loko a tizrisana ni va-Kanana ni va-Israyele lava a va nga yingiseti?

Xikwembu Nkulukumba a yavanyise lava a va li ni swihena swa ku nyenyentsa hi tlhelo dzra tinkuku kumbe lava a va xanisa vavasati ni vatsrongwana. A tovokise vhanu lava a va mu yingiseta ni lava a va kombisa wululami ka van’wanyana.​—w19.02, matluka 22-23.

Xana hi nga yentxa yini loko mhunu lweyi a nga gandzrelikiki Xikwembu Nkulukumba a hamba xikhongoto lani hi nga kone?

Hi nga tsrhama na hi zrulile hi va hi kombisa xitxhavu kambe hi nga hlayi leswaku “amen” kumbe hi nga khomani mavoko ni lavambeni va nga kone. Hi nga tiyentxela xikhongoto xezru xa le mbilwini.​—w19.03, tluka 31.

Ha yini swi bihe ngopfu ku yentxa nsele vatsrongwana?

Ku yentxa nsele ntsrongwana i ku dohela ntsrongwana ha byakwe, ni nhlengeletanu, ni wuhosi bya tiko, na Xikwembu Nkulukumba. Lomu milawu ya wuhosi yi djulaka leswaku xihono xa ku tanu xi hlayiwa, vakulu va mabandla va pfumelelana na swone.​—w19.05, matluka 9-10.

Xana u nga txintxisa kuyini kumbe ku yampswisa mapimisela yaku?

Swa lisima: Kombela Yehovha hi xikhongoto. Yanakanyisisa na u ni nkongometo wa ku tikamba. Hlawula vanghanu hi wutlhazri.​—w19.06, tluka 11.

Xana hi nga yentxa yini swoswi akuva hi tilulamiselela nxaniso?

Hi fanela ku tiyisa wuxaka byezru na Yehovha. Hi dumba leswaku awa hi zrandzra nakone a nga ka a nga hi tsrhiki. Hi dondzra Bibele siku ni siku, hi va hi khongota nkama ni nkama. Hi tiyiseka leswaku matovoko ya Mfumu ma ta tlhasa. Hi tiva hi nhloko tindzrimana ni tinsimu leti hi ti zrandzraka.​—w19.07, matluka 2-4.

Xana hi nga yentxa yini akuva hi pfuna maxaka ku huluka?

I swa lisima kuva hi kombisa ntwela-wusiwana, hi yentxa mahanyela yezru ma beka wumboni, ni kuva hi lehisa mbilu hi tlhela hi lunga mazritu yezru hi munyu.​—w19.08, matluka 15-17.

Xana hi wisisiwa hi ndlela yini, hi laha Yesu a dumbisiki ha kone ka Mattheo 11:28?

Hi ni valaviseli va wukriste lava nga ni lizrandzru, vanghanu lavanene ngopfu, ni ntizro lowunene ngopfu.​—w19.09, tluka 23.

Xana Xikwembu Nkulukumba a nga hi nyikisa kuyini ku navela ni ntamu wa ku tizra? (Flp 2:13)

Loko hi dondzra Zritu dzra Xikwembu Nkulukumba hi tlhela hi yanakanyisisa ha dzrone, Xikwembu Nkulukumba a nga hi nyika ntamu, a hi nyika ku navela ka ku yentxa ku zrandzra kwakwe ni ntamu wa ku tizra. Moya wakwe wu nga yengetela wuswikoti byezru.​—w19.10, tluka 21.

Hi yini mintxhumu ya wutlhazri leyi hi faneliki ku yi yentxa na hi nga si yentxa swiboho swa lisima?

I ntlhanu wa yone: Kambisisa. Khongota u kombela wutlhazri. Kambisisa swivangelo swa kone. Kongoma. Pfumela ntiyiso.​—w19.11, matluka 27-29.

Xana miyanakanyu ya leswaku hika dzra mhunu a dzri fi yi sukele ka leswi Sathana a nga byela Evha?

Swi tikomba swi nga li tanu. Sathana a byele Evha leswaku a a nga ti fa, ku nge leswaku yene a to yentxa ingi o fa. A ku na miyanakanyu ni yin’we ya tindondzro ta wukhongoti bya madzrimi leyi saliki loko ku ve ni Ndhambhi. Ndondzro leyo ya ku nga fi ka hika yi ta va yi tumbuluke na Xikwembu Nkulukumba a nga si na hangalasa vhanu lava a va yaka xihondzro xa Babel.​—w19.12, tluka 15.