U TITWISA ku yini loko u yamukela papela ledzri kutxaka ledzri humaka ka munghanu waku wa lisima? Mudondzrisiwa lweyi a nga mukriste Timotewu a yamukele papela dzra ku fana ni dzrodzro ledzri humaka ka mupostola Pawulo, ku nga buku dzra Bibele ledzri swoswi dzri tiviwaka swanga 2 Timoteo. A swi ganaganekisi leswaku Timotewu a tekele ku djula mbangu lowu zruliki akuva a dondzra leswi munghanu wakwe lweyi a zrandzrekaka a mu tsraleliki swone. Swi nga yentxeka Timotewu a a pimisa leswi: ‘O yini Pawulo? A nga va a ni nkongomiso wa kukazri mayelana ni ndlela leyi ni faneliki ni xi hetisisa hayone xiyavelo xanga? Xana papela ledzri dzri nga ni pfuna ku va ni humelela a ntizrweni wanga wa ku zrezra ni ku dondzrisa ni tlhela ni pfuna vambeni? Hi lani hi ta ka swi vona ha kone Timotewu a ti kumile tinhlamulo ta swivutiso leswi ni ta swimbeni ka papela ledzri dzra lisima. Kambe swoswi a hi voneni swidzrimuxo swa kukazri leswi pfunaka hi nga swi kumaka ka papela ledzri.

Na a ha dondzra mazritu ya ku sungula Timotewu a tekele ku swi xiya leswaku Pawulo a a li munghanu lwenkulu nakone a a zron’weka ha yene. Pawulo a a mu zrandzra ngopfu Timotewu lakakuva a mu vitane ‘n’wananga lweyi a zrandzrekaka.’ (2Tm 1:2) Nambi leswi Timotewu a a ni kolomu ka 30 wa malembe loko a yamukela papela ledzri, kolomu ka 65 N.Y., afa kutani a li nkulu wa bandla lweyi a wupfiki. A a tizrisana na Pawulo hi nkama lowu tlulaka 10 wa malembe nakone a a dondzre swinyingi kwakwe.

Ku tiva leswaku Pawulo a a li ku tiyiseleni ka mindzringo hi ku dumbeka swi mu kutxe ngopfu Timotewu. Pawulo a a tsrimbiwe hi matxhini a djele dzra le Roma nakone a a yimela ku dlayiwa. (2Tm 1:15, 16; 4:6-8) Timotewu a swi xiyile leswaku Pawulo a a ni xivindzri loko a ku: ‘Ndzri tiyisela ku hinkwaswu.’ (2Tm 2:8-13) Ku fana na Timotewu, na hine hi nga tiyisiwa hi xikombiso lexi hlamalisaka xa ku tiyisela ka Pawulo.

Pawulo a kutxe Timotewu ku vona xiyavelo xakwe a ntizrweni wa Xikwembu Nkulukumba na xi li xa lisima swinene. Pawulo a a djula leswaku a yi ‘pfuxa [ku fana ni ndzrilo, TNM] a nyiko ya Xikwembu Nkulukumba’ leyi a yi li ku yene. (2Tm 1:6) Pawulo a tizrise zritu ledzri liki khárisma loko a vulavula hi “nyiko”. Zritu ledzro dzra Xigriki hi ntshima dzri tlhamuxela Nyiko ya mahala ni leyi nga hi fanelikiki, kumbe ntxhumu lexi hi nga xi kumikiki hi wuswikoti byezru. Timotewu a a yamukele nyiko leyo loko  a hlawuliwe ku tizrela mabandla hi ndlela ya ku hlawuleka.​—1Tm 4:14.

Xana Timotewu a a ta yentxa yini hi nyiko leyo? Loko a dondzre mazritu lama liki ‘yi pfuxe ku fana ni ndzrilo’ Timotewu a nga va a pimise hi tiyindlu leti nga ni xitiko lexi Ndlela Ya Ku Lwisana Ni Ku Hela Ntamu ya kone ma yaka ku timekeni, Ndlela Ya Ku Lwisana Ni Ku Hela Ntamu lawu ma nga ha djula ku pfuxetiwa a kuva ma pfuzra ni ku yengesela ku hisa. Xithlamuxela mazritu ximbeni xi hlaya leswaku zritu dzra Xigriki anazopyréo, ledzri Pawulo a dzri tizrisiki, dzri tlhamuxela “ku dzrimuka xikhale, ku pfuxeta, kumbe ku kuputela ndzrilo”, hi ku fanekisela dzri tlhamuxela “ku tlhela u hisekela ntizro wa kukazri” hi ku kongoma Pawulo a a kutxa Timotewu a ku : ‘Tizra hi ku hiseka xiyavelweni xaku.’ Kumbexana na wene u pimisa leswaku hi fanela ku yentxa leswi fanaka​—ku tizra hi ku hiseka a ntizrweni wa Yehovha.

Loko a ya mahlweni a dondzra papela ledzri humaka ka munghanu wakwe lweyi a zrandzrekaka, Timotewu a kume mazritu mambeni lawa a ma ta mu pfuna ku humelela a ntizrweni wakwe. Pawulo a tsrale leswi: ‘Leswinene leswi bekiwiki ku wene swi bekise hi moya lowa ku xwenga, lowu tsrhamaka ndzreni kwezru.’ (2Tm 1:14) I yini leswinene leswi a swi bekiwe ka Timotewu? Ka ndzrimana 13, Pawulo a vulavula hi ‘mazritu lamanene’, ku nga ntiyiso lowu a dondzrisiwiki wone lowu kumekaka a matsralweni. (2Tm 1:13) Swanga mukriste, Timotewu a a fanela ku dondzrisa xihlayelamfuzri a ndzreni ni le handle ka bandla. (2Tm 4:1-5) Handle ka leswo, Timotewu a a bekiwe ku va nkulu wa bandla akuva a byisa ntlhambi wa Xikwembu Nkulukumba. (1Pe 5:2) Timotewu a a ta kota ku bekisa leswi a tamelisiwiki swone​—ku nga xihlayelamfuzri lexi a a fanela ku xi dondzrisa—​hi ku tiseketela hi moya wa ku xwenga wa Yehovha ni hi Zritu dzrakwe.​—2Tm 3:14-17.

Namunhla, na hine hi tamelisiwe xihlayelamfuzri lexi hi fanelaka ku xi dondzrisa vambeni. (Mt 28:19, 20) Na hine hi nga tama hi kombisa leswaku ha xi tlangela xihlayelamfuzri lexo xa lisima swinene, hi ku tama hi khinyela ku khongoteni ni ku txutxela xihena lexinene xa ku dondzra Zritu dzra Xikwembu Nkulukumba. (Ro 12:11, 12; 1Tm 4:13, 15, 16) Swi nga yentxeka hi tamelisiwe wutiyanguleli byimbeni Bya ku tizra swanga vakulu va bandla kumbe vatizreli va nkama hinkwawu. Wutiyanguleli bya ku fana ni lebyo byi fanele byi hi pfuna akuva hi titsrongahata ni kuva hi swi xiya leswaku hi swi kota hi mpfunu wa Xikwembu Nkulukumba. Xileswo, Hi nga kota ku bekisa ntizro lowu hi tamelisiwiki wone hi ku wu nyika lisima ni ku tiseketela hi mpfunu wa Yehovha akuva hi wu yentxa.

Mintizro yimbeni leyi Timotewu a a nyikiwe yone a yi patsra ku dondzrisa vambeni ntizro lowu na yene a a li ku wu yentxeni. Leswo swi yentxe Pawulo a kutxa Timotewu a ku: ‘Leswi u swi yingeliki ku mine swi beke ku vhanu lavanene lava taka swi kota ku swi dondzrisa van’wana.’ (2Tm 2:2) Ina, Timotewu a a fanela ku dondzra ka vamakwezru, a tlhela a dondzrisa vambeni leswi a dondzrisiwiki. I swa lisima leswaku valaviseli hinkwavu ndzreni ka bandla va lwela ku yentxa leswi fanaka. Mulaviseli lwenene a nga yali ku dondzrisa vambeni leswi a swi tivaka hi mhaka ya wukwele. A nga txhavi leswaku lava a va dondzrisaka va nga yentxa ntizro wu xonga ku tlula wakwe. Xileswo, mulaviseli a nga va dondzrisi ntsena mintxhumu ya ntshima, a fihla swimbeni. A va dondzrisa hi mbilu hinkwayu ku yanakanyisisa ni ku twisisa mintxhumu hi wuyenti​—akuva va ndzruluka vakriste lava wupfiki. Hi ndlela leyo, ‘vhanu lava ku dumbeka’ lava a va dondzrisiki va ta kota ku pfuna bandla hi ndlela leyikulu

A ku na ku ganaganeka ka leswaku Timotewu a dzri nyonxelile papela ledzri kutxaka ledzri a tsraleliwiki dzrone ha Pawulo. Hi matihlo ya miyanakanyu hi nga mu vona Timotewu na a tsrhamile a pfuxeta hi ku phindhapindha minkongomiso leyi a tsraleliwiki ha Pawulo akuva a kuma ndlela ya ku yampswa ya ku hetisisa ntizro wakwe.

Na hine hi djula ku yi tekela nhlokweni minkongomiso yoleyo. Hi ndlela yini? Hi ku hetisisa ntizro lowu hi tamelisiwiki wone, hi wu pfuxeta ku fana ni ndzrilo hi tlhela hi tikazratela ku dondzrisa vambeni hinkwaswu leswi hi swi tivaka. Hi ndlela leyo, hi ta kota ku ‘hetisisa wutizreli byezru hi xitalu hi lani Pawulo a kutxiki Timotewu ha kone.’​—2Tm 4:5.