Tinhlokomhaka leti khalutiki ti kombe leswaku ku nga li khale Xikwembu Nkulukumba a ta helisa misava leyi ya ku biha ni swikazratu hinkwaswu swa yone. Hi nga dumba leswaku swoswo swi ta yentxeka. Ha yini? Hikusa Bibele, ku nga Zritu dzra Xikwembu Nkulukumba, dzri dumbisa leswi:

‘A misava ma hundzra.’—1 YOHAN 2:17.

Kambe hi nga dumba leswaku ku ta va ni lava taka huluka hikusa ndzrimana yoleyo ya Bibele yi tlhela yi dumbisa leswi:

‘Lwa yentxaka ku zrandzra ka Xikwembu Nkulukumba, a tsrhama hi la ku nga helikikiki.’

Xiswoswo, akuva hi kota ku huluka, ku djuleka hi yentxa ku zrandzra ka Xikwembu Nkulukumba. Akuva hi tiva ku zrandzra ka Xikwembu Nkulukumba, ku sungula hi fanela ku mu tiva.

Yesu a te: ‘A vutomi lebyi nga gamikiki hi byolebyi, leswaku va ku tiva, wene ntshima Xikwembu Nkulukumba ku hela.’ (Yohan 17:3) Akuva hi kota ku huluka ni ku hanya hi la ku nga helikiki, ku djuleka hi ‘tiva’ Xikwembu Nkulukumba. Swi hlaya leswaku a swi dzringani kuva hi pfumela ntsena leswaku Xikwembu Nkulukumba a kone kumbe hi tiva mintxhumu ya kukazri mayelanu na yene. Ku djuleka hi va vanghanu vake. Hi nga swi yentxisa kuyini swoswo? Hi xikombiso, loko hi djula ku va ni wunghanu lebyi tiyiki ni mhunu wa kukazri, hi fanela ku heta nkama na yene. Hi ndlela leyi fanaka, loko hi djula leswaku wunghanu byezru na Xikwembu Nkulukumba byi va lebyi tiyiki, hi fanela ku heta nkama na hi byi txutxela. Vona ntiyiso wa lisima lowu nga Bibeleni, lowu wu hi pfunaka ku va ni wunghanu na Xikwembu Nkulukumba hi tlhela hi byi tiyisa.

Akuva hi ya mahlweni hi hanya, ku djuleka hi da masiku hinkwawu. Yesu a te: “A mhunu a nga fanelanga ku hanya hi pawu ntsena, kambe a fanela ku hanya ni hi zritu dzrin’wana ni dzrin’wana ledzri dzri humaka a non’wini wa Yehovha.”—Matewu 4:4.

Namunhla, hi kuma mazritu ya Yehovha a Bibeleni. Loko hi dondzra a buku ledzro dzra ku xwenga, hi ta tiva leswi Xikwembu Nkulukumba a hi yentxeliki swone, leswi a swi yentxaka swoswi, ni leswi a taka swi yentxa a nkameni lowo taka.

Swi nga ha yentxeka hi swi djula ku yingiseta Xikwembu Nkulukumba kambe swi hi kazratela ku tsrhika ku yentxa leswi yene a nge swi bihile. Hi nga yentxa yini ka xiyimu lexi? Ku tiva Xikwembu Nkulukumba swi ta hi pfuna ngopfu.

Vona xikombiso xa wansati lweyi hi taka mu vitana Sakura, lweyi a a hanya wutomi lebyi kalaka byi nga basanga. Loko a sungule ku dondzra Bibele, a dondzre leswaku Xikwembu Nkulukumba a li: ‘Tsrutsrumani n’wi txhava vumbuye.’ (1 Ba-le-Korinte 6:18) Sakura a khongotile a kombela mpfuno ka Xikwembu Nkulukumba, a va a swi kota ku tsrhika mahanyela yake laya ku biha. Kambe a swi djula a tama a lwisana ni miyanakanyu leyo ya ku biha. Yene a te: “Loko ni ni miyanakanyu yoleyo ya ku biha, ni tekela ku pfulela Yehovha mbilu, ni khongota hikusa na swi tiva leswaku a ni nge swi hluli leswi wuswanga. Ntamu lowu xikhongoto xi nga na wone wu yentxe leswaku ni tsrhindzrekela kusuhi ngopfu na Yehovha.” Ku fana na Sakura, vhanu vanyingi va ya mahlweni va tiva Xikwembu Nkulukumba, kutani a va nyika ntamu lowu va wu vilelaka akuva va txintxa mahanyela yavu, va hanya hi ndlela leyi yi mu nyonxisaka —Ba-le-Filipi 4:13.

Loko u ya u mu tiva Xikwembu Nkulukumba, na Yene a ta ya a ku tiva swanga munghanu wake lwe wa ku zrandzreka. (Ba-le-Galatia 4:9; Amapsalma 25:14) Hi ndlela leyo, u ta kota ku huluka ku hela ka misava leyi u va u hanya a misaveni leyimpswha ya Xikwembu Nkulukumba. Xana misava leyimpswha yi ta va hi ndlela yini? Nhlokomhaka leyi landzrelaka yi ta tlhamuxela xivutiso lexi.