Ha Yini Xikwembu Nkulukumba A Nga Hlamuli Swikhongoto Hinkwaswu?
Yehovha Xikwembu Nkulukumba, Tatana wezru wa le tilweni, awa swi djula nakone a wa swi nyonxela ku yingela swikhongoto swezru leswi sukelaka mbilwini. Kambe, ku ni mintxhumu leyi nga yentxaka Xikwembu Nkulukumba a tsrhika ku yingela swikhongoto swezru. He yini mintxhumu ya kone nakone i yini leswi hi fanelaka ku swi dzrimuka loko hi khongota? A hi voneni swin’wana swa leswi Bibele dzri kongomisaka ku swi yentxa.
‘Loko n’wi khongota, n’wi nga tateni mazritu.’—Mattheo 6:7.
Yehovha a nga swi djuli leswaku hi phindetela swikhongoto leswi he ke yentxa hi ku swi beka nhlokweni kumbe leswi he ke yentxa hi ku dondzra ka mabuku ya swikhongoto. Amatsrhan’wini ya leswo, a djula leswaku hi khanela na yene na swi sukela mbilwini. Yanakanya hi ndlela leyi a wu ta titwa ha yone loko a ho va ni munghanu lweyi a tsrhamelaka ku hlaya mazritu wolawa ya man’we siku ni siku. Vanghanu lavanene va pfulelana xifuva. Loko hi tizrisa mazritu yezru lama sukelaka mbilwini loko hi khongota ka tatana wezru wa le tilweni, leswo swi kombisa leswaku hi mu vona swanga munghanu wezru.
‘N’wa kombela, n’wi nga yamukelisiwi hi leswi nwi kombelaka hi ku biha.’—Yakob 4:3.
Swi le livaleni leswaku a hi nge yimeli kuva Xikwembu Nkulukumba a hlamula swikhongoto swezru, loko hi kombela mintxhumu leyi hi swi tivaka leswaku a nga swi djuli leswaku hi yi yentxa kumbe hi va na yone. Hi xikombiso, loko mhunu lweyi a zrandzraka mintxhumu ku tlula mpimu a khongota ka Xikwembu Nkulukumba a kombela kuva a mu nyika ndjombo ni ku ganya mali ya yinyingi, xana Yehovha a a ta xi hlamula xikhongoto xolexo? Yene a vhele a hi byela leswaku a nga swi djuli kuva hi va ni makwanga kumbe hi djuletela tindjombo. (Ezaya 65:11; Luka 12:15) Handle ka ku ganaganeka, a hi nge yimeli leswaku Yehovha a hlamula swikhongoto swaku fana ni leswo! Akuva Xikwembu Nkulukumba a hi hlamula loko hi khongota ka yene, hi fanela ku kombela mintxhumu leyi fambisanaka ni leswi a hi byelaka swone a Bibeleni.
‘Lwa pfalaka ndleve akuva a nga yingeli nawu, a swikhongoto swakwe na swone i likasi.’—Amaproverbia 28:9.
A minkameni leyi Bibele dzri tsraliwiki ha yone, Xikwembu Nkulukumba a a nga hlamuli swikhongoto swa vhanu lava a va bakanya milawu yakwe. (Ezaya 1:15, 16) Xikwembu Nkulukumba a nga txintxanga. (Malaki 3:6) Loko hi djula leswaku Xikwembu Nkulukumba a hlamula swikhongoto swezru, hi fanela ku yentxa hinkwaswu hi nga si kotaka akuva hi hanya hi milawu yakwe. Swi li yini hi loko hi same hi yentxa mintxhumu ya ku biha a nkameni lowu khalutiki? Xana leswo swi tlhamuxela leswaku Yehovha a nge he txhuki a yingela swikhongoto swezru? Im-him, a swi tlhamuxeli swone! Loko hi kombisa leswaku ha tisola hi mintxhumu ya ku biha leyi hi yi yentxiki, Xikwembu Nkulukumba hi lizrandzru a ta hi dzrivalela.—Amintiṛo 3:19.
