Ka nhloko-mhaka leyi khalutiki hi dondzre hi xikombiso lexi Yesu a xi nyikeliki. Xikombiso lexo i xitiyisekiso lexi vonekaka xa leswaku Mfumu wa Xikwembu Nkulukumba, lowu Hosi ya wone ku nga Yesu Kriste, wu bekiwile matilweni.

Bibele dzri tlhamuxela leswaku loko a sungula ku fuma, Yesu a hlongole Sathana ni mademona yakwe. Xileswo, swoswi va kola misaveni, leswo hi swone swi yentxaka leswaku mintxhumu yi bindzra ku sukela hi 1914.​—Apfuletelo 12:7, 9.

Nambileswi hi langutanaka ni xiyimu xa ku kazrata lani misaveni, Mfumu wa Yesu wu le ku pfuneni ka vhanu a misaveni hinkwayu. Hi lani Yesu a hlayiki leswaku a swi ta yentxeka ha kone, vanyingi va dondzra ni ku tizrisa minkongomiso ya Bibele a wuton’wini byavu hi ku tizrisa a nongonoko wa ku fambisa swidondzro swa Bibele a misaveni hinkwayu. (Ezaya 2:2-4) Vhanu va magidigidi va dondzra ku nga nyiki lisima mintxhumu leyi vonekaka, akuva va yampswisa wutomi byavu bya ndangu, va nyonxa hi leswi va nga naswu na va nga vi swikazrawa swa swone. Vhanu lavo va dondzra ku va ni wutomi bya ku nyonxisa swoswi ni ku va muxaka wa vhanu lava taka hanya a misaveni ya ku zrula a nkameni lowu taka.

Yesu awa fuma swoswi a tilweni. Nambitanu misava ya ha fumiwa hi vhanu. Hi mhaka yoleyo, Xikwembu Nkulukumba a byele Yesu leswi: ‘Fuma, wene, a makazri ka valala vaku.’ (Amapsalma 110:2) Ku nga li khale, Yesu a ta yavanyisa a tlhela a helisa valala vakwe hinkwavu ni ku tisa ntsrhunxeko ka lava hi ku swi zrandzra va tibekaka hansi ka Xikwembu Nkulukumba.

Loko nkama lowu wu tlhasa, mfumu wa Xikwembu Nkulukumba:

• Wu ta helisa wukhongoti bya madzrimi. Wukhongoti lebyi donzdrisaka madzrimi mayelanu na Xikwembu Nkulukumba ni ku tlhela byi xanisa vhanu byi ta suvisiwa. Bibele dzri fananisa wukhongoti bya madzrimi ni wansati wa wumbuye. A ku suvisiwa kwakwe ku ta txhukisa lava ku tala.​—Apfuletelo 17:15, 16.

• Wu ta helisa wuhosi bya vhanu. Mfumu wa Xikwembu Nkulukumba wu ta helisa mimfumu hinkwayu ya vhanu.​—Apfuletelo 19:15, 17, 18.

• Wu ta helisa lava ku yentxa swa ku biha. Xana ku ta yentxeka yini ka lava tiyimiseliki ku yentxa wusomboloki nakone va yalaka ku tibeka hansi ka wuzrangeli bya Mfumu wa Xikwembu Nkulukumba? ‘Kambe lava ku biha va ta susiwa la misaveni.’​—Amaproverbia 2:22.

• Wu ta suvisa Sathana ni mademona yakwe. Sathana ni mademona yakwe a va nge he ‘hambukisi matiko’.​—Apfuletelo 20:3, 10.

Kambe he yini mintxhumu leyinene leyi taka yentxekela vhanu lava tibekaka hansi ka minkongomiso ya Mfumu wa Xikwembu Nkulukumba?

Mintxhumu leyi Yesu a taka yi yentxa swanga Hosi a yi nge dzringanisiwi ni ntxhumu ni wun’we ka leswi yentxiwiki hi mufumi lweyi a nga wa nyama. Yesu a ta pfuniwa hi 144.000 wa vafumi kulobye, lava hlawuliwiki lani misaveni akuva va ta fuma na yene matilweni. (Apfuletelo 5:9, 10; 14:1, 3) Yesu a ta yentxa leswaku ku zrandzra ka Xikwembu Nkulukumba ku yentxeka lani misaveni. Xileswo, Mfumu wa Xikwembu Nkulukumba:

• Wu ta helisa mavabyi ni ku fa. ‘Ku nga vi na muyaki lwa taka ku: Ndzra vabya’ ni ‘ku fa ku nga ha vi kone’.​—Ezaya 33:24; Apfuletelo 21:4.

• Wu ta tisa ku zrula ka ntiyiso ni nsizrelelo. ‘A ku zrula ka vana vaku ku ta va lokukulu’, nakone ‘va ta tsrhama mun’wana ni mun’wana hansi ka nvinya wakwe, ni le hansi ka nkuwa wakwe; a nga ve kone lwa taka va txhavisa’.​—Ezaya 54:13; Mika 4:4.

• Wu ta nyika vhanu hinkwavu ntizro lowu nyonxisaka. ‘Vahlawuliwa vanga va ta tsrhavela ntizro wa mavoko yavu. Va nga ka va tikazrateli mahala.’​—Ezaya 65:22, 23.

• Wu ta lulamisa swikazratu leswi honaka misava. ‘A tiko dzra mabalasi [hula] ni tiko ledzri womiki dzri ta tsrhava; a nhova yi ta nyonxa yi ta zrumbuka swanga magon’hwa.’​—Ezaya 35:1.

• Wu ta dondzrisa vhanu ku yentxa ku zrandzra ka Xikwembu Nkulukumba akuva va hanya hi la ku nga helikiki. ‘Kambe a wutomi lebyi nga gamikiki hi byolebyi, hi leswaku va ku tiva, wene ntshima ya Xikwembu Nkulukumba ku hela, ni lweyi u mu zrumiki, Yesu Kriste.’​—Yohan 17:3.

Xikwembu Nkulukumba a swi djula ngopfu leswaku wene u va makazri ka lava taka kuma matovoko wolawo. (Ezaya 48:18) Nhloko-mhaka leyi landzrelaka yi ta tlhamuxela leswi u nga swi yentxaka swoswi akuva u kuma wumundzruku byolebyo bya ku hlamalisa.